by Suryaa Desk | Mon, Feb 09, 2026, 04:53 PM

రాష్ట్ర రాజధాని అమరావతిని రాబోయే మూడేళ్ల కాలంలోనే ప్రపంచంలోనే అత్యంత నివాసయోగ్యమైన నగరంగా (Most Livable City) తీర్చిదిద్దుతామని ముఖ్యమంత్రి చంద్రబాబు నాయుడు ధీమా వ్యక్తం చేశారు. మంత్రులు, కార్యదర్శులతో జరిగిన సమావేశంలో ఆయన మాట్లాడుతూ, అమరావతి నిర్మాణ పనులను పరుగులు పెట్టించి, అన్ని హంగులతో కూడిన మోడరన్ సిటీగా మార్చడమే తమ ప్రభుత్వ లక్ష్యమని స్పష్టం చేశారు. మౌలిక సదుపాయాల కల్పనతో పాటు పర్యావరణ హితంగా నగరాన్ని అభివృద్ధి చేస్తామని, దీనివల్ల పెట్టుబడులు పెరగడమే కాకుండా ఉపాధి అవకాశాలు మెరుగుపడతాయని ఆయన ఆశాభావం వ్యక్తం చేశారు.
రాష్ట్రానికి జీవనాడి అయిన పోలవరం ప్రాజెక్టుపై కూడా సీఎం కీలక గడువును ప్రకటించారు. 2027లో రాబోయే పుష్కరాల నాటికి పోలవరం ప్రాజెక్టును వంద శాతం పూర్తి చేసి జాతికి అంకితం చేస్తామని హామీ ఇచ్చారు. ప్రాజెక్టు పనుల్లో నాణ్యత విషయంలో ఎక్కడా రాజీ పడకుండా, అనుకున్న సమయానికి రైతులకు సాగునీరు అందించేలా ప్రణాళికలు సిద్ధం చేసినట్లు వెల్లడించారు. గత ప్రభుత్వ వైఫల్యాల వల్ల ప్రాజెక్టు ఆలస్యమైనా, ఇప్పుడు యుద్ధప్రతిపాదికన పనులు సాగుతున్నాయని ఆయన మంత్రులకు వివరించారు.
నిరుద్యోగుల ఆకాంక్షలను నెరవేరుస్తూ విద్యా మరియు పోలీస్ శాఖల్లో నియామక ప్రక్రియను వేగవంతం చేశామని ముఖ్యమంత్రి తెలిపారు. మెగా డీఎస్సీ ద్వారా ఇప్పటికే 16,347 టీచర్ పోస్టుల భర్తీ ప్రక్రియను, అలాగే 5,000 కానిస్టేబుల్ ఉద్యోగాల నియామకాలను ప్రభుత్వం విజయవంతంగా చేపట్టిందని గుర్తు చేశారు. కేవలం ప్రకటనలకే పరిమితం కాకుండా, అత్యంత పారదర్శకంగా అభ్యర్థులకు ఉద్యోగ అవకాశాలు కల్పించడం ద్వారా రాష్ట్రంలో నిరుద్యోగ సమస్యను తగ్గించే దిశగా అడుగులు వేస్తున్నామని చంద్రబాబు ఈ సందర్భంగా పేర్కొన్నారు.
రాష్ట్రంలో దెబ్బతిన్న రోడ్ల నెట్‌వర్క్‌ను పునర్నిర్మించడంపై ప్రభుత్వం ప్రత్యేక దృష్టి సారించిందని సీఎం వివరించారు. ఇప్పటికే సుమారు రూ.1,000 కోట్ల నిధులతో రాష్ట్రవ్యాప్తంగా గుంతల మరమ్మతులు పూర్తి చేశామని, రానున్న రోజుల్లో మరో రూ.3,000 కోట్లతో నూతన రోడ్ల నిర్మాణానికి శ్రీకారం చుట్టినట్లు వెల్లడించారు. ప్రజల ప్రయాణ సౌకర్యార్థం నాణ్యమైన రహదారులను నిర్మించడమే కాకుండా, గ్రామ స్థాయి నుంచి రాజధాని వరకు కనెక్టివిటీని పెంచడం ద్వారా ఆర్థిక పురోగతి సాధిస్తామని ఆయన ధీమా వ్యక్తం చేశారు.