అల్పపీడనం ఎఫెక్ట్.. ఏపీలో 3 రోజులు భారీ వానలు.. ఈ జిల్లాల్లోనే

ఏపీవాసులకు అలర్ట్.. రాష్ట్రంలో మంగళవారం నుంచి గురువారం వరకూ భారీ వర్షాలు కురవనున్నాయి. నవంబర్ 12 నుంచి 14 వరకూ భారీ వర్షాలు కురుస్తాయని ఏపీ విపత్తుల నిర్వహణ సంస్థ అంచనా వేసింది. నైరుతి బంగాళాఖాతంలో ఆవర్తనం కొనసాగుతోందన్న ఏపీ విపత్తుల నిర్వహణ సంస్థ.. సోమవారం నాటికి అల్పపీడనంగా మారే అవకాశం ఉందని తెలిపింది. అనంతరం పశ్చిమ దిశగా తమిళనాడు, శ్రీలంక తీరాల వైపు నెమ్మదిగా కదిలే అవకాశం ఉందని ఏపీ విపత్తుల నిర్వహణ సంస్థ ఎండీ రోణంకి కూర్మనాథ్ తెలిపారు. బంగాళాఖాతంలో ఆవర్తనం, ద్రోణి ప్రభావంతో నవంబర్ 12 నుంచి 14 వరకు ఏపీలో మోస్తరు నుంచి భారీ వర్షాలు కురిసే అవకాశం ఉందని తెలిపారు.

ఆవర్తనం కారణంగా సోమవారం కాకినాడ, అంబేద్కర్ కోనసీమ, నెల్లూరు, అన్నమయ్య, చిత్తూరు, తిరుపతి జిల్లాలలో కొన్నిచోట్ల తేలికపాటి వర్షం కురుస్తుందని ఏపీ విపత్తుల నిర్వహణ సంస్థ అంచనా వేసింది. నవంబర్ 12న అంటే మంగళవారం నెల్లూరు, శ్రీసత్యసాయి, వైఎస్ఆర్, అన్నమయ్య, చిత్తూరు, తిరుపతి జిల్లాలో కొన్నిచోట్ల మోస్తరు నుంచి భారీ వర్షాలు కురుస్తాయని తెలిపింది. అలాగే విశాఖ, కాకినాడ, కోనసీమ, పశ్చిమగోదావరి, కృష్ణా, బాపట్ల, ప్రకాశం జిల్లాలో తేలికపాటి నుంచి మోస్తరు వర్షం కురుస్తుందని అంచనా వేసింది.

నవంబర్ 13న బుధవారం.. కాకినాడ, కోనసీమ, గోదావరి జిల్లాలు, ఏలూరు, కృష్ణా, గుంటూరు, బాపట్ల, ప్రకాశం, నెల్లూరు, కర్నూలు, నంద్యాల, వైఎస్ఆర్, తిరుపతి జిల్లాలలో కొన్నిచోట్ల మోస్తరు నుంచి భారీ వర్షాలు కురుస్తాయని రోణంకి కూర్మనాథ్ తెలిపారు. ఎన్టీఆర్, పల్నాడు, అనంతపురం, శ్రీసత్యసాయి, అన్నమయ్య, చిత్తూరు జిల్లాల్లో తేలికపాటి నుంచి మోస్తరు వర్షం కురిసే అవకాశం ఉందన్నారు.

నవంబర్ 14 గురువారం రోజున గోదావరి జిల్లాలు, ఏలూరు, కృష్ణా, ఎన్టీఆర్, గుంటూరు, గుంటూరు, బాపట్ల, పల్నాడు, ప్రకాశం, నెల్లూరు, కర్నూలు, నంద్యాల, అనంతపురం, సత్యసాయి, తిరుపతి జిల్లాలలో మోస్తరు నుంచి భారీ వర్షాలు.. కాకినాడ, కోనసీమ, వైఎస్ఆర్, అన్నమయ్య, చిత్తూరు జిల్లాలలో కొన్నిచోట్ల తేలికపాటి నుంచి మోస్తరు వర్షం కురుస్తుందని ఏపీ విపత్తుల నిర్వహణ సంస్థ అంచనా వేసింది. వర్షాల నేపథ్యంలో వరి కోతలు, ఇతర వ్యవసాయ పనుల్లో రైతులు జాగ్రత్తలు తీసుకోవాలని సూచించింది. అలాగే తీరప్రాంత వాసులు అప్రమత్తంగా ఉండాలని కోరింది.