వైసీపీకి మరో షాక్.. ఎమ్మెల్సీ పదవికి, పార్టీకి కీలక నేత గుడ్ బై

ఆంధ్రప్రదేశ్‌లో వైఎస్సార్ కాంగ్రెస్ పార్టీకి మరో బిగ్ షాక్ తగిలింది. వైసీపీకి మరో కీలక నేత గుడ్ బై చెప్పారు. ఆంధ్రప్రదేశ్ అసెంబ్లీ ఎన్నికల ఫలితాల తర్వాత పలువురు నేతలు వైసీపీకి రాజీనామా చేశారు. మరికొందరు రాజకీయంగా సైలెంట్ అయ్యారు. బాలినేని శ్రీనివాసరెడ్డి, సామినేని ఉదయభాను వంటి నేతలు వైసీపీని వీడి.. జనసేన పార్టీలో చేరిపోయారు. అయితే తాజాగా మరో ఎమ్మెల్సీ వైసీపీకి షాకిచ్చారు. కైకలూరుకు చెందిన ఎమ్మెల్సీ జయమంగళ వెంకటరమణ వైఎస్సార్ కాంగ్రెస్ పార్టీకి రాజీనామా చేశారు. ఎమ్మెల్సీ పదవికి రాజీనామా చేసిన జయమంగళ వెంకటరమణ తన రాజీనామా లేఖను ఏపీ శాసనమండలి ఛైర్మన్ మోషేన్‌రాజుకు పంపించారు. ఎమ్మెల్సీ పదవితో పాటుగా వైసీపీ ప్రాథమిక సభ్యత్వానికి కూడా రాజీనామా చేస్తున్నట్లు జయమంగళ వెంకటరమణ ప్రకటించారు.

మరోవైపు కృష్ణా జిల్లా కైకలూరు నియోజకవర్గానికి చెందిన జయమంగళ వెంకటరమణ.. గతేడాది వరకూ తెలుగుదేశం పార్టీలోనే కొనసాగారు. అయితే ఆంధ్రప్రదేశ్ అసెంబ్లీ ఎన్నికలు 2024కు ఏడాది ముందు జయమంగళ వెంకటరమణ టీడీపీని వీడారు. 2023 ఫిబ్రవరిలో తెలుగుదేశం పార్టీకి రాజీనామా చేసి వైసీపీ అధినేత వైఎస్ జగన్ సమక్షంలో వైఎస్సార్ కాంగ్రెస్ పార్టీ కండువా కప్పుకున్నారు. అనంతరం వైఎస్ జగన్.. జయమంగళ వెంకటరమణకు ఎమ్మెల్యే కోటా ఎమ్మెల్సీ ఎన్నికల్లో అవకాశం ఇచ్చారు. ఈ ఎన్నికల్లో గెలిచిన జయమంగళ వెంకటరమణ.. ఎమ్మెల్యే కోటా ఎమ్మెల్సీగా శాసనమండలికి ఎన్నికయ్యారు.

అయితే 2024 ఆంధ్రప్రదేశ్ అసెంబ్లీ ఎన్నికల్లో వైసీపీ ఘోర పరాజయం పాలైంది. టీడీపీ కూటమి అధికారంలోకి వచ్చింది. దీంతో ఎన్నికల ఫలితాల తర్వాత జయమంగళ వెంకటరమణ రాజకీయంగా సైలెంట్ అయ్యారు. వైసీపీతో అంటీముట్టనట్టుగా వ్యవహరిస్తూ వచ్చారు. తాజాగా శనివారం ఎమ్మెల్సీ పదవితో పాటుగా వైసీపీకి కూడా రాజీనామా చేస్తున్నట్లు ప్రకటించారు. అయితే జయమంగళ వెంకటరమణ తిరిగి సొంతగూటికి (టీడీపీ) చేరతారా.. లేదంటే జనసేన వైపు అడుగులు వేస్తారా అనేది చూడాల్సి ఉంది. ఈ రెండూ కాదని రాజకీయాలకు కొంతకాలం విరామం ఇస్తారా అనేదానిపైనా ఆసక్తి నెలకొంది.