by Suryaa Desk | Sun, Dec 14, 2025, 07:24 PM

సమాజంలో రోజురోజుకూ పరిస్థితులు దిగజారుతున్నాయి. డ్రగ్స్, మత్తుపదార్థాల కట్టడికి ప్రభుత్వాలు ఎన్ని రకాల చర్యలు తీసుకుంటున్నా.. ఆ మహమ్మారులు చాప కింద నీరులా విస్తరిస్తూ యువత భవితను నాశనం చేస్తున్నాయి. కాలేజీలలోకి ప్రవేశించిన డ్రగ్స్ భూతం.. ఎంతో మంది యువతీయువకుల బంగరు భవిష్యత్తును నాశనం చేస్తోంది. వారి కన్నోళ్లకు కడుపుకోతను మిగుల్చుతోంది. కాలేజీకి వెళ్లిన బిడ్డ.. చక్కగా చదువుకుని ఉన్నత స్థానంలో నిలుస్తారని ఊహించిన ఆ తల్లిదండ్రుల ఆశలు పేకమేడలా కూలిపోతున్నాయి. కఠిన నిర్ణయాలు తీసుకునేందుకు కారణమవుతోంది. అలాంటి ఘటనే గుంటూరు జిల్లాలో చోటుచేసుకుంది.

గుంటూరుకు చెందిన ఓ 17 ఏళ్ల బాలిక స్థానికంగా ఉండే ఓ కాలేజీలో ఇంటర్ చదువుతోంది. అదే కాలేజీలో చదివే ఓ సీనియర్‌తో ఆమెకు ఇన్‍స్టాగ్రామ్‌ ద్వారా పరిచయమైంది. ఆ పరిచయాన్ని ఆసరాగా చేసుకున్న యువకుడు ప్రేమిస్తున్నానంటూ ఆ బాలిక వెంట పడ్డాడు. ఆమెను ప్రేమ పేరుతో నమ్మించాడు. డ్రగ్స్ కూడా అలవాటు చేశాడు. ఆ తర్వాత తన రూమ్‌కు తీసుకెళ్లిన యువకుడి.. ఆమెకు మత్తుపదార్థాలు ఇచ్చి అసభ్యకరంగా ప్రవర్తిస్తూ రావటం ప్రారంభించాడు. ఈ దృశ్యాలను ఫ్రెండ్ సాయంతో ఫోటోలు, వీడియోలు తీయించాడు. అయితే ఇటీవల బాలిక తల్లి.. అమ్మాయి ఫోన్ పరిశీలించిన సమయంలో.. అందులో యువకుడితో సన్నిహితంగా ఉన్న ఫోటోలు ఆమెకు కనిపించాయి.

దీంతో బాలిక తల్లి.. ఈ విషయాన్ని బాలికను ప్రశ్నించింది. అయితే అప్పటికే డ్రగ్స్‌ మత్తుకు అలవాటు పడిన బాలిక.. తనను ప్రశ్నించిన తల్లిదండ్రులపై తిరగబడింది. వారిపైనే దాడి చేసింది. దీంతో అల్లారుముద్దుగా పెంచుకున్న కుమార్తె అలా ప్రవర్తించేసరికి ఆ తల్లి హృదయం తల్లడిల్లిపోయింది. తీవ్ర మనోవేదనతో నిద్రమాత్రలు మింగి ఆత్మహత్యకు ప్రయత్నించింది. అయితే కుటుంబసభ్యులు సకాలంలో గుర్తించడంతో ప్రాణాలు దక్కాయి. ప్రస్తుతం ఆమె గుంటూరు జీజీహెచ్ ఆస్పత్రిలో చికిత్స పొందుతున్నారు.

ఈ విషయం తెలుసుకున్న గుంటూరు ఎస్పీ, ఈగల్ విభాగం ఐజీ ఇద్దరూ ఆస్పత్రిలో చికిత్స పొందుతున్న ఆమెను పరామర్శించారు. ఈ కేసును పూర్తి స్థాయిలో విచారణ జరిపి చర్యలు తీసుకుంటామని ఈగల్ విభాగం ఐజీ రవికృష్ణ వెల్లడించారు. మరోవైపు యువకుడు, బాలిక ప్రేమించుకున్న సంగతి తెలిసిన ఆమె తల్లిదండ్రులు.. వేరే యువకుడితో ఆమెకు పెళ్లి చేయాలని నిర్ణయించారని.. ఇది తెలిసి బాలిక వారిపై గొడవపడినట్లు పోలీసులు భావిస్తున్నారు.