ఎల్లుండి నుంచే ఇందిరమ్మ ఇళ్ల లబ్దిదారుల ఎంపిక.. రేపే యాప్ ప్రారంభం

ఎన్నికల్లో ఇచ్చిన హామీ మేరకు తెలంగాణలో పేదల సొంతింటి కలను కాంగ్రెస్ ప్రభుత్వం నెరవేర్చబోతోంది. ఇందిరమ్మ ఇండ్ల లబ్ధిదారుల ఎంపిక కోసం మొబైల్‌ యాప్‌‌ను సిద్ధం చేసింది. ముఖ్యమంత్రి రేవంత్‌రెడ్డి చేతుల మీదుగా ఈ యాప్‌ గురువారం ప్రారంభించనున్నారు. శుక్రవారం నుంచి లబ్ధిదారుల ఎంపిక ప్రక్రియ మొదలవుతుందని తెలంగాణ రెవెన్యు, గృహ నిర్మాణ శాఖ మంత్రి పొంగులేటి శ్రీనివాసరెడ్డి ప్రకటన చేశారు. పార్టీలు, ప్రాంతాలు అన్న తేడా లేకుండా అర్హులైన ప్రతి ఒక్కరికీ ఇళ్లు అందిస్తామని ఇప్పటికే ప్రభుత్వం ప్రకటించింది.

మహిళ పేరు మీదనే ఇందిరమ్మ ఇళ్లు మంజూరు చేస్తున్నామని మంత్రి పొంగులేటి తెలిపారు. మొత్తం రూ.5 లక్షలు నాలుగు దశల్లో లబ్దిదారులకు చెల్లింపులు చేస్తామని మంత్రి స్పష్టం చేశారు. మధ్యవర్తుల ప్రమేయానికి ఆస్కారం లేకుండా నేరుగా లబ్దిదారుని బ్యాంకు ఖాతాలో డబ్బు జమ చేస్తామని ఆయన చెప్పారు. ఈ పథకం కింద నిర్మించే ఇళ్లు క‌నీసం 400 చ‌ద‌ర‌పు అడుగుల విస్తీర్ణం, వంట‌గ‌ది, టాయిలెట్ సౌక‌ర్యాల‌ను క‌లిగి ఉంటాయని అన్నారు. గ‌త ప్రభుత్వంలో ఇళ్ల నిర్మాణానికి కాంట్రాక్ట్ వ్యవ‌స్ధ ఉండేదని.. ఇప్పుడు దానిని పూర్తిగా ర‌ద్దుచేసి లబ్దిదారులే ఇళ్లు నిర్మించుకునేలా అవకాశం కల్పిస్తున్నామని పేర్కొన్నారు.

లబ్దిదారులు తమ సౌలభ్యాన్ని బట్టి 400 చ‌ద‌ర‌పు అడుగులకు తగ్గకుండా ఎంత విస్తీర్ణంలోనైనా నిర్మాణం చేసుకోవచ్చని మంత్రి సూచించారు. రాష్ట్రంలోని ప్రతి మండల కేంద్రంలో ఇందిరమ్మ మోడల్ హౌస్ నిర్మాణాలను చేపడతామని అన్నారు. ఇందిరమ్మ ఇళ్ల పథకం అమ‌లుకు ఉన్న ఆటంకాలను అధిగ‌మిస్తూ అమ‌లుకు అవ‌స‌ర‌మైన కార్యాచ‌ర‌ణ‌ను ప్రభుత్వం వేగవంతం చేసిందని మంత్రి పేర్కొన్నారు.

‘ఇల్లు లేని పేద‌ల‌కు ఇల్లు నిర్మించి ఇవ్వడమే ఇందిరమ్మ ప్రభుత్వ లక్ష్యం... కాంగ్రెస్ అంటే ఇందిర‌మ్మ ఇళ్లు.. ఇందిర‌మ్మ ఇళ్లకు కాంగ్రెస్ పేటెంట్. ఈ రోజుకు కూడా తెలంగాణలోని ఏ మూలకు పోయినా, ఏ తండాకు పోయినా, ఏ గ్రామానికో.. ప్రాంతానికి పోయినా ఇందిరమ్మ ఇళ్లే కనబడతాయి. మా ప్రభుత్వం చేపట్టే అన్ని కార్యక్రమాలు ఒక వంతు అయితే, మేం కట్టించే ఇందిరమ్మ ఇళ్లు మరో వంతు... మేం గర్వంగా చెబుతున్నాం ప్రతి పేదవాడికి ఇల్లు కట్టించి ఇస్తామని చెబుతున్నాం’ అని మంత్రి పొంగులేటి స్పష్టం చేశారు.

ల‌బ్దిదారుల ఎంపిక పార‌ద‌ర్శకంగా ఉండేలా.. ఎటువంటి అవినీతికి ఆస్కారం లేకుండా రాజకీయ జోక్యానికి తావు లేకుండా అర్హులను ఎంపిక చేయడానికి వీలుగా మొబైల్ యాప్‌ను రూపొందించామని చెప్పారు. ఈ యాప్‌ను సీఎం రేవంత్ రెడ్డి గురువారం ప్రారంభిస్తారని తెలిపారు. ఇక,లబ్ధిదారుల ఎంపిక నుంచి ఇళ్ల పంపిణీ పూర్తయ్యే వరకు సాంకేతిక పరిజ్ఞానాన్ని విరివిగా వాడుకోవాలని అధికారులు నిర్ణయించారు. గ్రామీణులను దృష్టిలో పెట్టుకుని యాప్‌లో తెలుగు వెర్షన్‌ ఉండేలా జాగ్రత్తలు తీసుకున్నట్టు తెలుస్తోంది.