by Suryaa Desk | Wed, Mar 26, 2025, 08:00 PM

టెక్నాలజీ పెరుగుతున్నకొద్దీ సైబర్ నేరగాళ్లు కొత్త కొత్త మోసాలకు తెరలేపుతున్నారు. అవకాశమున్న ప్రతీ మార్గంలో అమాయకులైన ప్రజలను మోసం చేస్తూనే ఉన్నారు. ఇప్పటివరకు క్రెడిట్ కార్డు, డెబిట్ కార్డుల పేరుతోనే కాదు ఆధార్ కార్డు, పాన్ కార్డు అప్డేట్ల పేరుతో.. మెస్సేజులు పంపిస్తూ ఓటీపీలు అడుగుతూ, లింకులు షేర్ చేస్తూ ఖాతాలు ఖాళీ చేసేస్తున్నారు. కాగా.. ఇప్పుడు కరెంట్ బిల్లు పెండింగ్‌ పేరుతో కొత్త మోసానికి తెర లేపారు సైబర్ నేరగాళ్లు. కరెంట్ బిల్లు పెండింగ్ ఉందని ఫేక్ మెసేజ్‌లు పంపించి.. అందులో ఉన్న లింక్ క్లిక్ చేయిస్తే ఖాతాలు ఖాళీ చేస్తున్న మోసం తాజాగా వెలుగు చూసింది.

మీ ఫోన్‌కు "మీ కరెంట్ బిల్లు పెండింగ్‌లో ఉంది, తక్షణమే చెల్లించండి, లేదంటే కరెంట్ కట్ అవుతుంది" అంటూ మెసేజ్ వస్తోంది. మెసేజ్‌లో ఉన్న లింక్‌ను ఓపెన్ చేసి.. వెంటనే బిల్లు చెల్లించాలని సూచిస్తున్నారు. ఆ లింక్ ఓపెన్ చేయగానే బ్యాంక్ అకౌంట్‌కు సంబంధించిన డేటాను హ్యాకర్లు దొంగిలించి.. క్షణాల్లోనే ఖాతాలో ఉన్న మొత్తం డబ్బు మాయం అవుతోంది.

మహారాష్ట్ర, బీహార్ నుంచి కరెంట్ బిల్లు పెండింగ్ పేరుతో సైబర్ నేరగాళ్లు మోసాలకు పాల్పడుతున్నట్లు పోలీసులు గుర్తించారు. 89679 54941 నెంబర్‌ నుంచి వినియోగదారులకు మెసేజ్‌లు వస్తున్నాయని.. ఈ నెంబర్ నుంచి వచ్చిన లింక్‎లను ఓపెన్ చేయొద్దని సూచిస్తున్నారు. ఇలాంటి మెసేజ్‌లపై అప్రమత్తంగా ఉండాలని.. వెంటనే 1930కి కాల్‌ చేసి ఫిర్యాదు చేయాలని పోలీసులు చెప్తున్నారు. ఈ కొత్త తరహా సైబర్ మోసంపై ప్రజలు అప్రమత్తంగా ఉండటం చాలా అవసరం. కరెంట్ బిల్లు పెండింగ్ పేరిట తప్పుడు మెసేజ్‌లు పంపించి, లింక్‌ క్లిక్ చేయిస్తే బ్యాంక్ ఖాతాల్లోని డబ్బును లూటీ చేయడం అత్యంత ప్రమాదకరం.

సైబర్ మోసాల నుంచి ఎలా రక్షించుకోవాలి?

అధికారిక వెబ్‌సైట్‌లోనే బిల్లు చెల్లించండి – ఎప్పుడూ మీ డిస్కమ్ (DISCOM) అధికారిక వెబ్‌సైట్ లేదా యాప్‌ను ఉపయోగించండి.

అనుమానాస్పద లింక్‌లను క్లిక్ చేయవద్దు – కరెంట్ బిల్లు పేరిట వచ్చే మెసేజ్‌లు నిజమైనవో కాదో నిర్ధారించుకోండి.

అధికారుల్ని సంప్రదించండి – మీ విద్యుత్ సరఫరాదారుని అధికారిక టోల్-ఫ్రీ నెంబర్‌ ద్వారా సంప్రదించండి.

సైబర్ క్రైమ్ హెల్ప్‌లైన్ 1930 – మోసానికి గురైతే వెంటనే 1930 నంబర్‌కు కాల్ చేసి ఫిర్యాదు చేయండి.

నకిలీ నంబర్ల జాబితాను తెలుసుకోండి – 89679 54941 వంటి నంబర్ల నుంచి వచ్చే మెసేజ్‌లు తప్పుడు కావచ్చు, అందువల్ల అలాంటి వాటికి స్పందించొద్దు.

ఈ వివరాలను మీ కుటుంబ సభ్యులు, స్నేహితులతో పంచుకోండి. మరింత మంది మోసానికి గురికాకుండా ఉండటానికి ఇది ఉపయోగపడుతుంది.