by Suryaa Desk | Mon, Dec 22, 2025, 08:33 PM

రాజస్థాన్‌లోని బార్మర్ కలెక్టర్, ఐఏఎస్ అధికారిణి టీనా దాబి మళ్లీ వార్తల్లోకి ఎక్కారు. ఫీజుల పెంపునకు వ్యతిరేకంగా నిరసన తెలుపుతున్న విద్యార్థులు ఆమెను రీల్ స్టార్ అని విమర్శించడం.. దానికి కౌంటర్‌గా ఇది కేవలం సోషల్ మీడియాలో పాపులారిటీ కోసం సృష్టించిన వివాదమేనని ఆమె కొట్టిపారేయడం ఇప్పుడు చర్చనీయాంశమైంది. రాజస్థాన్ యూనివర్సిటీలో పరీక్షా ఫీజుల పెంపును నిరసిస్తూ బార్మర్‌లోని ఎంబీసీ గర్ల్స్ కాలేజీ విద్యార్థులు తీవ్ర ఆందోళన చేపట్టారు. ఈ సందర్భంగా జిల్లా కలెక్టర్ టీనా దాబి తమను కలవడానికి నిరాకరించారని.. తమను అరెస్ట్ కూడా చేయించారని విద్యార్థులు ఆరోపించారు.

అంతేకాకుండా ఆమె కేవలం సోషల్ మీడియాలో రీల్ స్టార్ అని.. క్షేత్రస్థాయి సమస్యల కంటే ఆమె తన ప్రచారంపైనే ఆసక్తి చూపుతారని విమర్శించారు. అయితే, ఈ ఆరోపణలను టీనా దాబి తీవ్రంగా ఖండించారు. ఇదంతా కొంతమంది విద్యార్థి నాయకులు వైరల్ కావడం కోసం చేసిన ప్రయత్నమేనని ఆమె పేర్కొన్నారు. బార్మర్‌లోని మహారాణా భూపాల్ గర్ల్స్ కాలేజీ విద్యార్థులు ఫీజుల పెంపును ఉపసంహరించుకోవాలని డిమాండ్ చేస్తూ నిరసన చేపట్టారు.

ఈ సమస్యపై తహసీల్దార్, అదనపు జిల్లా మేజిస్ట్రేట్ ఇప్పటికే ఆ విద్యార్థులతో మాట్లాడారు. యూనివర్సిటీ వైస్ ఛాన్సలర్‌తో చర్చించి.. ఫీజుల పెంపును వెనక్కి తీసుకుంటామని హామీ కూడా ఇచ్చారు. సమస్య పరిష్కారం అయినప్పటికీ.. యూనివర్సిటీ విద్యార్థులు మాత్రం కలెక్టర్ టీనా దాబి స్వయంగా వచ్చి తమను కలవాలని పట్టుబట్టారు. ఆమె రాకపోవడంతో రోడ్డుపై బైఠాయించి వారి ఆందోళనను మరింత ఉద్ధృతం చేశారు.

సోషల్ మీడియాలో టీనా దాబికి ఉన్న ఫాలోయింగ్‌ను ఉద్దేశించి యూనివర్సిటీ విద్యార్థులు ఘాటు వ్యాఖ్యలు చేశారు. టీనా దాబి తమకు రోల్ మోడల్ కాదని.. పరిశుభ్రత కార్యక్రమాలు వంటి మీడియా కవరేజీ ఉండే చోటికి వెళ్లే కలెక్టర్.. సమస్యల్లో ఉన్న విద్యార్థులను కలవడానికి సమయం కేటాయించడం లేదని ఒక విద్యార్థిని ఆరోపించారు.

సోషల్ మీడియాలో కూడా ఈ విషయంపై పెద్ద ఎత్తున చర్చ జరిగింది. ఐఏఎస్ అధికారులకు ఉన్న మితిమీరిన అధికారాల గురించి కొందరు నెటిజన్లు తీవ్ర విమర్శలు గుప్పించగా.. ఆమె దళిత మహిళ కావడమే ఈ విమర్శలకు కారణమని మరికొందరు నెటిజన్లు మద్దతుగా నిలుస్తున్నారు. ఈ వివాదంపై కలెక్టర్ టీనా దాబి స్పష్టతనిచ్చారు. ప్రతి చిన్న విషయానికి జిల్లా కలెక్టర్ నేరుగా వెళ్లాల్సిన అవసరం లేదని.. సంబంధిత అధికారులు ఇప్పటికే వారితో చర్చించినట్లు చెప్పారు.

సమస్య పరిష్కారమైన తర్వాత కూడా రోడ్డు బ్లాక్ చేసి విద్యార్థులు.. ఇబ్బంది కలిగించినపుడు పోలీసులు వారిని స్టేషన్‌కు తరలించి సర్దిచెప్పారని ఐఏఎస్ టీనా దాబి తెలిపారు. అంతేకానీ ఎవరినీ అరెస్ట్ చేయలేదని ఆమె క్లారిటీ ఇచ్చారు. ఈ ఘటనను పెద్దది చేసి సోషల్ మీడియాలో వైరల్ అవ్వాలని కొంతమంది విద్యార్థి నాయకులు చూస్తున్నారని.. ఇది అసలు సమస్య కాదని కొట్టిపారేశారు. 2015 బ్యాచ్ యూపీఎస్‌సీ టాపర్ అయిన టీనా దాబి.. కెరీర్ ప్రారంభం నుంచి ఏదో ఒక వివాదంతో వార్తల్లో నిలుస్తూనే ఉన్నారు. సోషల్ మీడియాలో ఆమె వ్యక్తిగత, వృత్తిగత జీవితంపై నిరంతరం నిఘా ఉండటంతో.. 3 ఏళ్ల క్రితమే ఆమె సోషల్ మీడియాకు దూరంగా ఉన్నారు.