by Suryaa Desk | Tue, Dec 09, 2025, 11:26 PM

కేంద్ర ప్రభుత్వ ఉద్యోగులు, పింఛనుదారులకు బిగ్ అలర్ట్. కొత్త సంవత్సరంలో ప్రారంభంలోనే వారికి నిరాశ ఎదురయ్యే అవకాశాలు కనిపిస్తున్నాయి. 2026 జనవరి 1 నుంచి అమలులోకి రానున్న డియర్‌నెస్ అలవెన్స్ (DA), డియర్‌నెస్ రిలీఫ్ (DR) పెంపు 2 శాతం మాత్రమే పెరిగే అవకాశం ఉంది. ప్రస్తుతం డీఏ 58 శాతం వద్ద ఉంది. వచ్చే జనవరిలం 2 శాతం పెంచినట్లయితే 60 శాతానికి చేరుకుంటుంది. ద్రవ్యోల్బణం ఒత్తిడి ఉన్నప్పటికీ గడిచిన ఏడేళ్ల కాలంలో చూసుకుంటే డీఏ పెంపు ఇదే అత్యంత స్వల్ప పెరుగుదల కానుండడం గమనార్హం.

కారణం ఏమిటి?

ఈసారి తక్కువ పెంపుదలకు ముఖ్య కారణం డీఏ లెక్కింపనకు కీలకంగా ఉండే అఖిల భారత వినియోగదారుల ధరల సూచిక (AICPI-IW). అక్టోబర్ 2025 వరకు విడుదలైన AICPI-IW డేటా, రాబోయే నవంబర్, డిసెంబర్ నెలల ట్రెండ్‌లను పరిశీలిస్తే జనవరి 2026 నుంచి డీఏ సుమారు 60.21 శాతం వరకు చేరే అవకాశం ఉంది. అయితే, డీఏని సమీప పూర్ణాంకానికి రౌండింగ్ చేయాలనే నియమం ఉన్న కారణంగా అది 60 శాతానికి పరిమితం కానుంది. దీంతో పెంపుదల కేవలం 2 శాతంగా ఉంటుందని అంచనా.

జనవరి 2026 డీఏ సవరణ కేవలం సాధారణ పెరుగుదల మాత్రమే కాదు. ఇది మూడు ముఖ్య కారణాల వల్ల ప్రాధాన్యత సంతరించుకుంది. 7వ వేతన కమిషన్ కాలం తర్వాత మొదటి డీఏ పెంపు. 7వ వేతన సంఘం 10 సంవత్సరాల కాలపరిమితి 2025 డిసెంబర్ 31న ముగుస్తుంది. దీంతో జనవరి 2026 డీఏ పెంపు కమిషన్ కాలం ముగిసిన తర్వాత మొదటి సవరణ అవుతుంది. 8వ వేతన కమిషన్ ఏర్పాటు ప్రక్రియ కొనసాగుతున్నప్పటికీ, దాని అమలు తేదీపై స్పష్టత లేదు. కమిషన్ తన నివేదికను సమర్పించడానికి 18 నెలల సమయం పడుతుంది. ఆపై కొత్త వేతన స్కేల్స్ అమలు కావడానికి మరో రెండు సంవత్సరాలు పట్టే అవకాశం ఉంది. కాబట్టి, 2027 చివరి లేదా 2028 ప్రారంభంలో 8వ వేతన కమిషన్ పెంపుదల కనిపించవచ్చు.

8వ వేతన సంఘం అమలులోకి వచ్చినప్పుడు, ఆ సమయంలో ఉన్న డీఏ సాధారణంగా ప్రాథమిక వేతనంలో విలీనం చేస్తారు. డీఏ మళ్లీ సున్నా నుంచి ప్రారంభమవుతుంది. ఈ జనవరి 2026 డీఏ పెరుగుదల, తదుపరి కొన్ని పెంపులతో పాటుగా, కొత్త పే మ్యాట్రిక్స్‌లో సవరించిన ప్రాథమిక వేతనం ఎంత ఉంటుందో నిర్ణయించడంలో కీలక పాత్ర పోషిస్తుంది.