by Suryaa Desk | Tue, Jan 27, 2026, 07:26 PM

భారత ప్రధాని నరేంద్ర మోదీ, అమెరికా అధ్యక్షుడు డొనాల్డ్ ట్రంప్ మధ్య స్నేహం గురించి అందరికీ తెలిసిందే. ట్రంప్ మొదటిసారి అధికారంలోకి వచ్చినప్పుడు భారత ప్రధాని మోదీతో మంచి స్నేహ సంబంధాలను నెరిపారు. కానీ రెండోసారి అధికారంలోకి వచ్చాక ట్రంప్ అసలు స్వరూపం బయటకు రావడం మొదలైంది. ఆపరేషన్ సింధూర్‌ను తానే ఆపానని ట్రంప్ పదే పదే చెప్పుకున్నారు. భారత్ ఖండించినప్పటికీ అమెరికా అధ్యక్షుడి తీరు మారలేదు. అంతే కాదు పాకిస్థాన్‌తో దోస్తీ చేస్తూ.. భారత్‌పై టారిఫ్‌ల బాంబు వేశారు ట్రంప్.

అంతే కాకుండా భారత ఆర్థిక వ్యవస్థను డెడ్ ఎకానమీ అంటూ ట్రంప్ ఘాటైన వ్యాఖ్యలు చేశారు. తమ మాట వినకపోతే భారత్‌కు భవిష్యత్తు లేదనేది ట్రంప్ మాటల ఉద్దేశం. ఇక అమెరికా వాణిజ్య మంత్రి హోవార్డ్ లుత్నిక్ అయితే.. ‘చూస్తుండండీ, రెండు నెలల్లో ఇండియా మాకు సారీ చెప్పి వాణిజ్య ఒప్పందం కోసం చర్చలు మొదలుపెడదామని కోరుతుంది’ అని చాలా ఓవర్ కాన్ఫిడెన్స్‌తో మాట్లాడారు. భారత్ సంయమనంతో వ్యవహరిస్తూ.. అమెరికాతో వాణిజ్య ఒప్పందం కోసం ప్రయత్నిస్తున్నప్పటికీ.. ట్రంప్, జేడీ వాన్స్ కారణంగా ఒప్పందం పూర్తి కావడం లేదంటూ అమెరికా సెనేటర్ టెడ్ క్రూజ్ మాట్లాడిన ఆడియో వైరల్ అవుతోంది.

తమతో ట్రేడ్ డీల్ చేసుకోవడం మినహా భారత్‌కు మరో దారి లేదని అమెరికా భావించింది. టారిఫ్‌లతో భయపెట్టాలని చూసింది. కానీ భారత్ వెనక్కి తగ్గలేదు. 50 శాతం టారిఫ్‌లు విధించినా సరే, డాలర్‌తో పోలిస్తే రూపాయి మారకం విలువ పడిపోతున్నా సరే భారత ఆర్థిక వ్యవస్థపై ప్రతికూల ప్రభావమేమీ కనిపించలేదు. అంతే కాదు అమెరికా నేతలు మాటలతో కవ్విస్తుంటే.. భారత్ మాత్రం సైలెంట్‌గా తన పని తాను చేసుకుంటూ పోతోంది. అమెరికా పాలకుల వైఖరి అర్థమైన తర్వాత భారత్ తనదైన ఆట మొదలుపెట్టింది.

గత ఏడాది యూకే‌తో వాణిజ్య ఒప్పందం కుదుర్చుకున్న భారత్.. న్యూజిలాండ్‌తోనూ ట్రేడ్ డీల్ చేసుకుంది. ఒమన్‌తో సమగ్ర ఆర్థిక భాగస్వామ్య ఒప్పందం చేసుకుంది. ఇప్పుడు యూరోపియన్ యూనియన్‌తో ఏకంగా మదర్ ఆఫ్ డీల్స్‌గా చెప్పుకుంటున్న స్వేచ్ఛా వాణిజ్య ఒప్పందం కుదుర్చుకుంది. ఆస్ట్రేలియా, కెనడా, చిలీ లాంటి దేశాలతోనూ వాణిజ్య ఒప్పందాలు కుదుర్చుకోవడానికి భారత్ చర్చలు జరుపుతోంది. తద్వారా అమెరికాకు ప్రత్యామ్నాయ మార్కెట్లు లభించడంతోపాటు.. మనకు అవసరమైన వనరులను ఈ దేశాల నుంచి పొందడానికి అవకాశం కలగనుంది.

