ఆరేళ్ల తర్వాత జమ్మూ కశ్మీర్ అసెంబ్లీ తొలిసారి భేటీ.. ఆర్టికల్ 370పై రచ్చరచ్చ

జమ్మూ కశ్మీర్ అసెంబ్లీ మొదటి సమావేశం రసాభాస అయ్యింది. ఆర్టికల్ 370 రద్దయిన ఆరేళ్ల తర్వాత మొదటిసారి ఆ రాష్ట్ర శాసనసభ సమావేశమైంది. ఆర్టికల్ 370 రద్దుకు వ్యతిరేకంగా పీపుల్స్ డెమొక్రాటిక్ పార్టీ ఎమ్మెల్యే వహీద్ పర్రా అసెంబ్లీలో తీర్మానం ప్రవేశపెట్టారు. దీనిని బీజేపీ ఎమ్మెల్యేలు వ్యతిరేకించగా... స్పీకర్ రహీమ్ రథేర్ సైతం దీనిని అనుమతించబోనని స్పష్టం చేశారు. దీంతో అసెంబ్లీలో గందరగోళం నెలకుంది. కాగా, ఆర్టికల్ 370ను కేంద్రంలోని బీజేపీ ప్రభుత్వం పునరుద్దరిస్తుందని భావించడం అవివేకమవుతుందని జమ్మూ కశ్మీర్ ముఖ్యమంత్రి ఒమర్ అబ్దుల్లా వ్యాఖ్యానించారు.

‘వాస్తవంగా 2019 ఆగస్టు 5 నాటి కేంద్రం నిర్ణయాన్ని జమ్మూ కశ్మీర్ ప్రజలు అంగీకరించడం లేదు.. ఒకవేళ, వాళ్లు ఒప్పుకుని ఉంటే అసెంబ్లీ ఎన్నికల్లో ఫలితాలు భిన్నంగా ఉండేవి’ అని సీఎం అన్నారు. ‘దీనిని సభ ఎలా ప్రతిబింబిస్తుంది.. చర్చిస్తుంది అనేది ఏ ఒక్క సభ్యుడు నిర్ణయించడు... ఈరోజు ప్రవేశపెట్టిన తీర్మానానికి ప్రాముఖ్యత లేదు కానీ అది కెమెరాల ముందు షో చేయడానికి మాత్రమే. దీని వెనుక ఏదైనా సుదుద్దేశం ఉంటే, వాళ్లు దీని గురించి ముందే మాతో చర్చించి ఉండేవారు’ అని సీఎం పేర్కొన్నారు.

రెండోసారి అధికారంలోకి వచ్చిన తర్వాత నరేంద్ర మోదీ నాయకత్వంలోని ఎన్డీయే ప్రభుత్వం.. జమ్మూ కశ్మీర్‌కు ప్రత్యేక హోదా కల్పించే ఆర్టికల్ 370ను 2019 ఆగస్టు 5న రద్దుచేసింది. ఆ రాష్ట్రాన్ని రెండు కేంద్రపాలిత ప్రాంతాలుగా విభజించింది. దీనిపై సుప్రీంకోర్టులో పలువురు సవాల్ చేయగా.. రాజ్యాంగంలోని ఈ వెసులుబాటు కేవలం తాత్కాలికమేనని గతేడాది డిసెంబరులో తీర్పు చెప్పింది.

ఇటీవల జమ్మూ కశ్మీర్‌లో పదేళ్ల తర్వాత అసెంబ్లీ ఎన్నికలు జరగడంతో నేషనల్ కాన్ఫరెన్స్-కాంగ్రెస్ కూటమి విజయం సాధించి ప్రభుత్వాన్ని ఏర్పాటుచేసింది. మొత్తం 90 స్థానాలున్న ఆ రాష్ట్రంలో ఇండియా కూటమి 49 స్థానాల్లో గెలుపొందింది. కాగా, ఎన్నికల్లో ఆర్టికల్ 370 రద్దు, మళ్లీ రాష్ట్ర హోదా ప్రధాన అంశాలుగా మారాయి. బీజేపీ సైతం సరైన సమయంలో రాష్ట్ర హోదా పునరుద్దరిస్తామని హామీ ఇచ్చింది.