by Suryaa Desk | Fri, Jan 24, 2025, 09:03 PM

ఉత్తర్‌ప్రదేశ్‌లో మహా కుంభమేళా ఘనంగా జరుగుతోంది. ప్రపంచ వ్యాప్తంగా ఉన్న సాధువులతోపాటు దేశవ్యాప్తంగా ఉన్న కోట్లాది మంది భక్తులతో ప్రయాగ్‌రాజ్ త్రివేణి సంగమం కిక్కిరిసిపోతోంది. ఇప్పటికే 10 కోట్ల మందికి పైగా భక్తులు.. గంగా, యమునా, సరస్వతి సంగమంలో పుణ్యస్నానాలు ఆచరించారు. జనవరి 13వ తేదీన ప్రారంభం అయిన ఈ మహా కుంభమేళా.. వచ్చే నెల 26వ తేదీతో ముగియనుంది. అయితే ఈ 45 రోజుల్లో దాదాపు 40 కోట్ల మంది భక్తులు హాజరవుతారని ఉత్తర్‌ప్రదేశ్ ప్రభుత్వం భావిస్తోంది. ఇక ఈ 45 రోజుల్లో నిర్వహించే 6 రాజ స్నానాలు అత్యంత ముఖ్యమైనవి. ఇందులో ఈనెల 29వ తేదీన మౌనీ అమావాస్య సందర్భంగా జరిగే పుణ్య స్నానం రోజున ఏకంగా 10 కోట్ల మంది భక్తులు వస్తారని యూపీ సర్కార్ అంచనాలు వేస్తోంది. ఇందుకు సంబంధించి ఇప్పటికే ఏర్పాట్లు చేసింది.

అయితే మౌనీ అమావాస్య సందర్భంగా ఈనెల 29వ తేదీన ప్రయాగ్‌రాజ్‌లోని మహా కుంభ్ నగర్‌లో వీఐపీ జోన్ ఉండదని ఉత్తర్‌ప్రదేశ్ అధికారులు స్పష్టం చేశారు. ఆ రోజున ఎంత పెద్ద వీఐపీలు అయినా ఆ రోజు వీఐపీ ట్రీట్‌మెంట్ ఉండదని స్పష్టం చేశారు. మౌనీ అమావాస్య రోజున వీఐపీ జోన్ ఉండదని.. ప్రముఖులకు ప్రత్యేక ఏర్పాట్లు ఏమీ లేవని యూపీ ప్రభుత్వం స్పష్టం చేసింది. ఆ రోజున ప్రయాగ్‌రాజ్‌లోకి వాహనాలను అనుమతించమని వెల్లడించింది. ప్రజల భద్రత దృష్ట్యా ఈ చర్యలు తీసుకుంటున్నట్లు అధికారులు తేల్చి చెప్పారు.

 ఇక మౌనీ అమావాస్య ఒక్కరోజే దాదాపు 8 నుంచి 10 కోట్ల మంది భక్తులు పుణ్యస్నానాలు(అమృత స్నానం) ఆచరించే అవకాశం ఉంది. ఇందుకోసం 12 కిలోమీటర్ల పొడవైన ఘాట్‌ను ఏర్పాట్లు చేసినట్లు యూపీ అధికారులు తెలిపారు. ట్రాఫిక్‌ను, భక్తుల రద్దీని నియంత్రించేందుకు ప్రత్యేకంగా సిబ్బందిని మోహరించినట్లు చెప్పారు. 144 ఏళ్ల తర్వాత గ్రహాల అరుదైన కలయిక ఏర్పడనున్న వేళ.. మహా కుంభమేళాలో భారీగా భక్తుల రద్దీ ఉంటుందని అధికారులు వెల్లడించారు.

దీన్ని దృష్టిలో ఉంచుకుని అఖిల భారతీయ అఖాడా పరిషద్‌.. సాధువులకు ప్రత్యేకంగా సూచనలు చేసింది. ఆ రోజున అమృత్‌ స్నాన్‌కు తరలిరానున్న 13 లక్షల సాధువులు.. భక్తులకు అసౌకర్యం కలిగించకుండా తమకు కేటాయించిన సమయంలోనే త్రివేణి సంగమంలో స్నానాలు చేయాలని తెలిపింది. జనవరి 29వ తేదీన మౌని అమావాస్య.. ఆ తర్వాత ఫిబ్రవరి 3వ తేదీన వసంత పంచమి, ఫిబ్రవరి 12వ తేదీన మాఘ పూర్ణిమ, ఫిబ్రవరి 26వ తేదీన మహా శివరాత్రి పర్వదినాల్లో భక్తులు అమృత స్నానాలు చేయనున్నారు.