బంగ్లాదేశ్‌కు అదానీ దెబ్బ.. విద్యుత్ సరఫరా ఆపేస్తామని హెచ్చరికలు

ఇప్పటికే దేశవ్యాప్త ఆందోళనలు, ఆర్థిక సంక్షోభంతో కొట్టుమిట్టాడుతున్న పొరుగు దేశం బంగ్లాదేశ్‌‌కు బిజినెస్‌మెన్ గౌతమ్ అదానీకి చెందిన అదానీ పవర్ సంస్థ.. అల్టిమేటం ఇచ్చింది. విద్యుత్ బకాయిలు చెల్లించకపోతే కరెంట్ సరఫరా నిలిపివేస్తామని హెచ్చరించింది. నవంబర్ 7వ తేదీ లోగా బకాయిలు చెల్లించకుంటే విద్యుత్ సరఫరా నిలిపేస్తామని బంగ్లాదేశ్‌కు అదానీ పవర్ తేల్చి చెప్పింది. బకాయిలు చెల్లించడంలో విఫలమైన బంగ్లాదేశ్‌కు ఇప్పటికే అదానీ పవర్.. విద్యుత్ సరఫరా తగ్గించింది. అయినప్పటికీ బకాయిలు చెల్లించకపోవడంతో పూర్తిగా విద్యుత్ సరఫరా ఆపేస్తానని వెల్లడించింది.

ప్రస్తుతం బంగ్లాదేశ్ ప్రభుత్వం అదానీ పవర్ సంస్థకు 850 మిలియన్ డాలర్లు అంటే భారత కరెన్సీలో రూ.7,200 కోట్ల బకాయిలు చెల్లించాల్సి ఉంది. అయితే ఈ బకాయిల చెల్లింపులకు సంబంధించి బంగ్లాదేశ్ ప్రభుత్వ ఆధీనంలోని బంగ్లాదేశ్ పవర్ డెవలప్‌మెంట్ బోర్డుకు.. అదానీ పవర్‌కు మధ్య ఏదైనా సెటిల్మెంట్ జరిగిందా అన్న విషయం ఇంకా తెలియరాలేదు. కేవలం బకాయిలు చెల్లించడంతోపాటు సెక్యూరిటీ ఆఫ్ పేమెంట్ కోసం లెటర్ ఆఫ్ క్రెడిట్ అందించాలని బంగ్లాదేశ్ పవర్ డెవలప్‌మెంట్ బోర్డుకు గడువు విధించింది.

ఇప్పటికే వాడుకున్న విద్యుత్ సరఫరాకు సంబంధించిన బకాయిలు చెల్లించడంతోపాటు సెక్యూరిటీ ఆఫ్ పేమెంట్ కోసం 170 మిలియన్ డాలర్లు అంటే భారత కరెన్సీలో సుమారు రూ.1500 కోట్లు.. అక్టోబర్ 31వ తేదీ లోగా లెటర్ ఆఫ్ క్రెడిట్ అందజేయాలని బంగ్లాదేశ్ పవర్ బోర్డుకు అదానీ పవర్ డెడ్‌లైన్ పెట్టింది. ఈ క్రమంలోనే కృషి బ్యాంకు ద్వారా అదానీ పవర్ సంస్థకు లెటర్ ఆఫ్ క్రెడిట్ జారీ చేసేందుకు చర్యలు చేపట్టింది. అయితే ఇది పవర్ పర్చేజ్ అగ్రిమెంట్‌లో భాగం కాదని బంగ్లాదేశ్ పవర్ డెవలప్‌మెంట్ బోర్డు వర్గాలు వెల్లడించాయి. విద్యుత్ బకాయిలు చెల్లించకపోవడానికి మరో కారణం డాలర్ల కొరత అని బీపీడీపీ వర్గాలు పేర్కొంటున్నాయి. ఫలితంగా అక్టోబర్ 31వ తేదీ నుంచి జార్ఖండ్‌లోని గొడ్డా పవర్ ప్లాంట్ నుంచి 1496 మెగావాట్ల విద్యుత్‌లో కోత విధించి.. దానికి బదులు 724 మెగావాట్ల విద్యుత్ సరఫరా చేసింది.

అయితే ఇటీవల తీవ్ర రాజకీయ సంక్షోభంలో చిక్కుకున్న బంగ్లాదేశ్‌లో ఆర్థిక సమస్యలు కూడా ఉన్నట్లు అర్థం అవుతోంది. గత నెలలో సుమారు 90 మిలియన్ల డాలర్ల విద్యుత్ బిల్లుల బకాయిలను అదానీ పవర్‌కు బీపీడీబీ చెల్లించినట్లు తెలుస్తోంది. నెలవారీ 90-100 మిలియన్ డాలర్ల విద్యుత్ బిల్లులు అయితే.. బీపీడీబీ కేవలం 20-50 మిలియన్ డాలర్లు మాత్రమే అదానీ పవర్ చెల్లిస్తూ రావడం వల్లే బకాయిలు పెరిగిపోయినట్లు విమర్శలు వెల్లువెత్తుతున్నాయి. ఇప్పటికే ఆర్థికంగా, రాజకీయంగా సంక్షోభంలో చిక్కుకున్న నేపథ్యంలో బంగ్లాదేశ్ పవర్ సంస్థలు.. విద్యుత్ కొనుగోళ్లను తగ్గించుకుంటున్నాయి. ఎన్టీపీసీతో కూడిన జాయింట్ వెంచర్ బంగ్లాదేశ్ ఇండియా ఫ్రెండ్‌షిప్ పవర్ కంపెనీ కూడా బొగ్గు కొరత వల్ల సగానికంటే తక్కువ విద్యుత్ ఉత్పత్తి చేస్తోంది. అదానీ పవర్ తయారు చేసే విద్యుత్ మీద యూనిట్‌కు రూ.10-12 పలుకుతోంది. ఇండోనేషియా, ఆస్ట్రేలియాల నుంచి దిగుమతి చేసుకుంటున్న బొగ్గుతో తయారు చేస్తున్న ఈ విద్యుత్ ఛార్జీలు కాస్త ఎక్కువగానే కనిపిస్తున్నాయి.