స్మితా కామెంట్లపై మంత్రి సీతక్క సీరియస్

 'సివిల్‌ సర్వీస్‌ ఉద్యోగాల్లో దివ్యాంగ కోటా ఎందుకు?' అని సీనియర్ ఐఏఎస్ అధికారిణి స్మితా సబర్వాల్ చేసిన ట్వీట్‌పై నెటిజన్లు రెండు వర్గాలుగా విడుపోయి తమ తమ అభిప్రాయాలను వ్యక్తం చేస్తున్నారు. అయితే స్మితా చేసిన కామెంట్లపై దివ్యాంగులు తీవ్ర స్థాయిలో మండిపడుతున్నారు. యూపిఎస్సీలో దివ్యాంగుల రిజర్వేషన్లు వ్యతిరేకిస్తూ స్మితా చేసిన కామెంట్స్‌పై ప్రభుత్వం యాక్షన్ తీసుకోవాలని సివిల్స్ ర్యాంకర్, మెంటార్ బాలలత డిమాండ్ చేశారు. తాను ఇప్పుడు కూడా సివిల్స్ పరీక్ష రాస్తానని.. తనకన్నా ఎక్కువ మార్కులు సాధించాలని స్మితాకు బాలలత సవాల్ విసిరారు.

పలువురు రాజకీయ నాయకులు కూడా స్మితా కామెంట్లను తప్పుబడుతున్నారు. తాజాగా.. స్మితా సబర్వాల్ చేసిన కామెంట్లపై తెలంగాణ పంచాయతీ రాజ్ శాఖ మంత్రి సీతక్క రియాక్ట్ అయ్యారు. ఐఏఎస్ అధికారులు అంటే బాధ్యతగా ఉండాలన్నారు. ఉన్నతాధికారి హోదాలో ఉండి దివ్యాంగులపై అలా మాట్లాడడం సరికాదన్నారు. ఇలా వైకల్యాన్ని కించపరచవద్దని సూచించారు. దివ్యాంగులపై ఇలాంటి వ్యాఖ్యలు చేసే వాళ్ల బుద్ది వైకల్యం బయటపడుతుందని చురకలంటించారు. వైకల్యాన్ని చూసి అన్ ఫిట్ అనొద్దని అన్నారు. ఐఏఎస్ అంటే బుద్ధితో పనిచేయాలి ఫిజికల్‌గా కాదని అన్నారు. స్మితా సబర్వాల్ అంశం సీఎం రేవంత్ దృష్టిలో ఉండి ఉంటదని చెప్పారు.

 ఇక స్మితా సబర్వాల్ కామెంట్లపై దివ్యాంగులు రాష్ట్రవ్యాప్తంగా పలు పోలీస్ స్టేషన్లలో ఫిర్యాదులు చేస్తున్నారు. రంగారెడ్డి జిల్లా ఇబ్రహీంపట్నం పోలీస్ స్టేషన్‌లో వికలాంగుల హక్కుల పోరాట సమితి రాష్ట్ర అధ్యక్షుడు జంగయ్య ఫిర్యాదు చేశారు. దివ్యాంగుల మనోభావాలను దెబ్బతీసే విధంగా సబర్వాల్ మాట్లాడారన్నారు. ఆమెపై చర్యలు తీసుకోవాలని మానవ హక్కుల కమిషనర్‌కు ఫిర్యాదు చేస్తామని అన్నారు. ఉన్నత స్థానంలో ఉండి ఇలాంటి వ్యాఖ్యలు చేయడం ఏంటని ఆయన ప్రశ్నించారు.

బాలలత సవాల్‌కు స్మితా రిప్లయ్.. దమ్ముంటే తనతో ఎగ్జామ్ రాయాలంటూ సివిల్స్ మెంటార్ బాలలత చేసిన సవాల్‌ను స్మితా సబర్వాల్‌ స్వీకరించారు. అయితే తన వయసు దాటిపోవడంతో అందుకు యూపీఎస్సీ నిబంధనలు ఒప్పుకోవంటూ ట్వీట్ చేశారు. అయితే బాలలత తన ప్రశ్నకు సమాధానమివ్వాలని డిమాండ్ చేశారు. ఆమె తన దివ్యాంగ రిజర్వేషన్‌ను ప్రజలకు ఫీల్డ్‌ వర్క్ కోసం వినియోగించారా ? లేక కోచింగ్ సంస్థలు నడిపేందుకు వాడారా? అని స్మితా ప్రశ్నించారు.