35 వేల స్టైపెండ్, ఇందిరమ్మ ఇండ్లు ఇవ్వండి.. సీఎం రేవంత్‌‌కు ట్రాన్స్ జెండర్ల విజ్ఞప్తి

ట్రాఫిక్ నియంత్రించేందుకు ట్రాన్స్ జెండర్లను వాలంటీర్లుగా తీసుకోవాలని సీఎం రేవంత్ రెడ్డి నిర్ణయం తీసుకోవడం గొప్ప విషయమని.. హైదరాబాద్‌కు చెందిన ట్రాన్స్ జెండర్లు హర్షం వ్యక్తం చేశారు. ఈ సందర్భంగా.. ముఖ్యమంత్రి రేవంత్ రెడ్డికి కృతజ్ఞతలు తెలిపారు. ఇన్ని రోజులూ తమను చీదరించుకున్న సమాజం.. ఇక నుంచైనా తమను స్వాగతిస్తుందని ఆశిస్తున్నట్టు చెప్పుకొచ్చారు. ట్రాఫిక్ నియంత్రణలో తమ వంతు కృషి అందిస్తామని చెప్పుకొచ్చారు. ఆసక్తిగా ఉన్నవారి వివరాలను అధికారులు సేకరిస్తున్నారని తెలిపిన ట్రాన్స్ జెండర్లు.. ఇదే సందర్భంగా ప్రభుత్వానికి, సీఎం రేవంత్ రెడ్డికి తమ కోరికల చిట్టాను వినిపించారు.

కేవలం హైదరాబాద్‌లోనే 5000 మంది ట్రాన్స్ జెండర్స్ ఉన్నారని.. ఇక రాష్ట్రవ్యాప్తంగా 10,000 మంది ట్రాన్స్ జెండర్లు ఉంటారని తెలిపారు. అర్హులైన, ఆసక్తి ఉన్నవారికి ట్రాఫిక్ వాలంటీర్లుగా అవకాశం ఇవ్వాలని కోరారు. ముందుగా తెలంగాణ, హైదరాబాద్ వ్యాప్తంగా ఉన్నవారికి అవకాశం ఇవ్వాలని.. ఆ తర్వాతే ఇతర రాష్ట్రాల నుంచి వచ్చిన ఫ్రెండ్స్ జెండర్స్‌కు కూడా అవకాశం ఇవ్వాలని విజ్ఞప్తి చేశారు.

కాగా.. ట్రాన్స్ జెండర్స్ వాలంటీర్స్‌కు 35 వేల స్టైపెండ్ ఇవ్వాలని ప్రభుత్వానికి విజ్ఞప్తి చేశారు. తమను సమాజం చీదరించిందని.. కానీ తమలో మానవత్వం ఉందన్నారు. ఆ మానవత్వంతోనే ట్రాఫిక్ నియంత్రించేందుకు సమాజానికి సేవ చేస్తామన్నారు. తమకు కేవలం ట్రాఫిక్‌ నియంత్రణలోనే కాకుండా.. జీహెచ్ఎంసీ ఇతర శాఖల్లో కూడా ఉద్యోగాలు కల్పించాలని కోరారు. ఇందిరమ్మ ఇండ్లు కూడా ఇవ్వాలని కోరుకున్నారు.

సమాజంలో ఎలాంటి ఉపాధి అవకాశాలు దొరక్క.. చివరికి యాచించటమే తమ వృత్తి అన్నట్టుగా మారిపోయిన ట్రాన్స్ జెండర్లకు ఉపాధి అవకాశం కల్పించేందుకు సీఎం రేవంత్ రెడ్డి కీలక నిర్ణయం తీసుకున్నారు. హైదరాబాద్ ట్రాఫిక్ నియంత్రణలో కొత్త ప్రయోగానికి ముఖ్యమంత్రి ఎ.రేవంత్ రెడ్డి నిర్ణయం తీసుకున్నారు. సిటీ పరిధిలో ట్రాఫిక్ నియంత్రించేందుకు ట్రాన్స్ జెండర్ లను వలంటీర్లుగా నియమించుకోవాలని అధికారులకు సూచించారు. ట్రాఫిక్ పోలీస్ విభాగంతో పాటు హోమ్ గార్డ్స్ ప్రస్తుతం సిటీలో ఈ విధులు నిర్వహిస్తున్నారు. హోం గార్డ్స్ తరహాలోనే ట్రాన్స్ జెండర్లకు ఈ విధులు అప్పగించాలని ముఖ్యమంత్రి సూచించారు.

ప్రతి నెలా వారికి కొంత స్టైపెండ్ ఇవ్వాలని, దీంతో వారికి కొంతమేరకు ఉపాధి కల్పించినట్లవుతుందని అన్నారు. అందుకు ఆసక్తిగా ఉన్న ట్రాన్స్జెండర్ల వివరాలను సేకరించాలని ముఖ్యమంత్రి అధికారులకు ఆదేశించారు. వారం, పది రోజుల పాటు వారికి అవసరమైన ప్రత్యేక శిక్షణను కూడా అందించాలని చెప్పారు. విధుల్లో ఉండే ట్రాన్స్జెండర్లకు ప్రత్యేక యూనిఫామ్ కూడా ఉండాలని అధికారులకు సూచించారు