by Suryaa Desk | Mon, Dec 23, 2024, 07:14 PM

తిరుపతికి చెందిన జూనియర్ ఎన్టీఆర్ అభిమాని కౌశిక్ గుర్తున్నాడా.. క్యాన్సర్‌తో బాధపడుతున్న కౌశిక్‌ను జూనియర్ ఎన్టీఆర్ గతంలో ఫోన్ చేసి పరామర్శించిన సంగతి తెలిసిందే. వీడియో కాల్ చేసిన తారక్..చికిత్సకు అవసరమైన సాయం చేస్తానంటూ హామీ కూడా ఇచ్చారు. అయితే ఇప్పుడు మరోసారి కౌశిక్ విషయం తెరపైకి వచ్చింది. క్యాన్సర్‌తో బాధపడుతున్న కౌశిక్‌కు చెన్నైలోని అపోలో ఆస్పత్రిలోబోన్ మ్యారో ట్రాన్స్‌ప్లాంటేషన్ పూర్తి అయ్యింది. ఈ విషయాన్ని కౌశిక్ తల్లి సరస్వతి విలేకర్ల సమావేశంలో వెల్లడించారు. ఈ సందర్భంగా మరికొంత సాయం అవసరం ఉందంటూ ఆమె కోరారు. అలాగే జూనియర్ ఎన్టీఆర్ సాయం గురించి కీలక వ్యాఖ్యలు చేశారు.

జూనియర్ ఎన్టీఆర్ నుంచి కౌశిక్‌ చికిత్స కోసం ఎలాంటి సాయం అందలేదని సరస్వతి చెప్పారు. జూనియర్ ఎన్టీఆర్ అభిమానులు మాత్రం రెండున్నర లక్షల వరకూ అందించారని తెలిపారు. అలాగే ఏపీ ప్రభుత్వం నుంచి 11 లక్షలు, టీటీడీ నుంచి రూ.40 లక్షలు సాయం అందించారని తెలిపారు. వీరందరికీ కృతజ్ఞతలు తెలియజేశారు. కౌశిక్‌కు చెన్నైలోని అపోలో ఆస్పత్రిలో చికిత్స కొనసాగుతోందని, ఇంకా 20 లక్షలతో పాటుగా ఆస్పత్రి ఖర్చులు కట్టాల్సి ఉందని.. సాయం చేయాలని సరస్వతి విలేకర్ల సమావేశంలో కౌశిక్ తల్లి సరస్వతమ్మ కోరారు.

దేవర సినిమా విడుదలకు దేవర సినిమా చూసి చనిపోవాలని ఉందని, తన చివరి కోరిక అదే అంటూ కౌశిక్ పెట్టిన పోస్టు అప్పట్లో సోషల్ మీడియాలో వైరల్ అయ్యింది. దీంతో జూనియర్ ఎన్టీఆర్ కూడా దీనిపై స్పందించారు. క్యాన్సర్‌తో పోరాడుతూ బెంగుళూరులో చికిత్స పొందుతున్న కౌశిక్‌ను వీడియో కాల్‌ ద్వారా పరామర్శించారు. ఎన్టీఆర్‌ టు ఎన్టీఆర్‌ అభిమాన సంఘం రాష్ట్ర కన్వీనర్, తిరుపతి వాసి కృష్ణయాదవ్‌ కౌశిక్‌‌ను ఎన్టీఆర్‌తో వీడియో కాల్‌లో మాట్లాడించారు. పది నిమిషాల పాటు మాట్లాడిన ఎన్టీఆర్‌.. వైద్యానికి అండగా ఉంటానని ధైర్యం చెప్పారు. అలాగే నేరుగా వచ్చి కలుస్తానని, త్వరగా కోలుకుంటే దేవర సినిమా ఇద్దరూ కలిసి చూద్దామని మాట ఇచ్చారు.

అయితే ఎన్టీఆర్ నుంచి ఇంకా ఎలాంటి సాయం అందలేదని సరస్వతమ్మ చెప్తున్నారు. కృష్ణ యాదవ్‌ను అడిగితే ప్రభుత్వాన్ని కలవాలని చెప్పారన్నారు. ఎన్టీఆర్ అకౌంటెంట్ అంటూ తన వద్ద ఉన్న నంబర్‌కు ఫోన్ చేస్తే.. వారు కూడా స్పందించలేదని, సాయం చేయాలని కోరుతున్నారు.