ట్రంప్ గెలుపు.. అమెరికాను వీడనున్న హాలీవుడ్ హీరోయిన్లు, కారణం ఇదే

అమెరికా అధ్యక్ష ఎన్నికల్లో డొనాల్డ్ ట్రంప్ విజయం సాధించారు. వచ్చే ఏడాది జనవరిలో అమెరికా 47వ అధ్యక్షుడిగా ప్రమాణ స్వీకారం చేయనున్నారు. ఈ నేపథ్యంలోనే వైట్‌హౌస్‌లో డొనాల్డ్ ట్రంప్ రెండోసారి అడుగుపెట్టనున్న వేళ.. కొందరు తీవ్రంగా వ్యతిరేస్తున్నారు. ఈ క్రమంలోనే పలువురు హాలీవుడ్ హీరోయిన్లు.. తాము అమెరికాను విడిచిపెట్టి ఇతర దేశాలకు వెళ్లిపోతామని ప్రకటిస్తు్న్నారు. అయితే రోజురోజుకూ ఈ సంఖ్య పెరగడం అమెరికాలో ప్రస్తుతం తీవ్ర చర్చనీయాంశంగా మారింది. ఇప్పటికే ఎలాన్ మస్క్ ట్రాన్స్‌జెండర్ కుమార్తె కూడా మరోసారి అమెరికా అధ్యక్షుడిగా ట్రంప్ విజయం సాధించడంతో.. తనకు ఇక అమెరికాలో భవిష్యత్‌ ఉండదని పేర్కొంటూ.. తాను దేశం విడిచి వెళ్లిపోనున్నట్లు ప్రకటించారు. ఈ నేపథ్యంలోనే హాలీవుడ్ స్టార్స్ కూడా అదే బాటలో పయనిస్తుండటం గమనార్హం.

అమెరికా ఎన్నికలకు కొద్దిరోజుల క్రితం నుంచి ఎలాన్ మస్క్, డొనాల్డ్ ట్రంప్‌ స్నేహం రోజురోజుకూ మరింత దగ్గరైంది. ఈ నేపథ్యంలోనే ట్రంప్ విజయం తర్వాత.. లింగ మార్పిడి చేసుకున్న ఎలాన్ మస్క్ కుమార్తె, 20 ఏళ్ల వివియన్ జెన్నా విల్సన్ సంచలన ప్రకటన చేశారు. అమెరికా అధ్యక్షుడిగా ట్రంప్ గెలిచారు కాబట్టి.. ఇక అమెరికాలో తనలాంటి ట్రాన్స్‌జెండర్లకు భవిష్యత్తు లేదని అర్ధమైందని.. అందుకే ఈ ఎన్నికల రిజల్స్ట్ చూసిన తర్వాత.. దేశం విడిచి వెళ్లిపోవాలనే భావన తనలో బలపడిందని వెల్లడించారు. ఈ క్రమంలోనే తాజాగా అమెరికాలోని చాలామంది హై ప్రొఫైల్ హాలీవుడ్ సెలిబ్రిటీలు కూడా యూఎస్ వదిలి వెళ్లిపోతామని అంటున్నారు.

ప్రముఖ హాలీవుడ్ నటి 40 ఏళ్ల అమెరికా ఫెరీరా తాను బ్రిటన్‌కు వెళ్లనున్నట్లు తెలిపారు. తన ఇద్దరు పిల్లల భవిష్యత్తు కోసం అమెరికాను వీడాలని నిర్ణయించుకున్నట్లు పేర్కొన్నారు. అమెరికా అధ్యక్ష ఎన్నికల్లో డెమోక్రటిక్ పార్టీ అభ్యర్థి కమలా హారిస్ ఓటమిపై అమెరికా ఫెరీరా తీవ్ర ఆవేదన వ్యక్తం చేశారు. ఇక మరో హలీవుడ్ ప్రముఖ నటి షెరాన్ స్టోన్ కూడా ఇదే రకమైన అభిప్రాయాన్ని వ్యక్తం చేశారు. తాను ఇటలీకి వెళ్లిపోవాలని భావిస్తున్నానని తెలిపారు. ద్వేషం, అసహనం అనే దుర్మార్గపు పునాదులపై నిలబడి అమెరికా ఎన్నికల్లో డొనాల్డ్ ట్రంప్ గెలిచారని ఆమె తీవ్ర విమర్శలు గుప్పించారు.

ఈ ఎన్నికల్లో డొనాల్డ్ ట్రంప్ గెలవడంతో తన ఆరోగ్యం దెబ్బతిందని.. ప్రముఖ హాలీవుడ్ సింగర్, నటి చెర్ తెలిపారు. ఈ నేపథ్యంలోనే తాను అమెరికా వీడటం ఖాయమని తేల్చి చెప్పారు. మొదటిసారి అమెరికా అధ్యక్షుడిగా ట్రంప్ ఎన్నికైనపుడు తనకు అల్సర్ వచ్చిందంటూ చెర్ సెటైరికల్‌గా కామెంట్ చేశారు. ఇక గేమ్ ఆఫ్ థ్రోన్స్‌లో కీలక పాత్ర పోషించిన బ్రిటీష్ నటి సోఫీ టర్నర్ ప్రస్తుతం అమెరికాలోనే ఉంటున్నారు. తాజాగా తిరిగి ట్రంప్ అధికారంలోకి రావడంతో.. తాను తిరిగి స్వదేశం బ్రిటన్‌కు వెళ్లిపోవాలనే ఆలోచనను వెల్లడించారు.

మరోవైపు.. డొనాల్డ్ ట్రంప్ గెలవడానికి చాలా నెలల ముందే.. బ్రిటీష్ నటి 54 ఏళ్ల మిన్నీ డ్రైవెర్ అమెరికా నుంచి యూకేకు వలస వెళ్లారు. అయితే ఆమె యూకేకు వలస వెళ్లడానికి ముందు మాట్లాడుతూ.. మళ్లీ అమెరికా అధ్యక్షుడిగా ట్రంప్ ఎన్నికయ్యే పరిస్థితులు కనిపిస్తున్నాయని తెలిపారు. దాదాపు 30 ఏళ్ల పాటు మిన్నీ డ్రైవెర్ లాస్ ఏంజెలెస్‌లో నివసించగా.. అకస్మాత్తుగా యూఎస్ నుంచి వెళ్లిపోవడం సంచలనం రేపింది.