by Suryaa Desk | Fri, Jan 30, 2026, 08:10 PM

వరుసగా జరుగుతున్న గోల్డ్ చైన్ దొంగతనాల కేసులు.. పోలీసులకు పెను సవాల్‌ విసిరాయి. దీంతో రంగంలోకి దిగిన పోలీస్ టీమ్.. చైనా స్నాచర్ల పని పట్టేందుకు స్పెషల్ ఆపరేషన్ చేపట్టింది. ఈ ఆపరేషన్‌లో భాగంగా ఓ జంటను అరెస్ట్ చేసి.. కూపీ లాగగా అసలు విషయం వెలుగులోకి వచ్చింది. అందంగా తయారై.. దేవాలయాలు, ఉత్సవాలు, బస్సులు, మార్కెట్లకు వెళ్లి.. అక్కడ ఉన్నవారి బంగారు గొలుసులను దొంగతనం చేసేది. అయితే ఓ కేసులో సీసీటీవీ ఫుటేజీలో ఈ దొంగ జంట బాగోతం బయటికి రావడంతో.. పోలీసులు వారిని అరెస్ట్ చేసి విచారణ జరిపారు. దొంగలుగా అనుమానం రాకుండా ఉండేందుకు ఖరీదైన బట్టలు వేసుకుని.. బాగా మేకప్ వేసుకుని చోరీలు చేస్తున్నట్లు గుర్తించారు. ఇందుకు ఆమెకు నెలకు మేకప్ కోసమే రూ.5 లక్షల వరకు ఖర్చు అవుతున్నట్లు తెలుసుకుని పోలీసులే ముక్కున వేలేసుకున్నారు.

కర్ణాటక రాజధాని బెంగళూరులో జరిగిన ఈ ఖరీదైన చోరీల వ్యవహారం ఎట్టకేలకు ఆ దొంగ జంట పట్టుబడటంతో వీడింది. మైసూరు జిల్లాలోని హెచ్‌డీ కోటే తాలుకా చిక్కెహెరూర్‌కు చెందిన గాయత్రి, శ్రీకాంత్ అనే భార్యాభర్తలు.. బెంగళూరులోని కమ్మసాండ్ర వద్ద నివాసం ఉండేవారు. వీరు నగరంలో వెంట్రుకలు, పాత్రల వ్యాపారం చేసేవారు. అయితే అందులో డబ్బులు తక్కువగా రావడంతో.. బాగా డబ్బులు సంపాదించాలనే ఆశ పుట్టింది. దీంతో చిన్న చిన్న దొంగతనాలకు అలవాటయ్యారు.

 ఈ క్రమంలోనే రద్దీ ఎక్కువ ఉండే ప్రాంతాలకు వెళ్లి చైన్ స్నాచింగ్ చేసేవారు. కొన్ని రోజుల క్రితం కేఆర్ పురా పోలీస్ స్టేషన్ పరిధిలోని కావేపు లేఔట్‌లో నివసించే లక్ష్మమ్మ.. దేవసాండ్రలోని మరియమ్మ ఆలయానికి వెళ్లగా.. ఆమె మెడలోని 3 తులాల బంగారు గొలుసు చోరీకి గురైంది. దీంతో ఆమె ఫిర్యాదుతో కేసు నమోదు చేసుకున్న పోలీసులు.. సీసీటీవీ ఫుటేజీ చెక్ చేయగా.. అందులో శ్రీకాంత్, గాయత్రి జంట కనిపించారు.

దీంతో వారిని కమ్మసాండ్రకు సమీపంలో అరెస్ట్ చేసి.. రూ.60 లక్షల విలువైన 398 గ్రాముల బంగారాన్ని స్వాధీనం చేసుకున్నారు. ఈ జంటపై ఇప్పటికే హున్సూర్, చిక్కబళ్లాపూర్, చన్నరాయపట్న, తిరుమని, దొడ్డబళ్లాపూర్ పోలీస్ స్టేషన్లలో పలు కేసులు నమోదు అయ్యాయి. శ్రీకాంత్, గాయత్రిలు ఇప్పటికే పలుమార్లు జైలుకు కూడా వెళ్లి వచ్చినట్లు పోలీసులు వెల్లడించారు. దొంగతనాలకు వెళ్లినపుడు తాము దొంగలు అని గుర్తించకుండా ఉండేందుకు గాయత్రి ఖరీదైన చీరలు ధరించేదని విచారణలో వెల్లడైంది. మేకప్ లేకుండా తాను బయటికి కూడా వెళ్లేదాన్ని కాదని ఆమె పోలీసుల ముందు అంగీకరించింది.