by Suryaa Desk | Sat, Mar 29, 2025, 11:24 PM

జుట్టు ప్రతి ఒక్కరి అందంలో కీలక పాత్ర పోషిస్తుంది. అందుకే చాలా మంది జుట్టుపై ప్రత్యేక శ్రద్ధ తీసుకుంటారు. అయితే, దుమ్ము, కాలుష్యం కారణంగా జుట్టు పొడిగా, నిర్జీవంగా మారుతుంది. దీంతో, తెల్ల జుట్టు, తలపై వెంట్రుకలు రాలిపోవడం వంటి అనేక సమస్యలు ఎదుర్కొంటున్నారు. ఉరుకుల పరుగుల జీవితం, పొల్యూషన్, మనం తినే ఆహారం కారణగా చిన్న వయసులోనే చాలా మంది జుట్టు సమస్యలతో సతమతమవుతున్నారు. ముఖ్యంగా జుట్టు రాలిపోయే సమస్య ఎక్కువగా ఉంటుంది.

జుట్టు రాలడం వల్ల అందాన్ని ప్రభావితమే చేయడమే కాకుండా ఆత్మవిశ్వాసాన్ని కూడా బలహీనపరుస్తుంది. ఇక, మార్కెట్లో అనేక రసాయన ఆధారిత ఉత్పత్తులు అందుబాటులో ఉన్నాయి. కానీ వాటి వాడకం వల్ల మేలు జరగకపోగా.. జుట్టు సమస్యలు ఇంకా ఎక్కువవుతున్నాయి. అయితే, కొన్ని సహజ పద్ధతులతో జుట్టు రాలడాన్ని తగ్గించుకోవచ్చు. ఇక, వంటల్లో ఎక్కువగా ఉపయోగించే బంగాళదుంప కూడా ప్రభావవంతంగా పనిచేస్తుంది. బంగాళదుంప రసంతో జుట్టు రాలడాన్ని తగ్గించుకోవచ్చు. బంగాళదుంప రసాన్ని ఎలా తగ్గించుకోవచ్చో తెలుసుకుందాం.

బంగాళదుంప రసంతో జుట్టుకు మేలు

బంగాళాదుంప రసం జుట్టుకు అద్భుతంగా పనిచేస్తుంది. ఎందుకంటే దీనిలో ఉండే విటమిన్లు A, B, C , యాంటీఆక్సిడెంట్లు జుట్టు పెరుగుదలను ప్రోత్సహిస్తాయి. ఈ పోషకాలు జుట్టును బలంగా మారుస్తాయి. బంగాళదుంప రసం జుట్టుకు సహజమైన మెరుపును ఇస్తుంది. జుట్టును మృదువుగా, ఆరోగ్యంగా చేస్తుంది. బంగాళదుంప రసం జుట్టుకు కుదుళ్లకు పోషణ అందిస్తుంది. ఇలా జుట్టుకు మేలు చేసే బంగాళదుంప రసాన్ని ఎలా ఉపయోగించాలో తెలుసుకుందాం.

బంగాళదుంప, కలబంద జెల్ మాస్క్

ఈ మాస్క్ కోసం ఒక పెద్ద బంగాళదుంప, రెండు చెంచాల కలబంద జెల్ అవసరం. ముందుగా బంగాళదుంప తొక్క తీసి దాన్ని రసాన్ని తీయండి. ఈ రసంలో కలబంద జెల్ కలపండి. ఈ మిశ్రమాన్ని బాగా కలిపి మందపాటి మిశ్రమాన్ని సిద్ధం చేయండి. ఈ పేస్టుని జుట్టు మూలాలకు బాగా అప్లై చేసి ముప్పై నిమిషాలు అలాగే ఉంచండి. ఆ తర్వాత గోరువెచ్చని నీటితో తలస్నానం చేయండి. వారానికి రెండు సార్లు ఇలా చేస్తే జుట్టు రాలడం తగ్గిపోతుందని నిపుణులు అంటున్నారు.

బంగాళదుంప, కొబ్బరినూనె మాస్క్

ఇందుకోసం ఒక పెద్ద బంగాళాదుంప, ఒక చెంచా కొబ్బరి నూనె తీసుకోండి. ఇప్పుడు బంగాళాదుంప రసాన్ని తీసి అందులో కొబ్బరి నూనె కలిపి జుట్టు మూలాల నుంచి చివరల వరకు అప్లై చేయండి. దీన్ని జుట్టు మీద 40 నిమిషాలు అలాగే ఉంచండి. బాగా ఆరిన తర్వాత గోరు వెచ్చని నీటితో తలస్నానం చేయండి. ఈ మాస్క్ జుట్టుకు కావాల్సినంత తేమను అందిస్తుంది. జుట్టు రాలడాన్ని తగ్గించి.. బలపరుస్తుంది.

బంగాళదుంప, తేనె మాస్క్

ఈ హెయిర్ మాస్క్ కోసం ఒక పెద్ద బంగాళదుంప, ఒక చెంచా తేనె తీసుకోండి. ఇప్పుడు బంగాళదుంప రసాన్ని తీసి అందులో తేనె బాగా కలపండి. ఈ మిశ్రమాన్ని జుట్టు మూలాలకు బాగా అప్లై చేయండి. ముప్పై నిమిషాలు పాటు అలాగే ఉంచి తర్వాత తేలికపాటి షాంపూతో తలస్నానం చేయండి. వారానికి రెండు సార్లు ఈ మాస్క్ అప్లై చేయడం వల్ల జుట్టు మృదువుగా, మెరిసేలా అవుతుంది. తేనె జుట్టులో తేమను నిలుపుతుంది. వాటిని సిల్కీగా మారుస్తుంది.

బంగాళదుంప, నిమ్మకాయ, పెరుగు హెయిర్ మాస్క్

ఈ హెయిర్ మాస్క్ కోసం ఒక పెద్ద బంగాళాదుంప, రెండు చెంచాల పెరుగు, ఒక చెంచా నిమ్మరసం తీసుకోండి. ఇప్పుడు బంగాళాదుంప రసం తీసి అందులో పెరుగు, నిమ్మరసం వేసి బాగా కలపండి. ఈ మిశ్రమాన్ని, జుట్టుకు బాగా అప్లై చేయండి. 20-30 నిమిషాల తర్వాత తలస్నానం చేయండి. ఈ మాస్క్ జుట్టుకు కొత్త జీవం పోస్తుంది. చుండ్రును తొలగిస్తుంది. అంతేకాకుండా జుట్టును మృదువుగా చేస్తుంది. బంగాళదుంప రసం జుట్టుకు మేలు చేస్తుంది. బంగాళదుంప రసంతో చేసిన హెయిర్ మాస్క్‌లు అప్లై చేయడం వల్ల జుట్టు రాలడం ఆగిపోతుంది.