by Suryaa Desk | Fri, Jan 09, 2026, 11:17 PM

గుమ్మడికాయ గింజలు ఆరోగ్యానికి చాలా మేలు చేస్తాయి. వీటిలో ఎన్నో పోషకాలు ఉంటాయి. గుమ్మడి గింజల్లో ప్రోటీన్స్, ఆరోగ్యకరమైన కొవ్వులు, ఫైబర్, మెగ్నీషియం, జింక్, ఐరన్, ఫాస్ఫరస్, మాంగనీస్ వంటి ఖనిజాలతో పాటు విటమిన్లు ఎ, బి, సి,ఈ ఉంటాయి. ఇవే కాకుండా యాంటీ ఆక్సిడెంట్లు, ఫినోలిక్ సమ్మేళనాలు పుష్కలంగా ఉంటాయి. ఇవి ఆరోగ్యానికి ఎంతో మేలు చేస్తాయి. అందుకే చాలా మంది నిపుణులు గుమ్మడి గింజలు తినమని సిఫార్స్ చేస్తారు.

ఇక, మహిళలకు గుమ్మడి గింజలు బెస్ట్ ఆప్షన్ అని.. వీటిని తినమని సలహా ఇస్తారు. అయితే, ఈ గింజలు పురుషులకు అంతే ప్రయోజనకరంగా ఉంటాయని మీకు తెలుసా? ప్రముఖ న్యూట్రిషనిస్ట్ దీప్శిఖా జైన్ ఇటీవల తన ఇన్‌స్టాగ్రామ్ హ్యాండిల్‌లో దీనికి సంబంధించి ఒక వీడియోను షేర్ చేశారు. ఈ వీడియోలో గుమ్మడి గింజలు తినడం వల్ల పురుషులకు కలిగే ప్రయోజనాలేంటో వివరించారు. ఆ పూర్తి వివరాలు తెలుసుకుందాం.

సంతాన సామర్థ్యాన్ని పెంచుతాయి

పోషకాహార నిపుణులు గుమ్మడికాయ గింజలు జింక్ యొక్క అద్భుతమైన మూలం అని అంటున్నారు. జింక్ పురుషులకు ఒక ముఖ్యమైన ఖనిజం ఎందుకంటే ఇది టెస్టోస్టెరాన్ స్థాయిలకు మద్దతు ఇస్తుంది. హార్మోన్ల సమతుల్యతను మెరుగుపరుస్తుంది. అంతేకాకుండా శక్తి స్థాయిల్ని నిర్వహిస్తుంది.

ఇది స్పెర్మ్ నాణ్యతను మెరుగుపరచడంలో సాయపడుతుంది. ఇది మెరుగైన సంతానోత్పత్తికి దారితీస్తుంది. సంతాన సమస్యల్ని ఎదుర్కొనే వారు, పునరుత్పత్తి ఆరోగ్యాన్ని నిర్వాహించాలనుకునే పురుషులు గుమ్మడి గింజల్ని క్రమం తప్పకుండా తీసుకోవాలని దీప్శిఖా జైన్ వివరిస్తున్నారు.

చెడు కొలెస్ట్రాల్‌కి చెక్, గుండె సేఫ్

గుమ్మడికాయ గింజల్లో ఆరోగ్యకరమైన కొవ్వులు, మంచి మొత్తంలో మెగ్నీషియం ఉంటాయి. ఇవి గుండె ఆరోగ్యాన్ని ప్రోత్సహిస్తాయి. ఈ మంచి కొవ్వులు చెడు కొలెస్ట్రాల్‌ను నియంత్రించడంలో ఎంతగానో సాయపడతాయి. సాధారణంగా చెడు కొలెస్ట్రాల్ స్థాయిలు ఎక్కువైతే గుండెపోటు, స్ట్రోక్ వంటి ప్రమాదాలు పెరుగుతాయి.

