by Suryaa Desk | Sat, Jan 25, 2025, 09:03 PM

దేశంలోని వివిధ ప్రాంతాలలో నడుస్తున్న ఇతర 136 వందే భారత్ ఎక్స్‌ప్రెస్ రైళ్లతో పోలిస్తే.. కశ్మీర్‌ లోయలోని అతి శీతల వాతావరణ పరిస్థితులను తట్టుకునేలా ఈ వందే భారత్‌ రైలును రూపొందించారు. నీరు గడ్డ కట్టకుండా ఉండేలా అత్యాధునిక హీటింగ్‌ వ్యవస్థలను ఈ రైలులో ఏర్పాటు చేశారు. అయితే ఈ సెమీ హైస్పీడ్ వందేభారత్ రైలు ట్రయల్ రన్‌ను భారత రైల్వే శాఖ శనివారం రోజు ప్రారంభించింది. కాత్రాలోని శ్రీ మాతా వైష్ణోదేవి రైల్వే స్టేషన్‌ నుంచి శ్రీనగర్‌ వరకు ఈ వందే భారత్‌ రైలు ప్రయాణించింది. మార్గ మధ్యంలో చీనాబ్‌ నదిపై నిర్మించిన భారీ వంతెన మీదుగా వందే భారత్ రైలు పరుగులు పెడుతున్న దృశ్యాలు ఆకట్టుకుంటున్నాయి.

ముఖ్యంగా కశ్మీర్‌ను భారత్‌లోని ఇతర ప్రాంతాలతో అనుసంధానం చేసేందుకు చేపట్టిన ఉధంపూర్-శ్రీనగర్-బారాముల్లా రైల్వే ప్రాజెక్టుల్లో భాగంగానే ఈ చీనాబ్ వంతెనను నిర్మించారు. నదీ గర్భం నుంచి 359 మీటర్ల ఎత్తులో ఈ బ్రిడ్జిను కట్టారు. అయితే ఈ వంతెన పొడవు మొత్తం 1315 మీటర్లు. తాజాగా వచ్చిన వీడియోలు చూసిన నెటిజెన్లు.. ఇంత ఎత్తయిన బ్రిడ్జిపై అదికూడా వేగంగా వెళ్లే రైల్లో వెళ్లాలని కోరుకుంటున్నారు. అద్భుతమైన ప్రకృతిని ఎంజాయ్ చేయాలనుకునే ప్రతీ ఒక్కరూ.. జీవితంలో ఒక్కసారైనా ఈ మార్గంలో ప్రయాణించాలంటూ కామెంట్లు చేస్తున్నారు. ముఖ్యంగా ప్రపంచంలోనే అత్యంత ఎత్తైన ఈ రైల్వే వంతెనను చాడాలని చెబుతున్నారు.

గతంలో చైనాలోని బెయిపాన్ 275 మీటర్ల పొడవుతో షుబాయ్ రైల్వే వంతెన నిర్మించారు. ఇదే అత్యంత ఎత్తైన రైల్వే వంతెనగా ప్రపంచ రికార్డును కల్గి ఉండేది. కానీ జమ్ము కశ్మీర్‌లో నిర్మించిన ఈ చీనాబ్ రైల్వే బ్రిడ్జి మరింత ఎత్తుతో ఉండగా.. ఆ రికార్డును బద్ధలు కొట్టింది. అంతేకాదండోయ్.. ఈ చీనాబ్ వంతెన ఎత్తు... పారిస్‌లోని ఐఫిల్ టవర్ కంటే మరింత ఎత్తులో ఉంటుంది. దాదాపు 30 మీటర్లు మరింత పొడవుగా ఉండడం గమనార్హం.