లక్కీ డ్రా ద్వారా డబుల్‌ బెడ్‌రూం ఇళ్లు కేటాయింపు

తెలంగాణలో గత ప్రభుత్వ హయాంలో నిర్మించిన ప్రతిష్టాత్మకమైన రెండు పడక గదుల ఇళ్ల కేటాయింపు ప్రక్రియ ఆదిలాబాద్ జిల్లాలో కొలిక్కి వస్తోంది. గతంలో నిర్వహించిన లక్కీ డ్రాలో ఎంపికైన లబ్ధిదారులతో పాటు, ఇటీవల ప్రారంభించిన ప్రజాపాలన కేంద్రాల్లో దరఖాస్తు చేసుకున్న అర్హులను గుర్తించి, ఇంటి కేటాయింపు కోసం అధికారులు తుది జాబితాను సిద్ధం చేస్తున్నారు. అయితే ఈ ప్రక్రియలో అనూహ్యమైన సమస్య ఎదురైంది. గతంలో లక్కీ డ్రా ద్వారా ఎంపికైన మొత్తం 618 మంది లబ్ధిదారుల స్థితిగతులపై సర్వే నిర్వహించాలని ప్రస్తుత కాంగ్రెస్ ప్రభుత్వం ఆదేశించింది.

ఈ సర్వేను క్షేత్రస్థాయిలో నిర్వహించడానికి వార్డు అధికారులు ప్రయత్నించగా.. వారిలో 176 మంది లబ్ధిదారులు ఇప్పటిదాకా అందుబాటులోకి రాలేదు. రెండున్నరేళ్ల కిందట దరఖాస్తులో ఇచ్చిన చిరునామాలు దొరకకపోవడం, ఫోన్ నెంబర్లు పనిచేయకపోవడం, కొందరు చనిపోవడం, మరికొందరు ఇతర ప్రాంతాలకు వలస వెళ్లిపోవడం వంటి కారణాల వల్ల ఈ లబ్ధిదారుల వివరాలు అధికారులకు లభ్యం కావడం లేదు. దీంతో వార్డు అధికారులు ఈ విషయాన్ని ఉన్నతాధికారులకు నివేదించారు.

ఆదిలాబాద్ బల్దియా పరిధిలో డబుల్ బెడ్‌రూమ్ ఇళ్ల నిర్మాణం కోసం రెండు ప్రధాన ప్రాంతాలను ఎంచుకున్నారు. 170 కాలనీలో 222 గృహాలను (రూ.11.76 కోట్లతో) కేఆర్‌కే కాలనీలో 760 ఇళ్లతో సహా మొత్తం 982 గృహ సముదాయాలను (రూ.40.28 కోట్లతో) జీ ప్లస్-2 తరహాలో నిర్మించారు. ఈ ఇళ్లు నిర్మించి అయిదేళ్లకు పైగా అయినప్పటికీ కనీస మౌలిక వసతులు రోడ్లు, డ్రైనేజీ, తాగునీరు కల్పించడంలో జాప్యం జరగడంతో ఇవి నిరుపయోగంగా ఉన్నాయి. లబ్ధిదారులు ఇళ్లపై అనాసక్తి చూపడానికి ఇదే ప్రధాన కారణం. అపార్ట్‌మెంట్ తరహా నివాసాల కంటే కొందరు లబ్ధిదారులు తమ సొంత స్థలాల్లో కొత్త ఇందిరమ్మ ఇళ్లను నిర్మించుకునేందుకు మొగ్గు చూపుతున్నారు.

2023 మే నెలలో నిర్వహించిన లక్కీ డ్రాలో మొత్తం 982 ఇళ్లలో 618 ఇళ్లకు మాత్రమే లబ్ధిదారులను ఎంపిక చేశారు. ఇప్పుడు.. సర్వేకు అందని 176 మంది లబ్ధిదారుల స్థానంలో ప్రజాపాలన దరఖాస్తుదారులు సహా ఇతర అర్హులైన లబ్ధిదారులకు ఈ ఇళ్లను కేటాయించేందుకు అధికారులు కసరత్తు చేస్తున్నారు. ఉన్నతాధికారుల నుంచి స్పష్టమైన ఆదేశాలు అందగానే ఖాళీగా ఉన్న ఇళ్ల కేటాయింపును వేగవంతం చేసే అవకాశం ఉంది, తద్వారా నిరుపేదలకు సొంతింటి కల సాకారమవుతుందని భావిస్తున్నారు.