by Suryaa Desk | Sun, Jan 25, 2026, 01:19 PM

పరమశివుడి శిరస్సుపై ఉన్నాననే అహంకారంతో వ్యవహరించిన ఆదిశేషుడికి తగిన శాస్తి జరిగింది. తన ఉనికిని చాటుకోవాలనే అతిశయంతో గర్వించిన శేషుడిని చూసి, శివుడు ఆగ్రహించి అతడిని నేలకేసి కొట్టాడు. ఈ క్రమంలో ఆదిశేషుడి తల ముక్కలై విపరీతమైన వేదనకు గురయ్యాడు. తన తప్పును తెలుసుకున్న శేషుడు, పశ్చాత్తాపంతో విముక్తి మార్గం కోసం వెతకడం ప్రారంభించాడు.
దుఃఖంలో ఉన్న ఆదిశేషుడికి దేవర్షి నారదుడు ప్రత్యక్షమై ఒక మార్గాన్ని సూచించాడు. విఘ్నాలను తొలగించే గణనాథుడిని ప్రార్థిస్తే తప్పక శుభం జరుగుతుందని సలహా ఇచ్చాడు. నారదుడి సూచన మేరకు శేషుడు ఏకాగ్రతతో వినాయకుడిని స్మరిస్తూ కఠినమైన తపస్సు చేశాడు. ఆదిశేషుడి భక్తికి మెచ్చిన గణపతి, అతడికి దర్శనమిచ్చి పూర్వ రూపాన్ని ప్రసాదించి గాయాల నుండి విముక్తి కలిగించాడు.
పూర్వ రూపం పొందిన శేషుడు కృతజ్ఞతాభావంతో వినాయకుడిని ఒక కోరిక కోరాడు. తనను ఎల్లప్పుడూ స్వామి శరీరంలో భాగంగా ధరించాలని ప్రార్థించగా, దయామయుడైన గణపతి అందుకు అంగీకరించాడు. అయితే, ఆ సమయం ఇంకా రాలేదని, సరైన సందర్భం వచ్చినప్పుడు తప్పక తనను దగ్గరకు తీసుకుంటానని శేషుడికి మాట ఇచ్చాడు. ఈ క్రమంలో ఆదిశేషుడు ఆ శుభ తరుణం కోసం నిరీక్షించసాగిడు.
కొంతకాలం తర్వాత, ఒకానొక సందర్భంలో చంద్రుడి పరిహాసం కారణంగా వినాయకుడి ఉదరం పగిలిపోయే పరిస్థితి ఏర్పడింది. ఆ క్లిష్ట సమయంలో పూర్వం తాను ఆదిశేషుడికి ఇచ్చిన మాటను గణపతి గుర్తు చేసుకున్నాడు. వెంటనే శేషుడిని పిలిచి, తన ఉదరం చుట్టూ దట్టిలా (నడుము పట్టిలా) చుట్టుకోమని ఆదేశించాడు. నాటి నుండి వినాయకుడు 'నాగయజ్ఞోపవీతుడి'గా, ఆదిశేషుడిని తన కడుపుపై ధరించి భక్తులకు దర్శనమిస్తున్నాడు.