by Suryaa Desk | Sat, Nov 23, 2024, 08:13 PM

ఆంధ్రప్రదేశ్ ప్రభుత్వం పట్టణాల్లో పేదలకు తీపికబురు చెప్పింది. పట్టణాల్లోని పేదల గృహ నిర్మాణ అంచనా వ్యయాన్ని పెంచింది. ఇప్పటికే ఉత్తర్వులు జారీకాగా.. పురపాలక సంఘాలు, అర్బన్‌ డెవలప్‌మెంట్‌ అథారిటీ పరిధిలోని పేదలకు లబ్ధి చేకూరనుంది. పేదలకు ఇళ్ల నిర్మాణ ఈ పథకం కింద ఎంపికైన వారికి గరిష్ఠంగా అంచనా విలువ రూ.2.5 లక్షలుగా నిర్ణయించిన సంగతి తెలిసిందే. దీనిలో కేంద్రం వాటాగా రూ.1.50 లక్షలు, రాష్ట్ర ప్రభుత్వం రూ.లక్ష అందిస్తారు. పీఎంఏవై-యు 2.0 పథకం కింద గృహాలు నిర్మించుకోవాలనుకుంటున్నవారు ముందుగా గృహనిర్మాణ శాఖ ఏఈ వద్ద తమ పేర్లు నమోదు చేసుకోవాలని సూచిస్తున్నారు.

 నవంబరు నెలాఖరు లోపు తమ పేర్లు నమోదు చేసుకుంటే సాధ్యాసాధ్యాలను పరిశీలించిన తర్వాత లబ్ధిదారుల్ని ఎంపిక చేస్తారు. ప్రధానంగా నిర్మాణ వ్యయం పెరిగడంతో.. కొందరు పేదలు ఇళ్ల నిర్మాణాలు చేయలేదు. ఇప్పుడు పట్టణ పరిధిలోని లబ్ధిదారులంతా గృహ నిర్మాణం చేసుకోవచ్చు.మరోవైపు ఏపీ ముఖ్యమంత్రి చంద్రబాబు ఇటీవల కీలక ప్రకటన చేశారు. పేదలకు గ్రామాల్లో 3 సెంట్లు, పట్టణాల్లో 2 సెంట్ల భూమి ఇచ్చి ఇళ్లు కట్టించి కట్టిస్తామని ప్రకటించారు. అంతకాదు వచ్చే నెలలో లక్ష ఇళ్లలో గృహ ప్రవేశాలు చేస్తామన్నారు.

పేదలకు ఇళ్ల నిర్మాణానికి సంబంధించి కేంద్ర ప్రభుత్వ వాటా 60 శాతం, రాష్ట్ రప్రభుత్వ వాటా 40 శాతం ఉంటుంది. కొత్త లబ్ధిదారుల ఎంపికపై కూడా సర్వే చేయనున్నారు. అంతేకాదు ఇళ్లు లేకుండా సొంత స్థలాలున్న వారికి కూడా అందులో గృహ నిర్మాణానికి అనుమతిస్తారు. ఇళ్ల నిర్మాణాలు కూడా నాణ్యంగా ఉండాలని.. పేదలు, మద్య తరగతి, దిగువ తరగతుల్లో అర్హత ఉండే ఇళ్లు లేని వారికి పట్టాలు పంపిణీ చేసి నిర్మించాలని నిర్ణయించారు.

అంతేకాదు గత ప్రభుత్వ హయాంలో ఇళ్లు మంజూరై కోర్టు వివాదాల కారణంగా నిర్మించుకోలేని వారికి.. అమరావతి, రాష్ట్రవ్యాప్తంగా ఇతర ప్రాంతాల్లోని వారికి పీఎంఏవై (పట్టణ)-2.0 కింది ఇవ్వాలని ఏపీ ప్రభుత్వం ఆలోచిస్తోంది. గత ప్రభుత్వంలో ఇళ్లు మంజూరై ఇప్పటికీ కట్టుకోని వారికి కొత్త పథకం వర్తించేలా కేంద్రాన్ని ఒప్పించేందుకు ప్రయత్నిస్తామని మంత్రి కొలుసు పార్థసారథి అన్నారు. పేదలకు పట్టాలు, ఇళ్లపై త్వరలోనే మార్గదర్శకాలను విడుదల చేయనుంది ప్రభుత్వం.