by Suryaa Desk | Sun, Jan 25, 2026, 10:31 PM

ప్రస్తుతం క్రెడిట్ కార్డుల వినియోగం పెరిగింది. బ్యాంకులు, ఫైనాన్షియల్ సంస్థలు చాలా సులభంగా కార్డులను జారీ చేస్తున్నాయి. దీంతో చాలా మంది రెండు, ఆపైన కంపెనీలకు చెందిన కార్డులను వినియోగిస్తున్నారు. అలాగే బ్యాంకు ఖాతాలు సైతం రెండు, మూడు ఉంటున్నాయి. వాటితో పాటు డెబిట్ కార్డులను సైతం తీసుకుంటారు. ఇలా నాలుగైదు బ్యాంకులకు చెందిన క్రెడిట్ కార్డులు, డెబిట్ కార్డులు ఉండడం వల్ల పర్స్ మొత్తం వాటితోనే నిండిపోతుంది. ఇలాంటి సందర్భంలో రెండు పనులకు ఒకటే కార్డు ఉంటే బాగుంటుంది కదా అని అనుకుంటారు. ఇలాంటి ఆలోచన మనలో చాలా మందికే వచ్చి ఉంటుంది. అలాంటి వారందరి కోసమే ప్రముఖ కార్డ్ నెట్‌వర్క్ సంస్థ వీసా క్రెడిట్ కమ్ డెబిట్ కార్డును తీసుకురానుంది. ఈ తరహా కార్డు జపాన్‌లో విజయవంతం అయిన క్రమంలో భారత్‌లోనూ తీసుకురావాలని సన్నాహాలు చేస్తోంది. మరి ఆ వివరాలు తెలుసుకుందాం.

వీసా ఫ్లెక్సిబుల్ క్రెడిన్షియల్ పేరుతో ఈ కొత్త తరహా కార్డును తీసుకురానున్నట్లు తెలుస్తోంది. ఈ కార్డును క్రెడిట్ కార్డు, డెబిట్ కార్డులాగానూ వినియోగించుకోవచ్చు. ట్రాన్సాక్షన్ విలువను బట్టి, మర్చంట్ టైప్ బట్టి, వ్యక్తుల అవసరాలను బట్టి మీకు నచ్చిన విధంగా ఈ కార్డును మార్చుకోవచ్చని వీసా చెబుతోంది. కార్డుపై ఉండే 16 అంకెల సంఖ్యల్లో మాత్రం ఏ మార్పు ఉండదని, చిన్న చిన్న ట్రాన్సాక్షన్లకు డెబిట్ కార్డు, పెద్ద ట్రాన్సాక్షన్లకు క్రెడిట్ కార్డు అని సంబంధితి బ్యాంక్ యాప్‌లో ముందుగానే సెట్ చేసుకోవచ్చని తెలిపింది. అవసరమైతే ప్రీపెయిడ్, ఫారెక్స్ కార్డు గానూ వినియోగించుకునే వీలుంటుందని తెలిపింది. దీంతో వేరు వేరు అవసరాల కోసం వేరు వేరు కార్డులు వినియోగించాల్సిన అవసరం ఉండదని వీసా ఇండియా అండ్ సౌత్ ఏషియా కంట్రీ మేనేజర్ సందీప్ ఘోష్ ఓ మీడియా ఇంటర్వ్యూలో తెలిపారు.

 జపాన్ దేశంలో సుమిటోమో మిత్సుయి బ్యాంకింగ్ కార్పొరేషన్, సుమిటోమో మిత్సుయి కార్డ్ కంపెనీల భాగస్వామ్యంతో వీసా సంస్థ ఆలివ్ పేరుతో ఈ తరహా క్రెడిట్ కమ్ డెబిట్ కార్డును లాంచ్ చేసింది. దీని ద్వారా క్రెడిట్, డెబిట్, రివార్డ్ పాయింట్స్ యాక్సెస్ చేసే వెసులుబాటు కల్పిస్తోంది. సుమారు 50 లక్షల మంది కస్టమర్లు దీనిని వినియోగిస్తున్నారు. వియాత్నం దేశంలోనూ ఇలాంటి సేవలనే వీసా నెట్ వర్క్ మొదలు పెట్టింది.

ఇప్పుడ భారత్ లోనూ ఈ కార్డును తీసుకురావాలని, అందుకు సంబంధించి నియంత్రణ సంస్థల ఆమోదం కోసం దరఖాస్తు చేసుకుంది. వివిధ బ్యాంకులతో కలిసి ఈ కార్డును తీసుకొచ్చే అవకాశం ఉన్నట్లు తెలుస్తోంది. గతంలో ఇండస్ ఇండ్ బ్యాంక్ డెబిట్ కమ్ క్రెడిట్ కార్డును లాంచ్ చేసింది. ఇందులో రెండు రకాల చిప్పులు, రెండు వేరు వేరు నంబర్లు ఉంటాయి. ఒకవైపు డెబిట్ కార్డు, మరోవైపు క్రెడిట్ కార్డులా పని చేస్తుంది.