by Suryaa Desk | Thu, Jan 29, 2026, 11:20 PM

ఈ కొత్త సంవత్సరం 2026లో అప్పుడే జనవరి నెల చివరికి వచ్చేశాం. కొత్త నెల ఫిబ్రవరి మొదలవనుంది. కొత్త నెల అంటే పలు కొత్త రూల్స్ సైతం అమలులోకి వస్తుంటాయి. ఫిబ్రవరి 1, 2026 నుంచి ఐసీఐసీఐ బ్యాంక్ సైతం తమ క్రెడిట్ కార్డులకు సంబంధించిన పలు నిబంధనలను మార్చుతున్నట్లు తెలిపింది. క్రెడిట్ కార్డు బెనిఫిట్స్‌లో పలు ప్రయోజనాలను ఇకపై ఆపేస్తున్నట్లు తెలిపింది. తమ బ్యాంక్ కార్డుల్లోని వివిధ కేటగిరీ కార్డులపై ఈ కొత్త రూల్స్ ప్రభావం చూపనున్నాయని తెలిపింది. మరి ఆ వివరాలు తెలుసుకుందాం.

ఈ కొత్త నిబంధనల్లో భాగంగా ఇప్పటి వరకు ఎంపిక చేసిన కార్డుల ద్వారా అందిస్తున్న బుక్ మై షో కాంప్లిమెంటరీ మూవీ బెనిఫిట్స్ తొలగిస్తున్నట్లు స్పష్టం చేసింది. అయితే, వివిధ కార్డుల ద్వారా ట్రాన్స్‌పోర్ట్, ఇన్సూరెన్స్ చెల్లింపులపై అందించే రివార్డ్ పాయింట్లు కొనసాగుతాయని తెలిపింది. మీ క్రెడిట్ కార్డును సినిమాలు, రోజు వారీ రవాణా లేదా ఇన్సూరెన్స్ పేమెంట్ల కోసం ఉపయోగిస్తే మీకు వచ్చే రివార్డ్ పాయింట్లలో కనిపించనున్నాయని తెలిపింది. ఐసీఐసీఐ బ్యాంక్ హెచ్‌పీసీఎల్ సూపర్ సేవర్ క్రెడిట్ కార్డు కస్టమర్లకు రూ.40 వేల వరకు ఇన్సూరెన్స్ పేమెంట్లు చేస్తే రివార్డ్ పాయింట్లు వస్తాయని తెలిపింది. అలాగే రూ.10 వేల నుంచి రూ.40 వేల వరకు ట్రాన్స్‌పోర్ట్ మెర్చంట్ కేటగిరీ ద్వారా ఖర్చు చేస్తే కస్టమర్లకు రివార్డ్ పాయింట్లు లభిస్తాయని తెలిపింది.

ఐసీఐసీఐ బ్యాంక్ పలు కార్డులపై బుక్ మై షో కాంప్లిమెంటరీ మూవీ బెనిఫిట్స్ తొలగిస్తోంది. ఈ కొత్త రూల్స్ ఫిబ్రవరి 1 నుంచి అమలులోకి రానున్నాయి. ఐసీఐసీఐ బ్యాంక్ ఇన్‌స్టాంట్ ప్లాటినం చిప్ క్రెడిట్ కార్డు, ఐసీఐసీఐ బ్యాంక్ ఇన్‌స్టాంట్ ప్లాటినం క్రెడిట్ కార్డులపై ఈ బెనిఫిట్ ఆపేస్తున్నట్లు ఐసీఐసీఐ బ్యాంక్ వెల్లడించింది.

మరోవైపు.. జనవరి 15, 2026 నుంచే కొన్ని నిబంధనలను ఐసీఐసీఐ బ్యాంక్ మార్చింది. అన్ని రకాల రిటైల్ ఐసీఐసీఐ బ్యాంక్ క్రెడిట్ కార్డు ఛార్జీలను మార్చింది. ఆన్‌లైన్ గేమింగ్ ప్లాట్‌ఫామ్స్ ఖర్చులపై ఈ ఛార్జీలను సవరించింది. డ్రీమ్ 11, రమ్మీ కల్చర్, జంగ్లీ గేమ్స్, ఎంపీఎల్ వంటి వాటిపై ఖర్చు చేస్తే 2 శాతం ఛార్జ్ చెల్లించాలని కొత్త రూల్ తెచ్చింది. అలాగే థర్డ్ పార్టీ వాలెట్ లోడింగ్ అనేది ఐసీఐసీఐ బ్యాంక్ క్రెడిట్ కార్డు ట్రాన్సాక్షన్లు చేసినప్పుడు రూ.5000 ఆపైన ఉంటే 1 శాతం ఫీ చెల్లించాల్సి ఉంటుంది.