రేవంత్ సర్కార్ చెప్పేదే నిజమైతే.. అతని మరణానికి బాధ్యులెవరు

సూర్యాపేట జిల్లా కేంద్రంలో విషాదం చోటు చేసుకుంది. జిల్లా కేంద్రంలోని ప్రభుత్వాసుపత్రిలో పని చేస్తున్న వసీమ్ అనే వ్యక్తి ఆత్మహత్యకు పాల్పడ్డాడు. సరిగ్గా జీతాలు రాకపోవటం, కుటుంబ సమస్యలతో అతడు ఉరేసుకొని సూసైడ్ చేసుకున్నట్లు తెలిసింది. ఈ మేరకు వసీమ్ తన భార్యకు రాసిన సూసైడ్ లెటర్ వైరల్‌గా మారింది. తనను క్షమించాలంటూ ఆమెకు రాసిన లెటర్ కన్నీళ్లు పెట్టిస్తోంది. 'డియర్ రజనీ. నిన్ను చాలా బాధపెట్టా. పిల్లలు జాగ్రత్. మనకు ఎవరూ లేరు. పిల్లలు అలా కాకూడదని చాలా ఊహలు కన్నా. కానీ ఏదీ కుదరలేదు. వచ్చే జన్మంటూ ఉంటే మాత్రం మన పిల్లల్లో ఎవరికైనా కొడుకుగా పుడతా' అని సూసైడ్ నోట్ రాశారు. తాను కొందరి వద్ద అప్పు తీసుకున్నానని.. వీలైతే ఆ అప్పును చెల్లించాలని భార్యను సూసైడ్ లెటర్‌లో విజ్ఞప్తి చేశాడు.

కాగా, వసీమ్ మృతిపై ప్రభుత్వంపై ప్రతిపక్షాలు తీవ్రస్థాయిలో ఆరోపణలు చేస్తున్నాయి. ప్రభుత్వ ఉద్యోగులందరికీ ప్రతి నెలా ఒకటో తేదీనే జీతాలిస్తున్నట్లు కాంగ్రెస్ నేతలు చెబుతున్న మాటలన్నీ అవాస్తవాలని బీఆర్ఎస్ వర్కింగ్ ప్రెసిడెంట్ కేటీఆర్ విమర్శించారు. వసీమ్ అనే ఉద్యోగి 3 నెలలుగా జీతాలు రాక మనస్తాపంతో ఆత్మహత్య చేసుకున్నాడని ట్విట్టర్ ఎక్స్‌లో పోస్టు చేశారు. వసీమ్ మరణానికి బాధ్యులెవరు? అని కేటీఆర్ ప్రశ్నించారు.

'ప్రతినెలా 1వ తేదీన ప్రభుత్వ ఉద్యోగులందరికీ జీతాలు అందిస్తున్నామని కాంగ్రెస్ ప్రభుత్వం పెద్ద ఎత్తున ప్రచారం చేస్తోంది. వారు చెప్పేవి పూర్తిగా అబద్ధాలు. పూర్తిగా వైఫల్యానికి ఉదాహరణ ఇది. మూడు నెలలుగా జీతం రాకపోవడంతో మనస్తాపంతో సూర్యాపేట ప్రభుత్వ ఆసుపత్రిలో వసీమ్ అనే ఉద్యోగి ఆత్మహత్య చేసుకున్నాడు. అతని ప్రాణ నష్టానికి బాధ్యులెవరు ?' అని కేటీఆర్ ట్విట్టర్‌లో ప్రభుత్వంపై మండిపడ్డారు.

కాగా, వసీమ్ మృతిపై పోలీసులు కేసు నమోదు చేసుకొని విచారణ చేపట్టారు. మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు. మృతికి కుటుంబ సమస్యలు కారణమా? లేక ఉద్యోగం చేసే చోట ఏమైనా ఘర్షణ జరిగిందా? అనే కోణంలో విచారణ ముమ్మరం చేశారు. విచారణ తర్వాత పూర్తిస్థాయి విషయాలు వెలగులోకి వచ్చే అవకాశం ఉంది.