by Suryaa Desk | Wed, Feb 11, 2026, 11:20 PM

ఎక్కువగా ఇంట్లో పూల మొక్కలు పెంచుతుంటారు. అయితే, మనం కాస్తా ఓపిక తెచ్చుకుంటే కూరగాయల, పండ్ల మొక్కల్ని కూడా పెంచుకోవచ్చు. అందులో టమాటలు కూడా ఉంటాయి. వాటిని పెంచాలంటే బయటి నుంచి విత్తనాలే కొనుక్కొచ్చి పెంచడం కాదు. ఇంట్లోని టమాటలు కూడా చాలు. చక్కగా మొక్కల్ని పెంచుకోవచ్చు. కొన్ని కిటుకులు తెలిస్తే చాలు కెమికల్ లేకుండానే మన ఇంటి వంటకోసం మనం ఇంట్లో టమాట మొక్కల్ని పెంచొచ్చు. దానికోసం ఏం చేయాలంటే

టమాటల్ని కట్ చేయడం

ముందుగా ఓ టమాట తీసుకోండి. దానిని గుండ్రంగా ముక్కలుగా కట్ చేయాలి. తీసుకునే టమాట మంచి నాటు టమాట ఉంటే బాగుంటుంది. దీని వల్ల కూరలు రుచిగా ఉంటాయి. పల్ప్ ఎక్కువగా ఉంటుంది. కాబట్టి అలాంటి నాటురకం టమాటల్ని కొనుక్కుని దానిని గుండ్రంగా కట్ చేయాలి.

కుండీలో పెట్టడం

గుండ్రంగా కట్ చేసిన టమాట ముక్కని కుండీలో పెట్టాలి. చిన్న కుండీ అయినా పర్లేదు 70 శాతం వరకూ మట్టితో నింపి తర్వాత టమాట ముక్కని వేసి మళ్లీ పైనుంచి మట్టిని వేయండి. ఇలా మొత్తంగా కవర్ అయ్యాక నీరు పట్టండి. మరీ ఎక్కువ వద్దు మట్టి తడిస్తే చాలు.

మొలకలు రావడం

ఇలా నాటిన మొక్కకి రోజుకి ఓ సారి నీరు పట్టండి. మెల్లిగా ఐదారు రోజుల నుండి మొదలు వారం రోజుల్లోపు మొలకలు వస్తాయి. అదే నెలలోపు చక్కగా మొక్కలు పెరుగుతాయి. ఇవి ఒకటి రెండు కంటే ఎక్కువగానే పెరుగుతాయి. వీటిని అలానే చక్కగా నెలవరకూ కాపాడండి.

పెద్ద కుండీల్లో నాటడం

ఇప్పుడు పెరిగిన మొక్కల్ని కాస్తా పెద్ద కుండీల్లో ముందుగా మట్టి, ఆవు పేడ, నీమ్ కేక్ పౌడర్ ఇలా వేసి చక్కగా తయారుచేసి పెట్టాలి. అలా తయారుచేసిన కుండీల్లో ఒక్కో దాంట్లో ఒక్కో మొక్కని పెట్టండి. కుండీ కాస్తా పెద్దదైతే దూరందూరం పెట్టండి. పెట్టిన తర్వాత నీరు పోయండి.

ఇంట్లోనే టమాట మొక్కల్ని పెంచడం ఎలా

నాటిన మొక్కకి

ఇప్పుడు నాటిన మొక్కని మనం ఎండ తగిలేలా చూడండి. వీటికి మనం రోజు విడిచి రోజూ నీరు పట్టాలి. అంతేకాకుండా, ఇంట్లోనే తయారుచేసిన ఎరువుని కూడా వాడొచ్చు. కంపోస్ట్‌లా వీటిని వాడడం వల్ల చెట్లు చక్కగా పెరుగుతాయి. గాలి, వెలుతురు తగిలేలా చూస్తూ వీటిని పెంచండి. ఇలా పెంచడం వల్ల ఎలాంటి ఎరువులు లేకుండానే మీరు మొక్కల్ని పెంచొచ్చు.