ట్రంప్ వైఖరి వల్ల భారత్‌తోపాటు యూరప్ దేశాలు సైతం విసిగిపోయాయి. అమెరికా పొరుగు ఉన్న కెనడాకు సైతం అగ్రరాజ్యం తీరు ఏమాత్రం నచ్చడం లేదు. అమెరికాను మళ్లీ గొప్పదేశంగా నిలబెడతామని టారిఫ్ వార్ మొదలుపెట్టిన ట్రంప్.. ప్రపంచంపై తన ఆధిపత్యాన్ని నిలబెట్టుకోవడానికి పడరాని పాట్లు పడుతున్నారు. ఇదే సమయంలో అమెరికా తీరుతో విసిగిపోయిన దేశాలు.. బహుళ ధ్రువ ప్రపంచం దిశగా వేగంగా అడుగులేస్తున్నాయి. ఇందులో భారత్ కీలక పాత్ర పోషిస్తోంది.

రష్యా అధ్యక్షుడు వ్లాదిమిర్ పుతిన్ గత ఏడాది చివర్లో భారత్‌లో పర్యటించారు. ఇటీవలే యూఏఈ అధినేత సైతం మెరుపు పర్యటన చేశారు. జర్మన్ ఛాన్స్‌లర్ ఫ్రెడ్‌రిచ్ మెర్జ్ సైతం భారత్ వచ్చారు. ఇప్పుడు ఈయూ ప్రెసిడెంట్ ఉర్సులా వాన్ డెరె లెయెన్ భారత్‌లో పర్యటించి.. డీల్ చేసుకున్నారు. కెనడా ప్రధాని మార్క్ కేరీ మార్చి నెలలో భారత్‌లో పర్యటించే అవకాశం ఉంది. ఈ సందర్భంగా యురేనియం, మినరల్స్, ఎనర్జీ, ఏఐ విభాగాల్లో కెనడా, భారత్ మధ్య ఒప్పందం కుదరనుందని సమాచారం.

భారత్‌ను దెబ్బకొట్టబోయిన అమెరికా.. ఆంక్షల కోటలో ఏకాకిగా మిగిలిపోయే సూచనలు కనిపిస్తుంటే.. భారత్ మాత్రం క్లిష్ట సమయంలో సంయమనంతో వ్యవహరించి కొత్త శక్తులను కలుపుకొని పోతోంది. తద్వారా అమెరికా, చైనాలకు ప్రత్యామ్నాయం తానని ప్రపంచానికి చాటి చెబుతోంది. తన వ్యవసాయ ఉత్పత్తులు కొనకపోతే.. ఆంక్షలతో ఉక్కిరిబిక్కిరి చేస్తామని అమెరికా హెచ్చరిస్తే.. ప్రత్యామ్నాయ మార్కెట్ల అన్వేషణలో భారత్ దూకుడుగా ముందుకు సాగుతోంది.

అమెరికా రెచ్చగొట్టే మాటలకు భారత్ కొట్టిన సైలెంట్ దెబ్బ ఎలా ఉందో చెప్పడానికి, భారత్-ఈయూ డీల్ పట్ల వాషింగ్టన్ ఎంతగా కుతకుతలాడి పోతోందని చెప్పడానికి.. ఈ డీల్ విషయమై ఆ దేశ స్పందనే నిదర్శనం. ‘‘యూరోపియన్ల కంటే మేమే ఎక్కువ త్యాగాలు చేశాం. రష్యా ఆయిల్ కొంటున్నందుకు భారత్‌పై 25 శాతం సుంకాలు విధించాం. కానీ ఏమైంది.. యూరోపియన్లు ఇండియాతో ట్రేడ్ డీల్ చేసుకున్నారు. ఎవరి కోసమైతే.. మేం భారత్‌పై సుంకాలు విధించామో.. వారు, తమపై యుద్ధానికి తామే నిధులు సమకూరుస్తున్నారు’ అని అమెరికా మంత్రి స్కాట్ బెస్సెంట్ వ్యాఖ్యానించారు.