by Suryaa Desk | Fri, Mar 28, 2025, 10:02 PM

ఐపీఎల్ 2025లో ధోనీ కుర్రోడిలా మారుతున్నాడు. 43 ఏళ్ల వయస్సులోనూ ఇరవై ఏళ్ల కిందట ఎలా స్టంపింగ్ చేశాడో ఇప్పటికీ అదే మెరుపు వేగంతో వికెట్ల వెనుక కీపింగ్ చేస్తున్నాడు. చెన్నై చెపాక్ స్టేడియం వేదికగా రాయల్ ఛాలెంజర్స్ బెంగళూరుతో జరుగుతున్న మ్యాచ్‌లో ఫ్రాక్షన్ ఆఫ్ సెకన్స్‌లో ఫ్లాష్ స్టంపింగ్‌తో అందర్నీ స్టన్ చేసేశాడు.

సీఎస్కే-ఆర్సీబీ మధ్య జరుగుతున్న మ్యాచ్‌లో టాస్ గెలిచిన రుతురాజ్ గైక్వాడ్ బెంగళూరును బ్యాటింగ్‌కు ఆహ్వానించాడు. ఫిల్ సాల్ట్, రన్ మెషీన్ విరాట్ కోహ్లి ఓపెనింగ్ పెయిర్ గ్రౌండ్‌లోకి అడుగుపెట్టారు. తొలి ఓవర్ నుంచి ఫిల్ సాల్ట్ దూకుడుగా ఆడుతూ చెన్నై బౌలర్లను ఆడుకున్నాడు. మరో ఎండ్‌లో ఉన్న విరాట్ కోహ్లి కనీసం బాల్ కూడా టచ్ చేయడానికి ఇబ్బంది పడ్డాడు.

మ్యాచ్ ఐదో ఓవర్‌లో బౌలింగ్‌కి వచ్చిన నూర్ అహ్మద్ తన స్పిన్‌తో ఆర్సీబీ ఓపెనర్లను ఇబ్బంది పెట్టాడు. ఓవర్ చివరి బంతికి స్ట్రయికింగ్‌లో ఉన్న ఫిల్ సాల్ట్ బౌండరీ బాదేందుకు ప్రయత్నించాడు. అయితే క్రీజులో ఉండే కాలు కొంచెం ముందుకు జరిపి షాట్ ఆడే ప్రయత్నం చేశాడు. వికెట్ల వెనుక ఉన్న ఎంఎస్ ధోనీ మెరుపు వేగంతో స్టంపింగ్ చేశాడు. క్రీజులోనే ఉండటంతో అందరూ నాటౌట్ అనుకున్నారు. అయితే కాలు గాల్లోకి లేచే సమయంలో ధోనీ వికెట్లకు బంతిని తాకించాడు. దాంతో 16 బంతుల్లో ఐదు ఫోర్లు, ఒక సిక్సర్‌తో 32 పరుగులు చేసిన ఫిల్ సాల్ట్ స్టంప్ అవుట్‌గా వెనుదిరిగాడు.

ఈ సీజన్‌లో చెన్నై తాను ఆడిన తొలి మ్యాచ్‌లో కూడా ఎంఎస్ ధోనీ ఇలాంటి స్టంప్ అవుటే ఒకటి చేశాడు. నూర్ అహ్మద్ బౌలింగ్‌లో ముందుకు వచ్చి షాట్ కొట్టేందుకు ప్రయత్నించిన సూర్యకుమార్ యాదవ్‌ని స్టంపింగ్ చేశాడు. దాంతో వరుసగా రెండు మ్యాచ్‌లలోనూ ధోనీ ఫ్రాక్షన్ ఆఫ్ సెకన్స్‌లో బ్యాటర్లను పెవిలియన్‌కు పంపి తనలో ఇంకా సత్తా ఉందని మరోసారి నిరూపించాడు. ధోనీ ఈ వయస్సులో కూడా ఇలా చురుకుగా స్టంప్ అవుట్‌లు చేస్తుండటంతో గ్రౌండ్‌లో అభిమానులు తలా తలా అంటూ నినాదాలు పలికించారు.