by Suryaa Desk | Tue, Jan 06, 2026, 11:18 PM

మలేసియా యువరాజుతో తన వివాహంపై అమెరికా సంతతికి చెందిన ఇండోనేషియా మోడల్ మనోహర ఒడేలియా సంచలన వ్యాఖ్యలు చేశారు. ఆ పెళ్లి తన జీవితంలో ఒక పీడకల అని పేర్కొంటూ.. యువరాజుపై తీవ్రమైన ఆరోపణలు గుప్పించారు., తన పేరు ప్రస్తావించేటప్పుడు ‘మాజీ భార్య’ అంటూ సంబోధించడాన్ని ఆమె తప్పుపట్టారు. ఈ మేరకు ఆమె సోషల్ మీడియా వేదికగా పెట్టిన పోస్ట్ ప్రస్తుతం వైరల్ అవుతోంది.

మలేసియాలోని కెలాంటన్ రాష్ట్ర సుల్తాన్ కుమారుడు, యువరాజు టెంగ్కు మహమ్మద్‌ ఫఖ్రీ పెట్రా 2008లోనే మోడల్ మనోహర ఒడెలియాను వివాహం చేసుకున్నారు. అప్పటికి అతడి వయసు 31 ఏళ్లు కాగా.. ఆమెకు 16 ఏళ్లే. ఈ వివాహం అప్పట్లో ప్రపంచవ్యాప్తంగా పతాక శీర్షికలకు ఎక్కింది. ఈ పెళ్లి తనను నరకంలోకి తోసిందని, నా కదలికలపై నిఘా ఉండేదని గతంలో ఆరోపించారు. తల్లిదండ్రులతో కూడా మాట్లాడే పరిస్థితి లేకపోయిందని ఆమె వాపోయారు. ఏ రోజూ తనను మనిషిలా కూడా చూడలేదని, శారీరకంగా, లైంగికంగా వేధింపులకు ఎదుర్కొన్నానని ఒడెలియా ఆవేదన వ్యక్తం చేశారు.

చివరకు మహమ్మద్ ఫఖ్రీ తండ్రి 2009లో అనారోగ్యానికి గురికావడంతో చికిత్స కోసం రాజకుటుంబం మొత్తం సింగపూర్‌కు వెళ్లింది. ఇదే అదునుగా భావించిన మనోహర అమెరికా రాయబార కార్యాలయం, స్థానిక అధికారులు, తల్లి సహాకారంతో సింగపూర్ హోటల్ నుంచి తప్పించుకున్నారు. ఆ తర్వాత యువరాజుతో వైవాహిక బంధానికి ముగింపు పడింది. నాటి సంఘటన గురించి తాజాగా ఇన్‌స్టాగ్రామ్ వేదికగా ఆమె స్పందించారు.

‘‘నా టీనేజ్‌లో ఏర్పడిన ఆ బంధం నేను కోరుకున్నదీ కాదు.. చట్టబద్దమైంది కాదు.. నేను అప్పటికి మైనర్‌ను. నాకు నచ్చింది ఎంచుకొనే వయసు, స్వేచ్ఛ కూడా లేవు. చట్టబద్ధమైన వివాహంలో ‘మాజీ భార్య’ అనే పదం సరైందే.. కానీ నా విషయంలో కొన్నేళ్లుగా ఆ పదాన్ని వాడుతున్నారు. వాస్తవాన్ని అది వక్రీకరిస్తుంది. నా గురించి ప్రస్తావించేటప్పుడు ఆ పదం వాడొద్దని ఇండోనేసియా మీడియా, ఎడిటర్స్, రైటర్స్, డిజిటల్ ప్లాట్‌ఫామ్స్ (గూగుల్, వికీపీడియా సహా) విజ్ఞ‌ప్తి చేస్తున్నాను’’ అని ఆమె తన పోస్టులో రాసుకొచ్చారు.