by Suryaa Desk | Fri, Mar 28, 2025, 08:01 PM

బ్రిటన్ రాజు కింగ్ చార్లెస్ 3 మరోసారి ఆస్పత్రి పాలయ్యారు. గతంలో క్యాన్సర్ బారిన పడి చికిత్స పొందిన ఈయన కోలుకున్న విషయం అందరికీ తెలిసిందే. అయితే ఈ చికిత్స వల్లే కొన్ని సైడ్ ఎఫెక్స్ట్ రాగా.. ప్రస్తుతం ఆయన్ను ఆస్పత్రిలో చేర్చినట్లు బకింగ్ హామ్ ప్యాలెస్ ప్రకటించింది. ప్రస్తుతం లండన్‌లోని ఓ ఆస్పత్రిలో చికిత్స పొందుతున్న ఆయన పరిస్థితి బాగానే ఉందని వివరించింది. అయితే వైద్యుల సూచన మేరకు గురు, శుక్ర వారాల్లో జరగాల్సిన అధికారిక కార్యక్రమాలను రద్దు చేసినట్లు స్పష్టం చేసింది. ఆ పూర్తి వివరాలు మీకోసం.

ప్రస్తుతం 76 ఏళ్ల వయసు కల్గిన బ్రిటన్ రాజు కింగ్ చార్లెస్.. క్యాన్సర్ బారిన పడినట్లు 2024 ఫిబ్రవరిలో నిర్ధారణ అయింది. అయితే ప్రొస్టేట్‌కు చికిత్స కోసం పలు వైద్య పరీక్షలు చేయగా.. ఈ వ్యాధి బయట పడింది. దీంతో ఆయన అప్పటి నుంచి క్యాన్సర్ గురించి చికిత్స తీసుకుంటున్నారు. కానీ రాజుకు వచ్చింది ఏ రకమైన క్యాన్సర్ అనేది మాత్రం అధికారికంగా వెల్లడించలేదు. అయితే ఇటీవలే బెంగళూరుకు వచ్చి కూడా ఆయన క్యాన్సర్ చికిత్స పొందగా.. కోలుకున్నట్లు వార్తలు వచ్చాయి.

తనకు క్యాన్సర్ సోకిందని అందరికీ తెలిస్తే.. ప్రజలు కూడా వారికి వచ్చిన వ్యాధుల గురించి భయపడరంటూ కింగ్ చార్లెస్ గతంలో తెలిపారు. ఎప్పుడూ ఆరోగ్యంగా కనిపించే ఆయన.. క్యాన్సర్ సోకినా ఏమాత్రం కుంగిపోకుండా తన పని తాను చేసుకున్నారు. మరింత బిజీ అవుతూ ప్రజలను కలవడం, పనులు చేసుకోవడం వంటివి చేశారు. అయితే క్యాన్సర్ చికిత్స తీసుకోవడం వల్ల ప్రస్తుతం కొన్ని సైడ్ ఎఫెక్స్ట్ వచ్చాయని.. దీని కారణంగానే మార్చి 27వ తేదీ గురువారం రోజు ఆయన ఆస్పత్రిలో చేరారని తెలుస్తోంది. ప్రస్తుతం చికిత్స పొందుతున్న ఆయన ఆరోగ్య పరిస్థితి నిలకడగానే ఉండగా.. వైద్యులు మాత్రం 2 రోజులు ఆస్పత్రిలోనే ఉండాలని సూచించారట.

ఈక్రమంలోనే కింగ్ చార్లెస్ హాజరు కావాల్సిన అనేక సమావేశాలు, అధికారిక కార్యక్రమాలను రద్దు చేస్తున్నట్లు బకింగ్ హామ్ ప్యాలెస్ ప్రకటించింది. అనుకోకుండా అనారోగ్యానికి గురై.. పలు కార్యక్రమాలకు హాజరు కాకుండా ప్రజలను అసౌకర్యానికి గురి చేస్తున్నందుకు రాజు క్షమాపణలు చెబుతున్నట్లు ప్రకటనలో పేర్కొంది. అయితే కింగ్ చార్లెస్‌తో పాటు ఆస్పత్రికి క్వీన్ కెమిల్లా రాలేరు. గురువారం రోజు ఆమె ఉత్తర లండన్‌లోని వెంబ్లీలో జరిగిన ఓ రిసెప్షన్‌కు హాజరు అయినట్లు తెలుస్తోంది.