by Suryaa Desk | Tue, Mar 25, 2025, 06:19 PM

మాజీ ప్రపంచ ఛాంపియన్ బాక్సర్ సావిటీ బూరా తన భర్త, ప్రముఖ కబడ్డీ ఆటగాడు దీపక్ నివాస్ హూడాపై దాడి చేశారు. విడాకులు తీసుకోబోతున్న ఈ జంట.. పోలీస్ స్టేషన్‌లో అనేక విషయాల గురించి మాట్లాడుకుంటున్నారు. అయితే భర్తపై విపరీతమైన కోపం రాగా వెంటనే వెళ్లి అతడి కాలర్ పట్టుకున్నారు. ఆపై అతడి ముఖంపైనే పిడి గుద్దులు గుద్దారు. ప్రస్తుతం ఇందుకు సంబంధించిన వీడియో నెట్టింట వైరల్ అవుతుండగా.. అంతా తీవ్ర విమర్శలు చేస్తున్నారు. పోలీసుల ముందే ఆమె అతడిపై తన బాక్సింగ్ ప్రతిభను ప్రదర్శించిందంటే.. రోజూ ఇంకెలా హింస పెట్టిందో అంటూ కామెంట్లు చేస్తున్నారు. ఆ పూర్తి వివరాలు మీకోసం.

ప్రస్తుతం 32 ఏళ్ల వయసు కల్గిన మాజీ ప్రపంచ బాక్సింగ్ ఛాంపియన్ సావిటీ బూరా.. ప్రముఖ కబడ్డీ ఆటగాడు దీపక్ నివాస్ హుడాను 2022 జులై 7వ తేదీన వివాహం చేసుకున్నారు. రెండేళ్ల పాటు బాగానే సాగిన వీరి కాపురంలో గొడవలు ప్రారంభం కాగా విడాకులు తీసుకోవాలనుకున్నారు. ఈ మేరకే కోర్టులో పిటిషన్ కూడా దాఖలు చేశారు. కానీ వారి రెండు కుటుంబాల మధ్య చాలా విషయాలు సెటిల్ చేసుకోవాల్సి ఉండగా.. పోలీస్ స్టేషన్‌లోనే సమావేశం పెట్టుకున్నారు. మార్చి 15వ తేదీన సావిటీ బూరా, దీపక్ నివాస్ హుడా సహా ఇరు కుటుంబాల పెద్దలు హర్యానా హిసార్‌లోని పోలీస్ స్టేషన్‌కు వచ్చారు.

ఈక్రమంలోనే అంతా కూర్చుని తమ సమస్యల గురించి మాట్లాడుకుంటున్నారు. అయితే ఆ సమయంలో దేని గురించి వారు మాట్లాడుకున్నారో తెలియదు కానీ తీవ్ర ఆగ్రహానికి గురైన బాక్సర్ బూరా మాత్రం ఒక్కసారిగా లేచి భర్తపై దాడికి పాల్పడింది. ఒ చేత అతడి కాలర్ పట్టుకుని.. మరో చేత్తో ముఖంపై పంచులు వేస్తూనే ఉంది. దీంతో దీపక్ నివాస్ విపరీతంగా భయపడి వదిలించుకునే ప్రయత్నం చేశాడు. మరోవైపు విషయం గుర్తించిన కుటుంబ సభ్యులు ఆమెను ఆపే ప్రయత్నం చేశారు. అతడిని అంతా వెనక్కి నెట్టేసి.. ఆమెను సముదాయించే ప్రయత్నం చేశారు. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది.

ఇది చూసిన ప్రతీ ఒక్కరూ ఒక్కో విధంగా స్పిందిస్తున్నారు. తన బాక్సింగ్ ప్రతిభను భర్తపై చూపించండ ఏంటని కొందరు.. పోలీస్ స్టేషన్‌లోనే ఇలా దాడి చేసిందంటే ఇంట్లో ఇంకెంత నరకం చూపించి ఉంటుందో చెప్పాల్సిన అవసరం లేదంటూ కామెంట్లు చేస్తున్నారు. ఒకవేళ భర్తే ఆమెపై దాడి చేసుంటే.. అక్కుడున్న వారంతా అతడిని కొట్టేవారంటూ వివరిస్తున్నారు. మగ వాళ్లకు ఏమాత్రం రక్షణ లేకుండా పోతుందంటూ చెబుతున్నారు. ఇదిలా ఉండగా.. సావిటీ బూరాపై విడాకుల కోసం భర్త నుంచి కోటి రూపాయల భరణం డిమాండ్ చేస్తున్నట్లు ఆరోపణలు ఉన్నాయి.