by Suryaa Desk | Tue, Feb 10, 2026, 09:18 PM

ప్రముఖ ప్రవచన కర్త గరికపాటి నరసింహారావు గురించి తెలియని వారుండరు. ఆయన చెప్పే ఆధ్యాత్మిక అంశాల గురించి, ప్రవచనాల గురించి ప్రత్యేకంగా పరిచయం అక్కర్లేదు. పురాణాలు, ఇతిహాసాలలోని సారాంశాన్ని ప్రస్తుత పరిస్థితులకు తగినట్లుగా వర్ణిస్తూ, నేటి యువతకు కనెక్ట్ అయ్యేలా చెప్తుంటారు గరికపాటి. తాజాగా కులాల పుట్టుక గురించి, కుల వివక్ష గురించి గరికపాటి నరసింహారావు తన శైలిలో విశ్లేషించారు. కులం పేరుతో ఒకరిని అవమానించడం లేదా తక్కువ చేసి చూడటం హిందూ ధర్మంలో లేదన్నారు గరికపాటి నరసింహారావు. నేటి సమాజంలో కులవ్యవస్థ చుట్టూ అల్లుకున్న అపోహాలను తన విశ్లేషణల ద్వారా బద్దలు కొట్టే ప్రయత్నం చేశారు.

ఈ క్రమంలోనే భగవద్గీతలోని అంశాలను గరికపాటి నరసింహారావు ప్రస్తావించారు. గీతలో కృష్ణ పరమాత్ముడు చాతుర్వర్ణ్యం మయా సృష్టం గుణకర్మ విభాగశః అని చెప్పిన విషయాన్ని గుర్తు చేశారు. గుణకర్మల ఆధారంగానే వర్ణ వ్యవస్థ ఏర్పడిందే తప్ప.. వ్యక్తి పుట్టుక ఆధారంగా కులాలు ఏర్పడలేదన్నారు. ఓ వ్యక్తి గుణం, అతను చేసే కర్మ అంటే పని ఆధారంగానే కుల వ్యవస్థ ఏర్పడిందని అన్నారు. బ్రాహ్మణ కుటుంబంలో జన్నించిన ప్రతి ఒక్కరూ బ్రాహ్మణులు కాలేరని.. బ్రాహ్మణుడికి ఉండాల్సిన లక్షణాలు లేని వ్యక్తి, ఆ వృత్తిని పాటించని వ్యక్తికి.. బ్రాహ్మణుడిగా చెప్పుకునే అర్హత ఉండదన్నారు. గిరిజనుడు వేదాలు చదువుకుని పాఠాలు బోధిస్తే.. అతనే అసలైన బ్రాహ్మణుడని ధర్మశాస్త్రం చెప్తోందని గరికపాటి వివరించారు.

  అగ్రకులంలో పుట్టి, సమాజానికి హానికరంగా ప్రవర్తిస్తూ ఉంటే అతణన్ని అధముడిగా పరిగణించాలన్నారు. మధ్యయుగంలో కొన్ని స్వార్థంతో కూడిన ఆలోచనలు, అపోహల వలనే ఈ కుల వివక్ష సమాజంలో స్థిరపడిపోయిందని గరికపాటి తెలిపారు. అసలైన ధర్మాన్ని పట్టించుకోకుండా, పైపైన ఆచారాలను పట్టుకుని వేలాడటంతోనే సమాజంలో విభజన కనిపిస్తోందన్నారు. కృష్ణ పరమాత్మ బోధించిన గీతా సారాంశాన్ని అర్థం చేసుకుంటే సమాజంలో ఈ కుల వివక్ష ఉండదని గరికపాటి నరసింహారావు విశ్లేషించారు.

ఇంటి గుమ్మం వరకే మన కులమని, ఇంటి గడప దాటితే మనదంతా ఒకే సమాజమని గరికపాటి నరసింహారావు గతంలోనూ పలుమార్లు ఉద్బోధించారు. సమాజంలో ధనికులు, పేదలు అనే రెండు కులాలు మాత్రమే ఉన్నాయని.. ప్రతీ కులంలోని వ్యక్తులు.. తమ కులంలోని పేద ప్రజలకు చేయూతనందిస్తే సమాజం అభివృద్ధి చెందుతుందని గరికపాటి గతంలో పలు సందర్భాలలో చెప్పారు.