by Suryaa Desk | Tue, Apr 28, 2026, 09:39 PM

పంజాబ్ కింగ్స్ జట్టులోని స్టార్ ఆల్‌రౌండర్ అజ్మతుల్లా ఒమర్జాయ్ తల్లి సోమవారం (ఏప్రిల్ 27) కన్నుమూశారు. ఈ దుర్ఘటనతో ఒమర్జాయ్ వెంటనే తన స్వదేశం ఆఫ్ఘనిస్తాన్‌కు బయలుదేరాడు.తన సహచర ఆటగాడికి జరిగిన ఈ విషాద సమయంలో అండగా నిలవాలని నిర్ణయించిన పంజాబ్ కింగ్స్ యాజమాన్యం మరియు ఆటగాళ్లు, ఆమె ఆత్మకు శాంతి చేకూరాలని కోరుతూ మంగళవారం జరిగిన మ్యాచ్‌లో నల్ల రిబ్బన్లు ధరించి నివాళులర్పించారు.ఈ ఘటనపై పంజాబ్ కింగ్స్ ఫ్రాంచైజీ సోషల్ మీడియా ద్వారా స్పందించింది. “అజ్మతుల్లా ఒమర్జాయ్ తల్లి మరణం మమ్మల్ని తీవ్రంగా బాధించింది. ఈ కష్ట సమయంలో పంజాబ్ కింగ్స్ కుటుంబం ఆయనకు, ఆయన కుటుంబానికి అండగా ఉంటుంది” అని పేర్కొంది.మ్యాచ్ సందర్భంగా టాస్ సమయంలో కూడా జట్టు కెప్టెన్ శ్రేయాస్ అయ్యర్ భావోద్వేగంగా స్పందించారు. “ఈ కష్ట సమయంలో అజ్మతుల్లా మరియు ఆయన కుటుంబానికి మా ప్రగాఢ సానుభూతి. మేమంతా ఆయనకు తోడుగా ఉంటాం” అని అయ్యర్ తెలిపారు. కెప్టెన్‌గా ఆయన చూపిన మానవతా భావానికి అభిమానుల నుంచి ప్రశంసలు లభిస్తున్నాయి.ఐపీఎల్ 2026 సీజన్ విషయానికి వస్తే, పంజాబ్ కింగ్స్ ఇప్పటివరకు ఆడిన అన్ని మ్యాచ్‌ల్లోనూ అజేయంగా కొనసాగుతోంది. అయితే అజ్మతుల్లా ఒమర్జాయ్‌కు ఈ సీజన్‌లో ఇప్పటివరకు ఆడే అవకాశం రాలేదు. విదేశీ ఆటగాళ్ల కోటాలో మార్కస్ స్టోయినిస్, కూపర్ కానోలీ, మార్కో జాన్సెన్‌లకు ప్రాధాన్యం లభిస్తోంది. అయినప్పటికీ, గత ఏడాది 2.4 కోట్ల రూపాయలకు కొనుగోలు చేసిన ఒమర్జాయ్ జట్టులో కీలక సభ్యుడిగానే ఉన్నారు. ఆయన త్వరలోనే తిరిగి జట్టుతో కలుస్తారని సమాచారం.