by Suryaa Desk | Mon, Nov 25, 2024, 08:14 PM

గుంటూరు జిల్లాలో దారుణం జరిగింది. ఓ వ్యక్తి ప్రమాదం చూడటానికి వెళ్లి ప్రాణాలు కోల్పోయాడు. ఓ ఇంట్లో సిలిండర్లు పేలడంతో అగ్ని ప్రమాదం జరిగింది.. ఆ సమయంలో కుటుంబ సభ్యులు ఇంట్లో లేకపోవడంతో పెద్ద ప్రమాదం తప్పింది. అయితే ఈ ప్రమాదాన్ని చూడటానికి వెళ్లిన వ్యక్తి అనుకోకుండా చనిపోవడం తీవ్ర విషాదాన్ని నింపింది. పెదకాకాని మండలం వెంకటకృష్ణాపురానికి చెందిన అమ్మిశెట్టి శ్రీనివాసరావు, భార్య, కుమార్తె సుజాత కుటుంబాలు ఒకే పూరిగుడిసెలో రెండు పోర్షన్‌లు ఉన్నాయి.

వీరు ఆదివారం ఉదయం ఇంట్లో కార్తీక దీపాలు వెలిగించి పూజలు చేసి.. ఆ తర్వాత ఊరి శివారులోని నాగేంద్రస్వామి పుట్ట దగ్గరకు వెళ్లారు. అయితే ఉదయం 11 గంటల ప్రాంతంలో పూరింట్లో నుంచి మంటలు రాగా.. రెండు సిలిండర్లు పేలాయి. ఈ అగ్ని ప్రమాదం జరిగిన ఇంటికి ఆనుకొని రోడ్డు దగ్గరకు అదే ఊరికి చెందిన రైతు తులసీనాథ్‌, వీరాంజనేయులు, మల్లికార్జునరావు, పరమేష్‌లు వచ్చారు. ఆ సమయంలో ఆ ఇంట్లోని మూడో సిలిండర్‌ కూడా పేలడంతో.. ఆ ఇనుప ముక్కలు నలుగురిపై పడటంతో గాయాలయ్యాయి. వారిని వెంటనే స్థానికులు గుంటూరు ప్రభుత్వ ఆసుపత్రికి తరలించారు. వీరిలో తులసీనాథ్‌ తలకు తీవ్రగాయాలవ్వడంతో ఆస్పత్రిలో చికిత్స పొందుతూ చనిపోయాడు. అగ్నిమాపక శాఖ అధికారులు వచ్చి మంటలు ఆర్పేశారు.

తులసీనాథ్‌ ఆదివారం ఉదయం తన పొలానికి వెళ్లి గడ్డి మందు వేసి వచ్చారు. ఈ అగ్నిప్రమాదం జరిగిన ప్రాంతానికి దగ్గరలో అత్తారింటికి వెళ్లి అక్కడే ఉన్న భార్య, పిల్లలను పలకరించారు. దీంతో తులసీనాథ్ అత్తారింటిలోని విద్యుత్తు సరఫరా నిలిపివేసి.. గ్యాస్‌ సిలిండర్‌ రెగ్యులేటర్‌ తొలగించారు. ఆ తర్వాత అగ్నిప్రమాదం జరిగిన ఇంటిని చూసేందుకు వెళుతుండగా భార్య వెళ్లొద్దని హెచ్చరించింది. తులసీ మాత్రం దూరంగా ఉండి చూసి వస్తానని వెళ్లాడు.. కొద్దిసేపటికే సిలిండర్‌ పేలి ముక్క ఆయన తలకు బలంగా తగిలింది. ఈ ప్రమాదంలో చనిపోవడంతో భర్తను చూసి భార్య కన్నీటిపర్యంతం అయ్యారు. తులసీనాథ్‌కు కుమారుడు, కుమార్తె ఉన్నారు. మరోవైపు ఈ ప్రమాదంలో.. శ్రీనివాసరావు ఇల్లు నిర్మించుకునేందుకు ఇటీవల చిట్టీ పాడిన డబ్బు, భార్యకు డ్వాక్రాలో వచ్చిన నగదు మొత్తం రూ.5 లక్షలు బీరువాలో దాచుకోగా.. అగ్ని ప్రమాదంలో నగదు మొత్తం కాలి బూడిదైంది.