by Suryaa Desk | Sun, Nov 24, 2024, 10:16 PM

శబరిమల అయ్యప్ప దర్శనానికి గత రెండు రోజుల నుంచి భక్తులు తాకిడి ఎక్కువగా ఉంది. భక్తుల రద్దీతో శబరిగిరులు కిక్కిరిసిపోతున్నాయి. పంబ వరకూ క్యూలైన్‌ వ్యాపించింది. ఆంధ్రప్రదేశ, తెలంగాణ తమిళనాడు, కర్ణాటక తదితర రాష్ట్రాల నుంచి పెద్ద సంఖ్యలో అయ్యప్పలు తరలివస్తున్నారు. శుక్రవారం ఒక్క రోజే 87,186 మంది స్వామిని దర్శించుకున్నారు. ఈ సీజన్‌లో ఇంత సంఖ్యలో భక్తులు దర్శించుకోవడం ఇదే మొదటిసారి. శని, ఆదివారాలు కూడా రద్దీ ఎక్కువగా ఉంది. రాత్రి 11 గంటల తర్వాత ఆలయం మూసివేయడంతో దర్శనాలు నిలిచిపోయాయి.. ఆదివారం తెల్లవారుజామున 3 గంటల నుంచి మళ్లీ భక్తులను అనుమతిస్తున్నారు. దర్శనాలకు 10 నుంచి 14 గంటల సమయం పడుతోంది. భక్తుల రద్దీని దృష్టిలో ఉంచుకుని మరకుట్ట సమీపంలోని మూడు చోట్ల భక్తులను నియంత్రించి... సన్నిధానానికి ఒకేసారి ఎక్కువ మంది రాకుండా ఉండేందుకు ఆంక్షలు విధించారు.

ఈ సీజన్‌లో భారీగా అయ్యప్ప దర్శనాలకు భక్తుల వస్తారని అంచనా వేసి.. రోజుకు 80 వేల మందికి (వర్చువల్ క్యూ 70,000, స్పాట్ బుకింగ్‌లు 10,000) దర్శన టిక్కెట్లు జారీచేయాలని నిర్ణయించారు. అయితే, గతవారం భక్తుల రద్దీ అంచనా కంటే తక్కువగా ఉండటంతో అదనంగా మరో 10 వేల దర్శన టిక్కెట్లు జారీచేసే ఆలోచనలో ఉన్నట్టు ట్రావెన్‌కోర్ దేవస్థానం బోర్డు తెలిపింది. దీని వల్ల భక్తుల సంఖ్యను పెరుగుతోందని ఆశించింది. ఈ క్రమంలో శుక్రవారం నుంచి అనూహ్యంగా భక్తుల సంఖ్య పెరుగుతూ వస్తోంది. ఈ ఏడాది ఆలయంలో మండల పూజల సీజన్ మొదలైన తర్వాత వారం రోజుల్లో 5.30 లక్షల మంది స్వామిని దర్శించుకున్నారు. గతేడాది మొదటి వారంలో ఈ సంఖ్య 2.64 లక్షలే కావడం గమనార్హం.

‘శుక్రవారం 87,216 మంది భక్తులు దర్శించుకున్నారు.. వీరిలో 11 వేల మంది స్పాట్ బుకింగ్ టోకెన్లు ద్వారా దర్శనం చేసుకున్నారు.. గతవారం నిలక్కల్, ఎరుమేలి, సత్రం వద్ద ఏర్పాటుచేసిన స్పాట్ బుకింగ్ కౌంటర్ల ద్వారా 50 వేల మంది భక్తులు టోకెన్లు తీసుకున్నారు..’ అని టీడీబీ ఛైర్మన్ పీఎస్ ప్రశాంత్ తెలిపారు. అయితే, దర్శన టోకెన్ల పెంపుపై ఆయన ఆచితూచి స్పందించారు. నిర్వహించ స్థాయికి మించిన భక్తుల రాక లాజిస్టికల్ సవాళ్లకు దారితీస్తుందని చెప్పారు. అయితే, గతేడాది డిసెంబరులో దర్శన టిక్కెట్లను 90 వేలకు పెంచాలని కేరళ హైకోర్టు ఆదేశించింది. దీనిపై తాజాగా శబరిమల స్పెషనల్ కమిషనర్ ఆర్ జయకృష్ణన్.. కోర్టుకు నివేదిక సమర్పించారు. నివేదిక పరిశీలించిన కోర్టు ప్రస్తుతం రోజుకు 80 వేల టోకెన్లు జారీ అవుతున్నాయని, తమ ఉత్తర్వులు అమలు కావడం లేదని వ్యాఖ్యానించింది. ఈ నేపథ్యంలో మరో 10 వేల దర్శన టోకెన్లను పెంచేందుకు టీడీబీ చర్యలు తీసుకుంటోంది.