182 మంది సస్పెండ్....ఆ ఉద్యోగులకు బిగ్‌షాక్ ఇచ్చిన కలెక్టర్

సిద్ధిపేట జిల్లా కలెక్టర్, జిల్లా ఎన్నికల అధికారి కె. హైమావతి గ్రామ పంచాయతీ ఎన్నికల విధులకు హాజరు కాని ఉద్యోగులపై కఠిన చర్యలు తీసుకున్నారు. మొదటి విడత ఎన్నికల విధులకు హాజరుకాని ఏకంగా 182 మంది ఉద్యోగులను సస్పెండ్ చేస్తూ ఉత్తర్వులు జారీ చేయడం జిల్లాలో సంచలనంగా మారింది. ఎన్నికల విధులకు సంబంధించి స్పష్టమైన ఆదేశాలు జారీ చేసినప్పటికీ.. ఇంత పెద్ద సంఖ్యలో ఉద్యోగులు విధులకు గైర్హాజరు కావడంపై కలెక్టర్ ఈ కీలక నిర్ణయం తీసుకున్నారు.

తొలి విడత గ్రామ పంచాయతీ ఎన్నికలు సిద్ధిపేట జిల్లా పరిధిలోని రెండు డివిజన్లలో జరిగాయి. సిద్ధిపేట, గజ్వేల్ డివిజన్ల పరిధిలో ఎన్నికలు జరిగాయి. మొత్తం ఏడు మండలాల్లో.. దౌల్తాబాద్, రాయపోల్ (సిద్దిపేట డివిజన్), గజ్వేల్, జగదేవ్‌పూర్, మర్కుక్, ములుగు, వర్గల్ (గజ్వేల్ డివిజన్) – పోలింగ్ జరిగింది. జిల్లాలోని ఈ ఏడు మండలాల్లో మొత్తం 88.05 శాతం పోలింగ్ నమోదైంది. జిల్లాలోని మొత్తం 163 గ్రామ పంచాయతీలకు గాను.. 16 పంచాయతీలు ఏకగ్రీవం కావడంతో, మిగిలిన 147 గ్రామాలకు పోలింగ్ నిర్వహించారు. ఇందులో 149 సర్పంచ్, 1208 వార్డు మెంబర్ స్థానాలకు ఎన్నికలు జరిగాయి.

సాధారణంగా ఎన్నికల విధులు అనేది అత్యంత ముఖ్యమైన విధి. ప్రజాస్వామ్య ప్రక్రియ సజావుగా సాగడానికి ఎన్నికల సిబ్బంది సమయానికి విధులకు హాజరు కావాలి. ఎన్నికల విధులకు స్పష్టమైన ఆదేశాలు ఉన్నప్పటికీ, 182 మంది ఉద్యోగులు విధులకు హాజరు కాకపోవడం అనేది విధి నిర్వహణలో నిర్లక్ష్యం కిందకు వస్తుంది. కలెక్టర్ తీసుకున్న ఈ సస్పెన్షన్ నిర్ణయం.. మిగిలిన ఉద్యోగులకు ఒక ముఖ్యమైన సందేశాన్ని పంపుతుంది. భవిష్యత్తులో ఎన్నికల విధులు లేదా ఇతర ముఖ్యమైన ప్రభుత్వ కార్యక్రమాలకు నిర్లక్ష్యం వహిస్తే, కఠిన చర్యలు ఉంటాయని ఈ నిర్ణయం స్పష్టం చేసింది.

సిద్ధిపేట జిల్లాతో సహా రాష్ట్రవ్యాప్తంగా తొలి విడతలో మొత్తం 3,834 గ్రామాల్లో పోలింగ్ జరిగింది. రాష్ట్రవ్యాప్తంగా 53.57 లక్షల ఓటర్లకు గాను. 45.15 లక్షల మంది ఓటు హక్కును వినియోగించుకున్నారు. మొత్తం 84.28 శాతం పోలింగ్ నమోదైంది.

అత్యధిక పోలింగ్ శాతం యాదాద్రి భువనగిరి జిల్లాలో (92.88%) నమోదు కాగా.. అత్యల్పంగా భద్రాద్రి జిల్లాలో (71.79%) నమోదైంది. ఇటీవల జిల్లాలో ఓ ప్రాథమిక ఆరోగ్య కేంద్రాన్ని సందర్శించిన కలెక్టర్ మెడికల్ ఆఫీసర్‌తో సహా పలువురు సిబ్బంది గైర్హాజరు కావడంతో ఆగ్రహం వ్యక్తం చేస్తూ.. వారి నెల శాలరీలో ఒక రోజు జీతం కట్ చేసిన విషయం తెలిసిందే.