ప్రియుడి కిడ్నాప్‌కు ప్రయత్నించిన ప్రియురాలు.. కారణం తెలిసి షాక్

తిరుపతిలో ప్రియుడి కిడ్నాప్‌కు ప్రయత్నించిందో ప్రియురాలు. మూడు నెలలుగా ఇద్దరి మధ్య మాటలు లేవు.. ఇష్టపడిన వ్యక్తి దూరం పెట్టడంతో ఏం చేయాలో తెలియలేదు. మరోవైపు ప్రియుడు చేజారిపోతాడేమోనన్న భయం కూడా వెంటాడింది. ఇక లాభం లేదుకుని మాస్టర్ ప్లాన్ వేసింది. తన ప్రియుడిని కిడ్నాప్ చేసేందుకు ప్రయత్నించి అడ్డంగా దొరికిపోయింది. పోలీసులకు సమాచారం అందడంతో ఛేజ్ చేసి మరీ పట్టుకున్నారు.

చిత్తూరు జిల్లా పెనుమూరు రేణుకానగర్‌కు చెందిన శ్రీనివాసులు తిరుపతిలోని పెద్దకాపు వీధిలోని పార్థ డెంటల్‌ ఆస్పత్రి ఎదురుగా ఓ లాడ్జిని నిర్వహిస్తున్నారు. అయితే మదనపల్లెకి చెందిన వివాహిత సోనియా భాను భర్త చనిపోయారు. ఈ క్రమంలో ఆమెకు శ్రీనివాసులుతో పరిచయం ఏర్పడింది.. ఇద్దరు కలిసి సాగే వరకు వెళ్లింది. శ్రీనివాసులు, సోనియా మధ్య మూడు నెలలుగా విభేదాలు రావడంతో దూరంగా ఉంటున్నారు.. ఇద్దరి మధ్య మాటలు కూడా లేవు.

ప్రియుడు దూరం పెట్టడంతో సోనియా తట్టుకోలేకపోయింది.. శ్రీనివాసులు ఎక్కడ చేజారిపోతాడేమోనని భయపడింది. శ్రీనివాసులును ఎలాగైనా తన దారికి తెచ్చుకోవాలని భావించింది.. అప్పుడు కిడ్నాప్ ఆలోచన వచ్చింది. వెంటనే తన ప్లాన్‌ను అమలు చేసేందుకు మదనపల్లెకి చెందిన ఐదుగురు యువకులతో డీల్ చేసుకుంది. ఈ ఐదుగురు కారులో గురువారం మధ్యాహ్నం తిరుపతికి వచ్చి.. శ్రీనివాసులు కోసం రెక్కీ చేశారు. కొద్దిసేపటి తర్వాత అతడ్ని లాడ్జి దగ్గర నుంచి బలవంతంగా తీసుకెళ్లారు.

శ్రీనివాసుల్ని ఎత్తుకెళ్లడంతో లాడ్జి సిబ్బంది వెంటనే అప్రమత్తమై పోలీసులకు సమాచారం ఇచ్చారు.. వారు వెంటనే రంగంలోకి దిగి టీమ్‌లను ఏర్పాటు చేసి గాలింపు మొదలు పెట్టారు. చివరికి అన్నమయ్య జిల్లా వాయల్పాడు దగ్గర కిడ్నాపర్ల కారును పోలీసులు గుర్తించి అడ్డుకున్నారు.. అందర్నీ అదుపులోకి తీసుకున్నారు. ఈ కిడ్నాప్ వ్యవహారంలో మదనపల్లెకి చెందిన మోక్షిత్, రాజేష్, రియాజ్, బాబా ఫకృద్దీన్, సందీప్‌లను అరెస్ట్ చేశారు. బాధితుడి ఫిర్యాదు మేరకు కేసు నమోదు చేసి దర్యాప్తు చేయనున్నట్లు పోలీసులు తెలిపారు. శ్రీనివాసులు తనకు దక్కడేమోనన్న భయంతోనే ఈ కిడ్నాప్‌కు ప్లాన్ చేసినట్లు పోలీసులు ప్రాథమికంగా తేల్చారు. ఈ కేసుకు సంబంధించిన పూర్తి వివరాలు తెలియాల్సి ఉంది.