by Suryaa Desk | Sun, Dec 14, 2025, 08:42 PM

ఆస్ట్రేలియాలోని సిడ్నీ బాండీ బీచ్‌లో జరిగిన ఉగ్రదాడి పహల్గామ్‌ ముష్కర దాడిని తలపిస్తోంది. బీచ్‌లో సేదతీరుతోన్న పర్యాటకులపై ఇద్దరు ఉగ్రవాదులు విచక్షణారహితంగా కాల్పులకు తెగబడ్డారు. ఈ ఘటనలో ఇప్పటి వరకూ 11 మంది ప్రాణాలు కోల్పోయారు. అయితే, ఓ పర్యాటకుడు ఉగ్రవాదులపై తిరగబడి పదుల సంఖ్యలో ప్రాణాలు కాపాడి రియల్ హీరోగా మారిపోయాడు. కాల్పులు జరుపుతోన్న ఉగ్రవాదిని ఒట్టి చేతులతోనే ఎదిరించాడు. నిరాయుధుడైన అతడు అసమాన ధైర్యం ప్రదర్శించి ముష్కరుడి చేతులో తుపాకిని లాక్కుని, వాడిపైకే ఎక్కుపెట్టాడు. ఈ దృశ్యాలు అక్కడ ఉన్న సీసీటీవీ కెమెరాల్లో రికార్డు కాగా.. ప్రస్తుతం దీనికి సంబంధించిన వీడియో వెలుగులోకి వచ్చింది.

వైరల్ అవుతోన్న 15 సెకెన్ల వీడియోలో పార్కింగ్ చేసిన కార్ల వెనుక నుంచి రావడం... కాల్పులు జరుపుతోన్న ఉగ్రవాదిని రెండు చేతులతో గట్టిగా మెడను గట్టిగా పట్టుకుని తుపాకి లాక్కున్నాడు. దీంతో ముష్కరుడు కిందపడిపోగా.. తుపాకిని వాడిపైకి ఎక్కుపెట్టాడు. అనంతరం అక్కడ నుంచి లేచి ఆ ఉగ్రవాది పరుగులు పెట్టాడు. ఎనిమిది రోజుల పాటు కొనసాగే యూదుల హనుక్కా పండుగ తొలి రోజే ఈ దుర్ఘటన జరిగింది. కాల్పులకు పాల్పడిన ఉగ్రవాదులను హమాస్‌‌కు చెందినవారిగా భావిస్తున్నారు. దీనిపై స్పష్టం రావాల్సి ఉంది. కాల్పుల్లో 11 మంది గాయపడగా.. వీరిలో ఇద్దరు పోలీసు అధికారులు ఉన్నారు. ఆపరేషన్ ఇంకా కొనసాగుతండటంతో మృతుల సంఖ్య పెరిగే అవకాశం ఉందని భావిస్తున్నారు. దుండుగులు మొత్తం 50 రౌండ్లు పాటు కాల్పులు జరిపినట్టు ప్రత్యక్ష సాక్షులు చెబుతున్నారు.

స్థానిక కాలమానం ప్రకారం సాయంత్రం 6.30 గంటలకు న్యూసౌత్ వేల్స్ రాష్ట్రంలోని సిడ్నీలో ప్రముఖ పర్యాటక కేంద్రం బాండీ బీచ్‌లో యూదుల పండుగ ఆరంభ వేడుకలు మొదలయ్యాయి. బీచ్‌లో వందలాది మంది గుమిగూడి ఉన్నారు. ఈ సమయంలోనే దుండగులు కాల్పులు మొదలుపెట్టారు. పిల్లలు, వృద్ధులు, మహిళలు అనే తేడా లేకుండా కాల్పులతో విరుచుకుపడ్డారు. అయితే, ఈ ముష్కర దాడి వెనుక హమాస్ హస్తం ఉన్నట్టు అంతర్జాతీయ మీడియాలో కథనాలు వెలువడుతున్నాయి.