ఆ మూడు రాష్ట్రాల్లో ఉప-ఎన్నికల పోలింగ్ తేదీల్లో మార్పు

ఉత్తర్ ప్రదేశ్, కేరళ, పంజాబ్‌లోని 14 అసెంబ్లీ నియోజకవర్గాల ఉప-ఎన్నికల పోలింగ్ తేదీలను కేంద్ర ఎన్నికల కమిషన్ మార్పు చేసింది. షెడ్యూల్ ప్రకారం నవంబరు 13న ఎన్నికలు జరగాల్సి ఉండగా.. తాజాగా నవంబరు 20కు మార్చుతున్నట్టు ప్రకటించింది. నవంబరు 23న ఫలితాలను వెల్లడిస్తారు. రాజకీయ పార్టీల నుంచి వచ్చిన విజ్ఞ‌ప్తి మేరకు పోలింగ్ తేదీని మార్చినట్టు విశ్వసనీయ వర్గాలు తెలిపాయి. నవంబరు 13 నుంచి 15 మధ్య కల్పతి రథోత్సవం, కార్తీక పౌర్ణమి, గురు నానక్ జయంతి వంటి పండుగలు ఉన్నాయని, ఇది ఓటింగ్‌పై ప్రభావితం చూపుతుంది కాబట్టి పోలింగ్ తేదీలు మార్చాలని కోరాయి.

ఉత్తర్ ప్రదేశ్‌లోని 9, పంజాబ్‌లో 4, కేరళలోని ఒక అసెంబ్లీ స్థానంలో పోలింగ్ నవంబరు 20న జరగనుంది. దేశంలో 15 రాష్ట్రాల్లోని మొత్తం 48 అసెంబ్లీ, రెండు లోక్‌సభ స్థానాలకు ఉప-ఎన్నికలతో పాటు మహారాష్ట్ర, ఝార్ఖండ్ అసెంబ్లీకి ఎన్నికలు జరుగుతున్నాయి. మహారాష్ట్రలోని మొత్తం 288 స్థానాలుండగా.. నవంబరు 20న ఒకే దశలో పోలింగ్ నిర్వహిస్తున్నారు. ఇక, 81 స్థానాలున్న ఝార్ఖండ్‌లో మాత్రం రెండు దశల్లో (నవంబరు 13, 20) పోలింగ్ జరగనుంది.

కాగా, ‘ఆ రోజున పెద్ద ఎత్తున సామాజిక, సాంస్కృతిక, మతపరమైన కార్యక్రమాలను పరిగణనలోకి తీసుకుంటే, ప్రజలకు అసౌకర్యం కలుగుతుంది.. వివిధ లాజిస్టిక్ సమస్యలకు దారి తీస్తుంది... పోలింగ్ సమయంలో ఓటరు భాగస్వామ్యాన్ని తగ్గించడానికి దారితీయవచ్చు అని లింగ్ తేదీని మార్చాలని, పలు ప్రాంతీయ, జాతీయ పార్టీల నుంచి వచ్చిన అభ్యర్ధనలను పరిగణనలోకి తీసుకున్నాం’ అని ఈసీ వెల్లడించింది. గతంలో ఇలాగే పండుగల రావడంతో రెండు సందర్భాల్లో పోలింగ్ తేదీలను ఈసీ మార్పు చేసింది. అయితే, ఎన్నికల పోలింగ్ తేదీ మారినా.. ఓట్ల లెక్కింపు తేదీల్లో ఎటువంటి మార్పు ఉండదని స్పష్టం చేసింది.

కేరళలోని పాలక్కడ్, పంజాబ్‌లోని డేరా బాబా నానక్ చబ్బేవల్, గిడ్డెర్బా, బర్నాల్, యూపీలోని మీరాపూర్, కుండర్కీ, ఘాజియాబాద్, ఖైర్, ఖర్హాల్, సిష్మామౌ, ఫుల్పూర్, కటేహరి, మఝవాన్ స్థానాలకు ఉప-ఎన్నికలు జరుగుతున్నాయి. ఈ స్థానాలను ఎమ్మెల్యేలుగా ప్రాతినిధ్యం వహించివారు లోక్‌సభ ఎన్నికల్లో గెలవడంతో ఖాళీ అయ్యాయి. కేరళలోని వయనాడ్, మహారాష్ట్రలోని నాందేడ్ పార్లమెంట్‌కు కూడా ప్రస్తుతం ఉప-ఎన్నిక జరుగుతోంది. గత ఎన్నికల్లో రాయబరేలీ, వయనాడ్‌‌లో కాంగ్రెస్ నేత రాహుల్ గాంధీ విజయం సాధించగా.. ఏదో ఒక స్థానానికి మాత్రమే ప్రాతినిధ్యం వహించాల్సి ఉంటుంది. ఈ నేపథ్యంలో రాహుల్ గాంధీ వయనాడ్‌ సీటును వదులుకోగా.. ప్రస్తుతం కాంగ్రెస్ తరఫున ఆయన సోదరి ప్రియాంక గాంధీ బరిలో ఉన్నారు.