by Suryaa Desk | Thu, Jan 08, 2026, 12:07 AM

బాడీలో ఐరన్ లెవల్స్ సరైన విధంగా ఉండడం చాలా ముఖ్యం. కానీ, కొంతమందికి సరైన విధంగా ఐరన్ లెవల్స్ ఉండవు. తక్కువగా ఉంటాయి. దీంతో నీరసం, అలసట, జుట్టు రాలడం, కళ్ళు తిరగడం వంటి ఎన్నో సమస్యలు ఉంటాయి. వీటన్నింటిని గమనించి ఐరన్ లెవల్స్‌ని ఎప్పటికప్పుడు చెక్ చేసుకోవాలి. లేదంటే చాలా సమస్యలొస్తాయి. అయితే, ఐరన్ తగ్గినప్పుడు డాక్టర్ సప్లిమెంట్స్ మాత్రమే కాకుండా ఐరన్ ఫుడ్స్ సజెస్ట్ చేస్తారు. దీంతో చాలా మంది వాటిని డైట్‌లో ఇంక్లూడ్ చేస్తారు. అయినప్పటికీ కూడా మన బాడీలో ఐరన్ లెవల్స్ పెరగవు. దీనికి చాలానే కారణాలు ఉంటాయి. మనం చేసే కొన్ని తప్పుల కారణంగానే ఐరన్ పెరగదు. అవేంటో ఇప్పుడు చూద్దాం.

ఐరన్ డెఫిషీయెన్సీ ఉంటే 

శరీరంలో ఎర్ర రక్తకణాలకి హిమోగ్లోబిన్ తయారుచేయడానికి తగినంత విధంగా ఐరన్ లేనప్పుడు ఐరన్ లోపం వస్తుంది. దీంతో బాడీ మొత్తానికి ఆక్సిజన్ సరఫరా తగ్గి అలసట, చర్మం పాలిపోవడం, శ్వాస సమస్యలు, బ్రెయిన్ పనితీరు తగ్గడం వంటి సమస్యలు వస్తాయి. అందుకే, ఐరన్ లోపం లేకుండా చూసుకోవాలి. దీనికోసం ఐరన్ ట్యాబ్లెట్స్‌తో పాటు మంచి ఐరన్ రిచ్ ఫుడ్స్ తీసుకోవాలి. మాంసం, ఆకుకూరలు, బీన్స్, బలమైన తృణధాన్యాల వంటివి ఎక్కువగా తీసుకుంటే మంచిది. అయితే, ఇవన్నీ తీసుకున్నా ఐరన్ లోపానికి కారణాలు ఏంటంటే

ఐరన్‌తో పాటు విటమిన్ సి తీసుకోకపోవడం

మనం ఐరన్ రిచ్ ఫుడ్స్ తీసుకోగానే వాటిని మన బాడీ అబ్జార్బ్ చేసుకోదు. సరైన విధంగా తీసుకున్నప్పుడు ఐరన్ అందుతుంది. ఐరన్ ఫుడ్స్‌తో ముఖ్యంగా ప్లాంట్ బేస్డ్ ఐరన్ తీసుకున్నప్పుడు విటమిన్ సి తీసుకోవాలి. అప్పుడే ఐరన్ అందుతుంది. లేదంటే, ఎంత శాతం ఐరన్ తీసుకున్నా కూడా 5 నుంచి 12 శాతం మాత్రమే అందుతుంది. కాబట్టి, నిమ్మ, ఉసిరి కాయలు, టమాట, సిట్రస్ ఫ్రూట్స్‌తో కలిపి తీసుకోండి.

భోజనంతో టీ, కాఫీ తీసుకోవడం

టీ, కాఫీలో ఐరన్‌ని బంధించే పాలీఫెనాల్స్ ఉంటాయి. భోజనంతో పాటు వీటిని తీసుకోవడం, భోజనం చేసిన వెంటనే తీసుకోవడం వల్ల ఐరన్ అబ్జార్బ్ 40 నుంచి 70 శాతం తగ్గుతుంది. కాబట్టి, తిన్న తర్వాత కనీసం 1 లేదా 2 గంటల తర్వాత టీ, కాఫీలు తీసుకోండి.

ప్రోటీన్ తీసుకోకపోవడం

ఐరన్‌ ఒక్కటే తీసుకోవద్దు. దీంతో పాటు ప్రోటీన్ తీసుకోవాలి. లో ప్రోటీన్ ఉంటే ఐరన్ సరిగ్గా అందదు. బాడీలో స్టోర్ అవ్వదు. హిమోగ్లోబిన్‌ని ఏర్పరచదు. కాబట్టి, మనం ప్రోటీన్‌తో పాటు తీసుకోవడం మంచిది.

విటమిన్ బి 12, ఫొలేట్‌ని పట్టించుకోకపోవడం

అదే విధంగా, విటమిన్ బి12, ఫోలేట్‌ని తీసుకోకపోవడం వల్ల ఐరన్ అందకపోవడానికి కారణమవుతుంది. బాడీలో ఎర్రరక్తకణాలు తయారవ్వడానికి బి12, ఫొలేట్ అవసరం. ఐరన్ సాధారణంగా ఉన్నప్పటికీ అయితే, బి12, ఫొలేట్ తగ్గితే హిమోగ్లోబిన్ ఆటోమేటిగ్గా తగ్గుతుంది.

గట్ హెల్త్ బాలేకపోవడం

సరిలేని గట్ హెల్త్ కారణంగా కూడా మన కడుపులో మంట ఏర్పడేలా చేస్తుంది. ఐరన్, బి12, ఫొలేట్ పేగులో శోషించబడతాయి. మంచి ఆహారం తీసుకున్నప్పటికీ పేగు సమస్యలు, వాపు వంటి సమస్యలు ఉంటే ఐరన్ అందదు. సరైన వినియోగం ఉండదు.