by Suryaa Desk | Fri, Dec 12, 2025, 11:07 PM

మనకి మార్కెట్లో రెండు రకాలనువ్వులు ఉంటాయి. మనం ఎక్కువగా తెల్ల నువ్వుల్ని వాడుతుంటాం. నల్ల నువ్వుల్ని బర్గర్, సలాడ్స్ వాటిపై స్ప్రింకిల్ చేస్తారు. అయితే, ఈ రెండింటి మధ్య తేడా ఏంటి. ఏవి తీసుకుంటే ఎక్కువ లాభాలు. ఆరోగ్యంగా ఉండేందుకు ఏ నువ్వులు వాడాలో తెలియదు చాలా మందికి. అలాంటి వారి అనుమానాన్ని తీర్చేందుకు డైటీషియన్ శ్వేతా ఇన్‌స్టాగ్రామ్‌లో ఓ వీడియోని షేర్ చేశారు. అందులో నల్లనువ్వులు, తెల్ల నువ్వులు తినడం వల్ల లాభాలు ఏంటి. వేటిని ఎప్పుడు తీసుకోవాలి? ఇలాంటి వివరాలన్నీ చెబుతున్నారు.

పోషకాలను బట్టి ఎంచుకోవడం

నల్ల నువ్వులు, తెల్ల నువ్వులు రెండు కూడా మంచివే. రెండింటిలోనూ వేర్వేరు పోషకాలు ఉంటాయి. కాస్తా భిన్నంగానే ఇందులోని పోసకాలు ఉంటాయి. అందుకే, మనకి ఏ పోషకం అవసరమో దాన్ని బట్టి ఎంచుకోవాల్సి ఉంటుంది. అలా ఎంచుకోవాలంటే ఎందులో ఏ పోషకం ఉందో.. మనకి ఏ పోషక లోపం ఉందో తెలుసుకోవడం ముఖ్యం కదా.

నల్ల నువ్వుల్లోని పోషకాలు

నల్ల నువ్వుల్ని పొట్టతీయకుండా తీసుకుంటారు. వాటి పొట్టులో యాంటీ ఆక్సిడెంట్స్, ఖనిజాలు పుష్కలంగా ఉంటాయి. అంతేకాకుండా, ఐరన్, మెగ్నీషియం, జింక్, యాంటీ ఆక్సిడెంట్స్ కూడా పుష్కలంగానే ఉంటాయి. అందుకే, వీటిని తీసుకోవడం వల్ల మనకి ఆయా పోషకాల కొరత తీరుతుంది.

నల్ల నువ్వులు తీసుకుంటే లాభాలు

మీరు బాడీలో హిమోగ్లోబిన్‌ని పెంచుకోవాలనుకుంటే నల్ల నువ్వుల్ని తీసుకోవడం మంచిది. దీని వల్ల జుట్టు రాలడం తగ్గి ఒత్తుగా పెరుగుతుంది. నీరసం తగ్గి శక్తి పెరుగుతుంది. ఐరన్, పీసీఓఎస్, రక్తహీనత ఉన్నవారికి నల్ల నువ్వులు మంచివి. నల్ల నువ్వుల్ని చలికాలంలో తీసుకుంటే బాడీకి వెచ్చదనం అందడమే కాకుండా బలంగా ఉంటారు.

తెల్లనువ్వుల్లోని పోషకాలు

తెల్ల నువ్వుల్ని పొట్టు తొలగించి చేస్తారు. కాబట్టి, మృదువుగా ఉంటాయి. మైల్డ్ టేస్ట్ ఉంటాయి. నల్ల నువ్వులతో పోలిస్తే త్వరగా జీర్ణమవుతాయి. కాల్షియం, హెల్దీ ఫ్యాట్స్, ఎముకలకి అవసరమైన ఖనిజాలు ఈ నువ్వుల్లో ఉంటాయి.

తెల్ల నువ్వులతో లాభాలు

తెల్ల నువ్వులో మంచి మొత్తంలో కాల్షియం ఉంటుంది. అవి ఎముకలు, దంతాల్ని బలంగా చేస్తాయి. చర్మాన్ని హైడ్రేట్ చేస్తాయి. చర్మ సమస్యల్ని దూరం చేస్తాయి. కీళ్ళ నొప్పుల్ని తగ్గిస్తాయి. ముఖ్యంగా పిల్లలు, ముసలి వారికి, కాల్షియం తక్కువగా ఉన్నవారికి చాలా మంచివి.

తెల్ల నువ్వులు, నల్ల నువ్వుల్లో రెండింటిలో ఏవి మంచివి?

రెండింటిలో ఏం తినాలి?

డైటీషియన్ ప్రకారం, తెల్ల, నల్ల నువ్వులు రెండూ కూడా పోషకాలతో నిండి ఉంటాయి. మీ అవసరాలని బట్టి వాటిని ఎంచుకోవచ్చు.

ఐరన్ లెవల్స్‌ని పెంచుకుని అలసటని తగ్గించుకోవాలనుకున్నా, జుట్టుని పెంచుకోవాలనుకున్నా నల్ల నువ్వుల్ని తీసుకోండి.

తెల్ల నువ్వుల్ని తీసుకుంటే కాల్షియం లెవల్స్ పెరిగి, ఎముకలు బలంగా మారతాయి. చర్మం, ఆడవారి ఆరోగ్యాన్ని పెంచడానికి మరింత హెల్ప్ చేస్తాయి.