గుమ్మడి గింజలు తినడం వల్ల చెడు కొలెస్ట్రాల్ స్థాయిల్ని తగ్గించి రక్త ప్రసరణను మెరుగుపరచడంలో సాయపడతాయి. మెగ్నీషియం రక్తపోటును నిర్వహించడానికి కూడా సాయపడుతుంది. ఇది గుండె జబ్బుల ప్రమాదాన్ని తగిస్తుంది. బిజీగా, ఒత్తిడితో కూడిన లైఫ్‌స్టైల్ అనుభవించే పురుషులకు గుమ్మడికాయ గింజలు తినడం ప్రయోజనకరంగా ఉండవచ్చని న్యూట్రిషనిస్ట్ చెబుతున్నారు.

న్యూట్రిషనిస్ట్ ఏం చెప్పారో చూడండి

ప్రోస్టెట్ ఆరోగ్యానికి ఎంతో మేలు చేస్తుంది

పురుషులకు ప్రోస్టేట్ ఆరోగ్యం చాలా కీలకం. గుమ్మడికాయ గింజలు ప్రోస్టేట్ ఆరోగ్యానికి మద్దతు ఇచ్చే సహజ సమ్మేళనాలను కలిగి ఉంటాయి. ఇవి ప్రోస్టేట్ సమస్యల ప్రమాదాన్ని తగ్గించడంలో సాయపడతాయి.

అంతేకాకుండా వృద్ధాప్యంతో వచ్చే సమస్యల నుంచి కొంత రక్షణను అందిస్తుంది. గుమ్మడికాయ గింజలు తినడం వల్ల ఆరోగ్యకరమైన హార్మోన్ల సమతుల్యతను కాపాడుకోవచ్చు. గుమ్మడికాయ గింజల్లో జింక్, మెగ్నీషియం, హార్మోన్లను నియంత్రించడంలో సహాయపడే ఆరోగ్యకరమైన కొవ్వులు ఉంటాయి.

ఇతర ప్రయోజనాలు

​గుమ్మడికాయ గింజలు రక్తంలో చక్కెరను నియంత్రించడంలో సాయపడతాయి. వాటిలో ఇన్సులిన్ స్థాయిలను మెరుగుపరిచే, టైప్ 2 డయాబెటిస్ ప్రమాదాన్ని తగ్గించే సమ్మేళనాలు ఉంటాయి. ఇది డయాబెటిక్ రోగులకు ప్రయోజనకరంగా ఉంటుంది. డయాబెటిస్ ఉన్న పురుషులు ఈ విత్తనాలు తినడం మంచిది.

గుమ్మడి గింజల్లో ప్రోటీన్, ఫైబర్ పుష్కలంగా ఉంటాయి. ఇవి ఆకలిని నియంత్రించడానికి, అతిగా తినకుండా నిరోధించడానికి సాయపడతాయి. వీటిని తీసుకోవడం వల్ల శరీరం తీసుకునే ఆహారం తగ్గుతుంది. దీంతో బరువు తగ్గాలనుకునేవారికి మంచి ఆప్షన్.

ఎంత మోతాదులో తినాలి?

మీరు రోజూ 1-2 టేబుల్ స్పూన్ల కాల్చిన లేదా ఉప్పు లేని గుమ్మడికాయ గింజలను తినవచ్చు. కావాలనుకుంటే సలాడ్లు, స్మూతీలు, పెరుగులో చేర్చవచ్చు లేదా స్నాక్‌గా తినవచ్చు. అయితే ఉప్పు ఎక్కువగా ఉన్న గుమ్మడి గింజలు తినకండి.

అంతేకాకుండా రోజూ ఒక టీస్పూన్ గుమ్మడికాయ గింజలు తీసుకుంటే.. అందులో ఉండే ఆరోగ్యకరమైన కొవ్వు మలాన్ని మృదువుగా చేయడంలో సాయపడుతుంది. అంతేకాకుండా ఫైబర్ గట్ లైనింగ్‌తో పాటు మలబద్దకం నుంచి ఉపశమనం అందించడంలో సాయపడుతుంది.