by Suryaa Desk | Fri, Jan 23, 2026, 09:05 PM

తన కుటుంబ సభ్యులు చేసిన దాడి వల్ల భర్త సంపాదన శక్తిని కోల్పోతే, ఆ భార్య భరణం పొందేందుకు అర్హురాలు కాదని అలహాబాద్ హైకోర్టు తీర్పునిచ్చింది. భార్య తరపు వారు జరిపిన కాల్పుల్లో వెన్నెముక దెబ్బతిని హోమియోపతి డాక్టర్ అయిన భర్త వికలాంగుడిగా మారిన కేసులో కోర్టు ఈ వ్యాఖ్యలు చేసింది. భర్త శారీరక స్థితిని పరిగణనలోకి తీసుకున్న కోర్టు, భార్య వేసిన పిటిషన్‌ను తిరస్కరించింది.

భార్యాభర్తల సంబంధం, భరణం చెల్లింపుపై అలహాబాద్ హైకోర్టు ఒక సంచలన తీర్పునిచ్చింది. భార్య కుటుంబ సభ్యులు చేసిన నేరపూరిత దాడి వల్ల.. భర్త తన జీవనోపాధిని కోల్పోతే, ఆ భర్త నుంచి భార్య భరణం కోరలేదని కోర్టు స్పష్టం చేసింది. ఈ మేరకు జస్టిస్ లక్ష్మీ కాంత్ శుక్లా నేతృత్వంలోని సింగిల్ బెంచ్ తీర్పునిస్తూ భార్య దాఖలు చేసిన పిటిషన్‌ను కొట్టేసింది.

ఉత్తర్‌ప్రదేశ్‌లోని కుషీనగర్‌కు చెందిన డాక్టర్ వేద ప్రకాష్ సింగ్ (హోమియోపతి డాక్టర్) మీద 2019లో అతని భార్య తండ్రి, సోదరుడు కలిసి కాల్పులు జరిపారు. ఈ ఘటనలో డాక్టర్ వెన్నెముకకు తీవ్ర గాయాలు అయ్యాయి. డాక్టర్ల సలహా ప్రకారం ఆ బుల్లెట్ పెల్లెట్‌ను శరీరంలో నుంచి తొలగిస్తే ఆయనకు పక్షవాతం వచ్చే అవకాశం ఉండటంతో దాన్ని అలాగే ఉంచారు. దీనివల్ల వేద ప్రకాష్ సింగ్ కనీసం కూర్చోలేక, తన డాక్టర్ వృత్తిని కొనసాగించలేక నిరుద్యోగిగా మారిపోయారు.

కోర్టు చేసిన ప్రధాన వ్యాఖ్యలు

భార్య తరపు వారు చేసిన దాడి వల్ల భర్త సంపాదన శక్తిని కోల్పోయినప్పుడు.. అదే పరిస్థితిని ఆసరాగా చేసుకుని భార్య భరణం అడగడం చట్టవిరుద్ధమని కోర్టు పేర్కొంది. తమ సొంత తప్పిదాల వల్ల కలిగిన నష్టాన్ని అనుకూలంగా మార్చుకుని భరణం కోరడం అన్యాయమని ఈ కేసు విచారణ సందర్భంగా జస్టిస్ శుక్లా అభిప్రాయం వ్యక్తం చేశారు.

సీఆర్‌పీసీ సెక్షన్ 125 ప్రకారం భార్యను పోషించడం భర్త బాధ్యత అయినప్పటికీ.. అది భర్తకు సంపాదించే స్తోమత ఉన్నప్పుడు మాత్రమే వర్తిస్తుందని అలహాబాద్ హైకోర్టు స్పష్టం చేసింది. భర్తను శారీరక అంగవైకల్యానికి గురిచేసి.. మళ్లీ అతని నుంచే భరణం కింద డబ్బు ఆశించడం సామాజిక న్యాయం అనిపించుకోదని కోర్టు ఘాటు వ్యాఖ్యలు చేసింది.

చట్టపరమైన అంశం

సాధారణంగా భారతీయ చట్టాల ప్రకారం భార్యను పోషించాల్సిన బాధ్యత భర్తపై ఉంటుంది. కానీ ఈ కేసులో భర్త తాను పనిచేయలేక, డబ్బులు సంపాదించలేని స్థితిలో ఉన్నట్లు రుజువైనందున.. ఫ్యామిలీ కోర్టు ఇచ్చిన పాత తీర్పును అలహాబాద్ హైకోర్టు సమర్థించింది.