రామాంతపూర్‌లో భారీ అగ్ని ప్రమాదం.. పార్కింగ్‌లోని 8 బైకులు దగ్ధం, అసలేం జరిగింది

హైదరాబాద్ రామంతాపూర్‌లో భారీ అగ్ని ప్రమాదం చోటు చేసుకుంది. వివేక్ నగర్‌లోని ఓ ఇంట్లో ఇవాళ తెల్లవారుజామున ఫైర్ యాక్సిడెంట్ జరిగింది. పార్కింగ్‌లోని 8 బైకులు పూర్తిగా దగ్ధమయ్యాయి. ఉన్నట్లుంటి మంటలు వ్యాపించి పార్కింగ్‌ ప్లేస్‌లో నిలిపి ఉంచిన బైకులు కాలి బూడిదయ్యాయి. తెల్లవారుజామున 3.30 ప్రాంతంలో మంటలు చెలరేగటంతో ఎవరూ గమనించలేదు. అయితే ప్రమాదంలో ప్రాణ నష్టం జరగకపోవటంతో అందరూ ఊపిరి పీల్చుకున్నారు.

ప్రమాదానికి కారణం పార్కింగ్‌లో నిలిపి ఉంచిన బ్యాటరీ బైకులుగా అనుమానిస్తున్నారు. ఇటీవల కాలంలో బ్యాటరీ బైకులు పేలుతున్న ఘటనలు తరుచుగా చోటు చేసుకుంటున్నాయి. ఈ ఘటనలో బ్యాటరీ బైకులే ప్రమాదానికి కారణంగా అనుమానిస్తున్నారు. మెుత్తం 8 బైకుల్లో రెండు బ్యాటరీ బైకులు ఉన్నాయి. అందులో ఓ బైక్ బ్యాటరీ పేలటంతోనే మంటలు వ్యాపించినట్లు స్థానికులు అనుమానిస్తున్నారు. సమాచారం అందుకున్న అగ్నిమాపక సిబ్బంది, పోలీసులు అక్కడకు చేరుకొని మంటల్ని అదుపులోకి తీసుకొచ్చారు.

అయితే పార్కింగ్ స్థలంలో సీసీ కెమెరాలు లేకపోవటంతో ప్రమాదం ఎలా జరిగిందనే దానిపై ప్రస్తుతానికి స్పష్టత లేదని పోలీసులు తెలిపారు. బ్యాటరీ వాహనం పేలటంతో ప్రమాదం జరిగిందా..? లేదా ఎవరైనా కావాలని నిప్పు పెట్టారా..? అనే కోణంలో విచారణ చేపట్టినట్లు పోలీసులు వెల్లడించారు. ఘటనపై కేసు నమోదు చేసుకొని ప్రమాద ఘటనపై ఆరా తీస్తున్నట్లు చెప్పారు.

జీడిమెట్లలోనూ భారీ అగ్ని ప్రమాదం..

హైదరాబాద్ జీడిమెట్ల పారిశ్రామికవాడలోనూ భారీ అగ్ని ప్రమాదం చోటు చేసుకుంది. పాలిథిన్ సంచులు తయారు చేసే ఎస్‌ఎస్‌వీ ఫ్యాబ్ పరిశ్రమలో మంటలు అంటున్నాయి. కింది అంతస్తులో భారీ మొత్తంలో ప్లాస్టిక్‌ ఉండటంతో ప్రమాద తీవ్రత పెరిగింది. మంగళవారం (నవంబర్ 26) మధ్యాహ్నం అగ్ని ప్రమాదం జరగ్గా.. అప్పటి నుంచి మంటలను అదుపు చేసేందుకు ఫైర్ డిపార్ట్‌మెంట్ తీవ్రంగా శ్రమిస్తున్నారు. నేడు మధ్యాహ్నానికి మంటలు పూర్తిగా ఆర్పే అవకాశముంది. నాలుగు ఫైర్ ఇంజిన్ల సాయంతో సిబ్బంది మంటలను అదుపు తీసుకొచ్చేందుకు ప్రయత్నిస్తున్నారు. ఈ అగ్ని ప్రమాదంతో పరిసర ప్రాంత ప్రజలు తీవ్ర భయాందోళనకు గురవుతున్నారు. పక్కన ఉన్న కంపెనీలకు మంటలు వ్యాపించకుండా అగ్నిమాపక సిబ్బంది చర్యలు తీసుకున్నారు.