by Suryaa Desk | Mon, Dec 23, 2024, 07:22 PM

బంగ్లాదేశ్ మాజీ ప్రధాని షేక్ హసీనాను అప్పగించాలని బంగ్లాదేశ్ ప్రభుత్వం భారత్‌ను కోరింది. న్యాయ ప్రక్రియ కోసం బంగ్లాదేశ్ ప్రభుత్వం ఆమెను తిరిగి తీసుకు రావాలని కోరుతున్నట్లు భారత ప్రభుత్వానికి దౌత్య సందేశం పంపినట్లు విదేశాంగ సలహాదారు తౌహిద్ హుస్సేన్ తెలిపారు. విదేశాంగ శాఖే కాకుండా బంగ్లాదేశ్ హోంశాఖ కూడా హసీనాను తిరిగి రప్పించుకునేందుకు అనేక ఏర్పాట్లు చేపట్టింది. ఈక్రమంలోనే అవసరమైన చర్యలు తీసుకోవాలంటూ విదేశాంగ శాఖకు లేఖ రాసిందని.. ఆ ప్రక్రియ కొనసాగుతోందని హోంశాఖ సలహాదారు జహంగీర్ ఆలమ్ వెల్లడించారు.

2013 నాటి ఖైదీల మార్పిడి ఒప్పందం ప్రకారం ఇదంతా జరుగుతున్నట్లు స్పష్టం చేశారు. కానీ షేక్ హసీనా భారత్‌లో రాజకీయ ఖైదీ కాదు. అలాగే ఆమె నిర్బంధించబడలేదు అరెస్ట్ చేయబడలేదు. కాబట్టి ఈ ఒప్పందం నిబంధనలు వర్తించబడవు. ఇదంతా ఇలా ఉండగా... బంగ్లాదేశ్ తాత్కాలిక అధిపతి ముహమ్మద్ యూనస్ గత నెలలో హసీనాను భారతదేశం నుంచి అప్పగించాలని తమ ప్రభుత్వం అధికారికంగా కోరుతున్నట్లు వెల్లడిండారు. 100 రోజుల పాలనను పూర్తి చేసుకున్న ఆయన.. జాతీయ ప్రసంగంలో ఈ కామెంట్లు చేశారు.

బంగ్లాదేశ్‌లో చోటు చేసుకున్న ఆందోళనకర పరిస్థితుల కారణంగా.. 15 ఏళ్ల పాలనకు ముగింపు పలికి షేక్ హసీనా ఆగస్టు 5వ తేదీన ఆ దేశాన్ని వీడింది. నేరుగా భారత్ కు వచ్చి ఆమె ఆశ్రయం పొందుతోంది. జులై, ఆగస్టులో విద్యార్థుల ఆధ్వర్యంలో జరిగిన నిరసనల సందర్భంగా జరిగిన ప్రాణ నష్టానికి బాధ్యులను చేయడానికి ప్రభుత్వం కట్టుబడి ఉందని నోబెల్ గ్రహీత ముహమ్మద్ యూనస్ తెలిపారు. తాను ఇప్పటికే అంతర్జాతీయ క్రిమినల్ కోర్టు చీఫ్ ప్రాసిక్యూటర్ కరీం ఖాన్‌తో సమస్య గురించి చర్చించినట్లు వెల్లడించారు.

షేక్ హసీనా మొత్తం 51 కేసులను ఎదుర్కుంటుండగా.. వాటిలో 42 హత్య కేసులే. అయితే బంగ్లాదేశ్, భారతదేశం మధ్య ఉన్న అప్పగింత ఒప్పందం ప్రకారం.. షేక్ హసీనాను అప్పగించాల్సిన అవసరం లేదు. ఎందుకంటే అవి రాజకీయ నేరాలు కావు.. హత్య నేరాలు. దీని బట్టి చూస్తే భారత్ షేక్ హసీనాను అప్పగించకపోయే అవకాశాలే ఎక్కువగా ఉన్నట్లు తెలుస్తోంది. చూడాలి మరి ఏం జరగనుంది అనేది.