by Suryaa Desk | Sat, Mar 29, 2025, 11:09 PM

ఐపీఎల్ 2025లో జరుగుతున్న 9వ మ్యాచ్‌లో గుజరాత్ టైటాన్స్ జట్టు ముంబైకి భారీ టార్గెట్ ఫిక్స్ చేసింది. టాస్ ఓడి బ్యాటింగ్‌కు దిగిన శుభ్‌మన్ గిల్ సారథ్యంలోని గుజరాత్ టైటాన్స్ జట్టు.. నిర్ణీత 20 ఓవర్లలో 196/8 పరుగులు చేసింది. ఆ జట్టు బ్యాటర్లలో సాయి సుదర్శన్‌ (63) టాప్ స్కోరర్‌గా నిలిచాడు. ముంబై బౌలర్లలో కెప్టెన్ హార్దిక్ పాండ్యా అత్యధికంగా రెండు వికెట్లు తీశాడు.

టాస్ ఓడి బ్యాటింగ్‌కు దిగిన గుజరాత్ టైటాన్స్‌కు ఓపెనర్లు అదిరే ఆరంభం ఇచ్చారు. సాయి సుదర్శన్‌తో పాటు.. కెప్టెన్ శుభ్‌మన్ గిల్ (27 బంతుల్లో 38 రన్స్‌) రాణించారు. దీంతో 8.2 ఓవర్లలో ఆ జట్టు.. 78/0 తో నిలిచింది. గిల్ ఔట్ అయ్యాక వచ్చిన జోస్ బట్లర్‌ మరింత వేగంగా ఆడాడు. దీంతో స్కోరు బోర్డు పరుగులు పెట్టింది. ఓ దశలో 129/1తో నిలిచి భారీ స్కోరు సాధించేలా కనిపించింది. కానీ వీరిద్దరూ ఔట్ కావడంతో స్కోరు బోర్డు నెమ్మదించింది.

షారుఖ్ ఖాన్ (9), రషీద్ ఖాన్ (6), రూథర్‌ఫోర్డ్‌ (18) విఫలమయ్యారు. హిట్టర్‌ రాహుల్ తెవాటియా (0) ఒక్క బంతి కూడా ఎదుర్కోకుండానే రనౌట్‌ అయ్యాడు. దీంతో గుజరాత్ టైటాన్స్.. 200 పరుగుల కంటే తక్కువ స్కోరుకే పరిమితమైంది. 8 వికెట్ల నష్టానికి 196 రన్స్ స్కోరు చేసింది. ముంబై బౌలర్లలో హార్దిక్ పాండ్యా అత్యధికంగా రెండు వికెట్లు తీశాడు. ట్రెంట్ బౌల్ట్‌ 1, దీపక్ చాహర్ 1, ముజీబ్ ఉర్ రెహ్మాన్ 1, సత్యనారాయణ రాజు 1 వికెట్ తీశారు.

ఇక ఇప్పటివరకు ఇండియన్ ప్రీమియర్ లీగ్‌లో గుజరాత్ టైటాన్స్, ముంబై ఇండియన్స్ జట్ల మధ్య 5 మ్యాచ్‌లు జరిగాయి. అందులో గుజరాత్‌దే పైచేయిగా ఉంది. ఐదింట్లో గుజరాత్ మూడు మ్యాచ్‌లలో గెలవగా.. ముంబై ఇండియన్స్ టీమ్.. రెండింట్లో విజయం సాధించింది. ఈ రెండు జట్ల మధ్య చివరగా ఐపీఎల్ 2024లో జరిగిన మ్యాచ్‌లో గుజరాత్‌ ఆరు రన్స్‌ తేడాతో గెలుపొందింది. ఈ మ్యాచ్ గుజరాత్‌లోని అహ్మదాబాద్ వేదికగా జరుగుతోంది. ఈ వేదికగా 17 మ్యాచ్‌లు ఆడిన హోమ్‌ టీమ్.. అందులో తొమ్మిది మ్యాచ్‌లలో గెలిచి.. 8 మ్యాచ్‌లలో ఓడిపోయింది.