by Suryaa Desk | Tue, Dec 24, 2024, 08:47 PM

టీమిండియా మాజీ క్రికెటర్ వినోద్ కాంబ్లీ ఆరోగ్యం మరోసారి విషమించింది. గత కొద్ది రోజులుగా తీవ్ర అనారోగ్య సమస్యలతో బాధపడుతున్న ఆయనను శనివారం రాత్రి కుటుంబ సభ్యులు.. మహారాష్ట్ర థానేలోని ప్రైవేటు ఆసుపత్రిలో చేర్పించారు. అయితే ఆయన మెదడులో రక్తం గడ్డ కడుతున్నట్లు వైద్య పరీక్షల్లో తేలిందని.. డాక్టర్లు వెల్లడించారు. దీంతో ఐసీయూలో ఆయనను ఉంచి చికిత్స అందిస్తున్నారు. అయితే శనివారం రాత్రితో పోలిస్తే.. ప్రస్తుతం వినోద్ కాంబ్లీ.. ఆరోగ్య పరిస్థితి నిలకడగా ఉంది.

ప్రాణాపాయం నుంచి బయటపడ్డ కాంబ్లీని.. అతడి స్నేహితుడు మార్కస్ కౌటో ఆసుపత్రిలో పరామర్శించారు. అనంతరం మాట్లాడిన ఆయన.. మూత్రనాళ ఇన్ఫెక్షన్‌ సమస్యలతో కాంబ్లీని ఆస్పత్రిలో చేర్పించినట్లు చెప్పారు. ఆ తర్వాత చేసిన పరీక్షల్లో అతడి మెదడు రక్తనాళాల్లో రక్తం గడ్డ కడుతున్నట్లు తేలిందన్నారు. ప్రస్తుతం కాంబ్లీ ఆరోగ్యం నిలకడగా ఉందని.. ఆసుపత్రికి ఖర్చులు చెల్లించేందుకు అతడి సహచర క్రికెటర్లు ముందుకొస్తున్నారని చెప్పారు. దీంతో పూర్తిగా కోలుకునే వరకు ఆస్పత్రిలోనే ఉంచి చికిత్స అందించే అవకాశం ఉందన్నారు.

నేను బాగానే ఉన్నా: వినోద్ కాంబ్లీ

శనివారం ఆస్పత్రిలో చేరిన వినోద్ కాంబ్లీ ఆస్పత్రి బెడ్‌పై నుంచే మాట్లాడారు. డాక్టర్ వల్లే.. ఈ రోజు ప్రాణాలతో ఉన్నానని చెప్పారు. ఆయనేం అడిగినా.. చేసేందుకు సిద్ధంగా ఉన్నట్లు పేర్కొన్నారు. ఇకపై తనను తాను మార్చుకుంటానని వెల్లడించారు. సచిన్ టెండూల్కర్ ఆశీర్వాదాలు తనకు ఎప్పుడూ ఉంటాయని.. అతడికి ఎంతో రుణపడి ఉంటానని పేర్కొన్నారు.

కాగా ఇటీవల వినోద్ కాంబ్లీ.. తన చిన్ననాటి స్నేహితుడు సచిన్ టెండూల్కర్‌ను కలుసుకున్నాడు. తమ కోచ్ రమాకాంత్ అచ్రేకర్ మెమోరియల్‌ కార్యక్రమంలో.. వీరిద్దరూ కలిసి పాల్గొన్నారు. ఈ ఈవెంట్‌లో కాంబ్లీ వీల్‌చైర్‌లో కనిపించాడు. దీంతో అభిమానులు, సహచర ఆటగాళ్లు ఆందోళనకు గురయ్యారు. కానీ ఈసారి ఆయనకు ఆర్థిక సాయం చేసేందుకు 1983 క్రికెట్ ప్రపంచ కప్ జట్టు సభ్యులు ముందుకు వచ్చారు.

కాగా 1990ల్లో అంతర్జాతీయ క్రికెట్‌లో ఓ వెలుగు వెలిగిన కాంబ్లీ మేటి ఆటగాడిగా గుర్తింపు పొందాడు. సచిన్ కంటే ప్రతిభావంతమైన ఆటగాడిగా గుర్తింపు పొందిన కాంబ్లీ కెరీర్.. ఆ తర్వాత గాడి తప్పంది. మద్యానికి బానిసవ్వడం వల్లే కాంబ్లీ పతనమయ్యాడనే అభిప్రాయాలు ఉన్నాయి. 2012లో వినోద్ కాంబ్లీ ఆరోగ్యం బాగా క్షీణించింది. 2013లో గుండెపోటుకు గురికాగా.. వైద్యులు సర్జరీ చేశారు. భారత్ తరపున వినోద్ కాంబ్లీ 17 టెస్టులు, 104 వన్డేలు ఆడాడు. 6 సెంచరీలతో వరుసగా 1084, 2477 రన్స్ స్కోరు చేశాడు.