by Suryaa Desk | Tue, Dec 16, 2025, 11:25 PM

ఎవరికి మాత్రం అంత పొట్ట వేసుకుని ఉండాలని ఉంటుంది చెప్పండి. ఫిట్‌గా ఉండాలని అందరికీ ఆశగానే ఉంటుంది. కానీ అందుకోసం కష్టపడటమే ఎవరికీ నచ్చదు. ఫుడ్ తినడం ఏమాత్రం కంట్రోల్ చేసుకోలేరు. అలా అలా చిన్న బొజ్జ కాస్త, క్రమంగా పెరుగుతూ పోతుంది. స్పెషల్‌గా అందుకోసం ఫోకస్ పెట్టాల్సిన అవసరం లేకుండా దానికదే సైలెంట్‌గా పెరుగుతూ పోతుంది బెల్లీ ఫ్యాట్. కానీ దానిని కరిగించడానికి మాత్రం అష్టకష్టాలు పడాల్సిందే. 24 గంటలూ దానిపై ధ్యాస పెట్టాల్సిందే. తాగే టీ, కాఫీల దగ్గరి నుంచి ఏం తింటున్నాం, ఎంత తింటున్నాం, ఎప్పుడు తింటున్నాం, తిన్న తర్వాత ఏం చేస్తున్నాం.. ఇలా అన్ని ఆలోచిస్తూ ఉంటే కానీ ఆ బొజ్జ తగ్గడం మొదలవదు.

బరువు పెరగడానికైనా, తగ్గడానికైనా, బొజ్జ తగ్గడానికైనా, పొట్ట తగ్గి సిక్స్‌ ప్యాక్ రావడానికైనా అందరూ చేసేది రెండే రెండు. ఒకటి వ్యాయామం, రెండోది డైట్. ఈ రెండింటిని సక్రమంగా చేయగలిగితే మన శరీరాన్ని ఎలా కావాలనుకుంటే అలా మలుచుకోవచ్చు. ఈ రెండింట్లో అత్యంత ముఖ్యమైనది డైట్. డైట్ ఒక్కటి కంట్రోల్ చేయగలిగితే మన శరీరంలో చాలా మార్పులు మన కళ్ల ముందే జరుగుతాయి.

ఈ డైట్‌ను కంట్రోల్ చేయడానికి ఇటీవలి కాలంలో ప్రాచుర్యంలోకి వచ్చిందే ఇంటర్మిటెంట్ ఫాస్టింగ్ . క్రమబద్ధమైన ఉపవాస పద్ధతిని అనుసరించడం ద్వారా బరువు తగ్గడం, జీవక్రియను మెరుగుపరచడం, ముఖ్యంగా బెల్లీ ఫ్యాట్‌ను సమర్థవంతంగా తగ్గించడం సాధ్యం అవుతుందని గ్యాస్టోఎంటరాలజిస్ట్ వైద్య నిపుణుడు, డాక్టర్ సౌరభ్ సేథి తెలిపారు. ముఖ్యంగా ఈ ఇంటర్మిటెంట్ ఫాస్టింగ్ ఎలా చేయాలి, పాటించాల్సిన 3 ముఖ్యమైన చిట్కాల గురించి ఇన్‌స్టాగ్రామ్ వేదికగా వివరించారు. మరి అవేంటో మనం ఇప్పుడు తెలుసుకుందామా.

12 - 12 ఫాలో అవ్వండి

ఇంటర్మిటెంట్ ఫాస్టింగ్ అనేది ఆహారం తినడానికి, ఉపవాసం ఉండటానికి ఒక కచ్చితమైన సమయాన్ని కేటాయించడాన్ని సూచిస్తుంది. కొత్తగా ఇంటర్మిటెంట్ ఫాస్టింగ్ ప్రారంభించేవారు 12 - 12 ఫార్ములా పాటించడం మంచిది. అంటే రోజులో 12 గంటలు ఆహారం తీసుకోకుండా ఉపవాసం ఉండాలి. మిగిలిన 12 గంటల విండోలో ఆహారం తీసుకోవాలి.

రాత్రి 7 గంటలకు భోజనం చేస్తే.. మరుసటి రోజు ఉదయం 7 గంటల వరకు ఏమీ తినొద్దు. రాత్రంతా పడుకుంటాం కాబట్టి దీనిని పాటించడం చాలా సులభం. ఈ షెడ్యూల్ మీ జీర్ణవ్యవస్థకు విశ్రాంతిని ఇవ్వడమే కాకుండా, మీ శరీరం కొవ్వును శక్తిగా ఉపయోగించుకునే ప్రక్రియను మెరుగుపరచడంలో సహాయపడుతుంది. శరీరం ఈ పద్ధతికి అలవాటు పడ్డాక, దానిని 14:10 లేదా 16:8 వంటి కాస్తంత కఠినమైన సమయాలకు మారవచ్చు.

ఫాస్టింగ్ సమయంలో ఏం తాగాలంటే

ఇంటర్మిటెంట్ ఫాస్టింగ్ సమయంలో కేలరీలు లేని లేదా చాలా తక్కువ కేలరీలు ఉన్న పానీయాలను మాత్రమే తీసుకోవాలి. దీనివల్ల శరీరానికి అవసరమైన హైడ్రేషన్ లభిస్తుంది.

ఉపవాస విండోలో మీరు తీసుకోవలసిన పానీయాలు

నీరు తాగాలి. శరీరాన్ని హైడ్రేటెడ్‌గా ఉంచడానికి ఇది చాలా ముఖ్యం. అలాగే చక్కెర్, పాలు కలపకుండా తయారు చేసే బ్లాక్ కాఫీ, బ్లాక్ టీ, గ్రీన్ టీ తాగొచ్చు. ఇవి జీవక్రియను వేగవంతం చేయడంలో సహాయపడతాయి. అలాగే యాపిల్ సైడర్ వెనిగర్ లేదా నిమ్మరసం తీసుకోవడం వల్ల జీర్ణక్రియ మెరుగుపడుతుంది. సోంపు లేదా తులసి నీరు లేదా అల్లం టీ(కొద్దిమొత్తంలో) వంటివి కూడా తాగొచ్చు.

అధిక ఫైబర్, ప్రోటీన్ ఉన్నవాటినే తినాలి

ఉదయం 7 గంటల నుంచి సాయంత్రం 7 గంటల విండోలో సరైన పోషకాహారం తీసుకోవడం చాలా ముఖ్యం. శరీరానికి శక్తిని అందించడానికి అధిక ప్రోటీన్, అధిక ఫైబర్ ఉండే ఆహారం తీసుకోవాలి.

ప్రొటీన్ తినండి

కండరాల నిర్మాణానికి సహాయపడుతుంది. ప్రోటీన్ జీర్ణం కావడానికి ఎక్కువ సమయం పడుతుంది. దీని వల్ల ఎక్కువసేపు కడుపు నిండుగా ఉన్నట్లు అనిపిస్తుంది ఆకలి వేయదు. పన్నీర్, టోఫు, శనగలు, చికెన్, టర్కీ, చేపలు వంటివి వాటిలో ప్రోటీన్ అధికంగా లభిస్తుంది.

ఫైబర్ తీసుకోండి

పీచు పదార్థాలు జీర్ణక్రియను మెరుగుపరుస్తాయి. రక్తంలో చక్కెర స్థాయిలను నియంత్రణలో ఉంచుతాయి. ముఖ్యంగా, పండ్లు, కూరగాయల్లో ఫైబర్‌ పుష్కలంగా ఉంటుంది.