by Suryaa Desk | Sat, Jan 10, 2026, 11:26 PM

టీమిండియా టీనేజ్ సంచలనం వైభవ్ సూర్యవంశీ కేవలం 14 ఏళ్ల వయసులోనే రికార్డుల మీద రికార్డులు సృష్టిస్తున్నాడు. ఫార్మాట్ ఏదైనా, ప్రత్యర్థి జట్టు ఎంతటిదైనా పరుగుల వరద పారిస్తున్నాడు. ఫోరులు, సిక్సులతో చెలరేగుతున్నాయి. ఇటీవల ముగిసిన అండర్ 19 ఆసియా కప్‌లో, విజయ హజారే ట్రోఫీలో, దక్షిణాఫ్రికాతో జరిగిన అండర్ 19 యూత్ వన్డే సిరీస్‌లో కూడా దుమ్మురేపాడు. తాజాగా శనివారం (జనవరి 10) స్కాట్లాండ్‌తో జరిగిన వార్మప్ మ్యాచ్‌లో మరోసారి చెలరేగిపోయాడు. ఓపెనర్‌గా వైభవ్ సూర్యవంశీ స్కాట్లాండ్ బౌలర్లను ఉతికి ఆరేశాడు. దీంతో వరల్డ్ కప్ ప్రత్యర్థులకు వార్నింగ్ ఇచ్చినట్లు అయింది.

త్వరలో సౌతాఫ్రికా వేదికగా జరగనున్న అండర్ 19 వరల్డ్ కప్ 2026 ప్రారంభానికి ముందు జరిగిన వార్మప్ మ్యాచ్‌లో వైభవ్ సూర్యవంశీ అద్భుత ప్రదర్శన చేశాడు. టాస్ ఓడి బ్యాటింగ్‌కు దిగిన టీమిండియా.. ప్రారంభంలోనే అదరగొట్టింది. ఓపెనర్ వైభవ్ కేవలం 50 బంతుల్లోనే 96 పరుగులు చేసి సెంచరీ మిస్ చేసుకున్నాడు. 192 స్ట్రైక్ రేట్‌తో 9 ఫోర్లు, 7 భారీ సిక్స్‌లు బాదాడు. ఔట్ అయ్యే ముందు భారీ షాట్‌కు ప్రయత్నించి.. క్యాచ్ ఇచ్చాడు. కాగా, టీమిండియా నిర్ణీత 50 ఓవర్లలో 8 వికెట్ల నష్టానికి 374 పరుగులు చేసింది. అయితే డక్వర్త్ లూయిస్ పద్ధతిలో రెండో ఇన్నింగ్స్‌ను కుదించారు. 23.2 ఓవర్లలో 234 పరుగులతో టార్గెట్‌తో బరిలోకి దిగిన స్కాట్‌లాండ్ పేలవ ప్రదర్శన చేసి.. 112 పరుగులకే కుప్పకూలింది. దీంతో వైభవ్ సూర్యవంశీ ప్లేయర్ ఆఫ్ ది మ్యాచ్‌దా నిలిచాడు.

కాగా, వైభవ్ సూర్యవంశీ ఇటీవల అద్భుతమైన ఫామ్‌లో ఉన్నాడు. ఇటీవల దక్షిణాఫ్రికాతో జరిగిన యూత్ వన్డే సిరీస్‌లో కేవలం 74 బంతుల్లోనే 127 పరుగులు చేశాడు. 9 ఫోర్లు 10 సిక్సులతో ప్రత్యర్థి బౌలర్లపై విరుచుకు పడ్డాడు. ఈ 14 ఏళ్ల కుర్రాడు త్వరలో జరగబోయే అండర్ 19 వరల్డ్ కప్‌లో మళ్లీ దుమ్మురేపడం ఖాయంగా కనిపిస్తోంది. కాగా, అండర్-19 వరల్డ్ కప్ 2026లో టీమిండియా.. జనవరి 15న అమెరికాతో, జనవరి 17న బంగ్లాదేశ్‌తో, జనవరి 24న న్యూజిలాండ్‌తో తలపడనుంది.

వైభవ్ సూర్యవంశీ సృష్టించిన రికార్డులు ఇవే..

ఐపీఎల్‌లో అతి పిన్న వయస్కుడైన ప్లేయర్‌గా వైభవ్ సూర్యవంశీ రికార్డు సృష్టించాడు.

(14 ఏళ్ల వయసులో) సెంచరీ చేసిన అతి పిన్న వయస్కుడిగా రికార్డు. (పురుషుల లిస్ట్-ఏ క్రికెట్‌, ఐపీఎల్)

లిస్ట్-ఏ క్రికెట్‌లో అత్యంత వేగవంతమైన 150

టీ20 సెంచరీ చేసిన అతి పిన్న వయస్కుడు

యూత్ క్రికెట్‌లో అత్యంత వేగంగా సెంచరీ చేసిన భారతీయుడు (టెస్టుల్లో 58 బంతుల్లో, వన్డేల్లో 52 బంతుల్లో)

అండర్ 19లో సెంచరీ చేసిన అతి పిన్న కెప్టెన్