సమోసా షాపులోకి దూసుకొచ్చిన బెంజ్ కార్.. షాకింగ్ వీడియో

వేగంగా వెళ్తోన్న ఓ బెంజ్ కారు అదుపుతప్పి రహదారి పక్కనే ఉన్న దుకాణంలోకి దూసుకెళ్లింది. ఈ ప్రమాదంలో ఆరుగురు వ్యక్తులకు గాయాలయ్యాయి. షాకింగ్ ఘటన దేశ రాజధాని ఢిల్లీలోని రాజ్‌పూర్ రోడ్డులో రెండు రోజుల కిందట చోటుచేసుకుంది. ప్రస్తుతం దీనికి సంబంధించిన వీడియో సోషల్ మీడియాలో వైరల్ అవుతోంది. సివిల్ లైన్స్ పోలీస్ స్టేషన్ పరిధిలోని రాజ్‌పూర్ రోడ్డులో ఓ కచోరీ సమోసా షాపులోకి బెంజ్ కారు దూసుకొచ్చింది. వాహనం అదుపుతప్పి దుకాణంలోకి చొచ్చుకొస్తుండటంతో అక్కడనున్నవారు తప్పించుకునే ప్రయత్నం చేశారు. కానీ, అప్పటికే వాహనం వారిని ఢీకొట్టింది. అనంతరం అక్కడ ఉన్న గోడను గుద్ది ఆగిపోయింది.

ఈ ప్రమాదంలో కనీసం ఆరుగురు గాయపడ్డారు. ఘటనతో భయభ్రాంతులకు గురైన కస్టమర్లు, సిబ్బంది కేకలు వేశారు. ప్రమాదం గురించి సమాచారం అందుకున్న పోలీసులు అక్కడకు చేరుకుని డ్రైవర్‌ను అరెస్ట్ చేశారు. కారును స్వాధీనం చేసుకున్నారు. అయితే, డ్రైవర్ మద్యం తీసుకోలేదని ప్రాథమికంగా విచారణలో నిర్దారించారు. కానీ, అతడి రక్త నమూనాలను సేకరించి, తదుపరి పరీక్షల కోసం పంపినట్టు ఢిల్లీ పోలీసులు తెలిపారు. ఇక, ఈ భయానక ఘటనకు సంబంధించిన వీడియో అక్కడ ఉన్న సీసీటీవీ కెమెరాల్లో రికార్డయ్యింది. ఈ వీడియో బయటకు రాగా ప్రస్తుతం వైరల్‌గా మారింది.

కారు ఢీకొట్టడంతో అక్కడున్నవారు ఎగిరిపడటం ఆ వీడియోలో కనిపిస్తోంది. ప్రమాదం తర్వాత కారును వెనక్కి తీస్తుండగా.. కింద ఎవరైనా ఉన్నారేమోనని ఓ వ్యక్తి చూస్తున్నాడు. బాధితులను చికిత్స కోసం ఆస్పత్రికి తరలించారు. ప్రస్తుతం వారికి చికిత్స కొనసాగుతోందని పోలీసులు తెలిపారు.