హైదరాబాద్‌‌వాసులకు సూపర్ న్యూస్.. మెట్రో రైల్వే స్టేషన్‌ల నుంచి మాల్స్‌కు స్కైవాక్‌

హైదరాబాద్‌ మెట్రోకు సంబంధించి ఎల్ అండ్ టీ కీలక నిర్ణయం తీసుకుంది. స్కైవాక్‌లు మెట్రోరైలు స్టేషన్ల నుంచి సమీపంలోని మెట్రో మాల్స్‌ వరకు మాత్రమే ఇప్పటివరకు పరిమితం అయ్యేవి.. కానీ ఇప్పుడు తొలిసారి ప్రైవేటు మాల్‌కు స్కైవేతో అనుసంధానం చేస్తున్నారు. ఈ మేరకు కూకట్‌పల్లి వై జంక్షన్‌లో నిర్మాణం చేస్తున్న ఒక బడా మాల్‌కు స్కైవాక్‌తో అనుసంధానం చేశారు. మాల్ నిర్మిస్తున్న సంస్థ ఈ స్కైవాక్‌ను మెట్రో స్టేషన్ నుంచి నేరుగా తమ మాల్ వరకు నిర్మించుకుంటోంది. ఈ మేరకు స్కైవాక్‌‌, మాల్‌ అనుసంధానానికి.. ఎల్‌ అండ్‌ టీ హైదరాబాద్‌ మెట్రోరైలు సంస్థ, హెచ్‌ఎంఆర్‌ అనుమతులు ఇచ్చాయి.

మెట్రోరైలు రావడంతో నగరంలో సరికొత్త మార్పులు కనిపిస్తున్నాయి. తాజాగా స్కైవాక్‌లను తీసుకొస్తున్నారు.. మెట్రో స్టేషన్‌ నుంచి రోడ్డుపైకి రావాల్సిన అవసరం లేకుండా నేరుగా దగ్గరలో ఉండే మాల్స్‌కి స్కైవాక్‌ ద్వారా వెళ్లేలా ప్లాన్ చేశారు. కూకట్‌పల్లి వై జంక్షన్‌లో ఈ స్కైవాక్ ఏర్పాటు చేస్తుండగా.. మాదాపూర్, పంజాగుట్టలో ఈ తరహా సదుపాయం ఉంది. నగరవాసులు షాపింగ్, డైనింగ్, సినిమాలు చూసి సరదాగా గడిపి తిరిగి మెట్రోలో వెళ్లిపోయేలా ఈ స్కైవాక్‌లను ప్లాన్ చేశారు. రోడ్డుపైకి వెళ్లడం కంటే.. ఇలా స్కైవాక్స్‌ సౌకర్యంగా ఉన్నాయని ప్రయాణికులు అంటున్నారు.. ఎక్కువ మంది ప్రయాణికులు ఉపయోగిస్తున్నారు. ఉప్పల్‌‌లో‌ స్కైవాక్‌ ఏర్పాటు చేసిన సంగతి తెలిసిందే.

ఈ స్కైవాక్‌ల గురించి ప్రయాణికులకు తెలియజేయడానికి ఎల్ అండ్ టీ నిర్మించిన మాల్స్‌కు అనుసంధానం చేశారు. అంతేకాదు మెట్రో రైలు మార్గంలో ప్రైవేట్ మాల్స్, కార్యాలయాలు కోరితే వారి భవనాలను అనుసంధానించేందుకు అవకాశం ఇస్తామని గతంలోనే ప్రకటించిన సంగతి తెలిసిందే. ఈ క్రమంలో మాదాపూర్‌లో ఉన్న రహేజా మైండ్ స్పేస్ స్కైవాక్ కోసం ముందుకొచ్చింది. అక్కడ మెట్రో స్టేషన్‌ నుంచి ఐటీ పార్క్‌ను కలిపేలా స్కైవాక్‌ ఏర్పాటు చేశారు. తాజాగా కూకట్‌పల్లి వై జంక్షన్‌లో నిర్మిస్తున్న అతిపెద్ద మాల్‌ కూడా ముందుకు రావడంతో అక్కడ స్కైవాక్ తీసుకొస్తున్నారు. స్కైవాక్‌ అనుసంధానం చేసే మొదటి మాల్‌ ఇదే. వచ్చే ఏడాది ఈ మాల్‌ని, స్కైవాక్‌ని ప్రారంభించాలని ప్లాన్ చేస్తున్నారు.